44788

བསྟན་འཕེལ་ཁྲི་འཛིན་དང་པོ་སྐུ་ཕྲེང་དང་པོ་ཀུན་བཟང་རྒྱ་མཚོ་ (1)

Part of speech

མིང་ཚིག

Definition

གྲུབ་དབང་ཀརྨ་བསྟན་འཕེལ་གྱི་སློབ་མ་བསྟན་འཕེལ་ཀུན་བཟང་རྒྱ་མཚོ་མཆོག་ནི། ཁམས་གླིང་ཚང་རྒྱལ་པོའི་ཆབ་འོག་ཟླ་སྨད་མར་དགོན་གྱི་ཉེ་འགྲམ་དུ། རབ་བྱུང་བཅུ་པའི་ནང་ཙམ་ལ་སྐུ་བལྟམས། ཟླ་རྒྱུད་འདི་ཉིད་ལ་མདོ་ཁམས་པ་གྲུབ་དབང་ཀརྨ་བསྟན་འཕེལ་གྱི་སློབ་མ་རྒྱ་མཚོའི་མཚན་འཆང་བཞི་བྱུང་བ་ལས་གཅིག་ཡིན་པར་གྲགས་པ་ལྟར། གྲུབ་ཆེན་ཀརྨ་བསྟན་འཕེལ་རིགས་བདག་ཏུ་བསྟེན་ཏེ། མདོ་རྒྱུད་མན་ངག་ཐམས་ཅད་བུམ་པ་གང་བྱོའི་ཚུལ་དུ་གསན། དེ་དག་ཐོས་པ་ཙམ་དུ་མ་བཞག་པར་དབེན་གནས་རྣམས་སུ་ཉམས་སུ་བླངས་པས་ཕྱག་རྒྱ་ཆེན་པོའི་རྟོགས་པ་མངོན་དུ་གྱུར། ཕྱོགས་མེད་བྱ་བྲལ་དུ་ཕེབས་ཤིང༌། དབེན་རི་སྣ་ཁུང་གདོང༌། སྒྲུབ་གནས་གཡའ་མ་ལུང༌། ནམ་མཁའ་ཁྱུང་རྫོང་སོགས་སུ་བཞུགས་ནས་བཀའ་གདམས་པའི་གཏད་ས་བཞི་མཐའ་འཁྱོངས་པར་མཛད། གྲུབ་དབང་མཆོག་གི་སློབ་མ་མཆེད་གྲོགས་མར་གླིང་ངག་དབང་འབྱུང་གནས་ཀྱིས་གླིང་ཁོག་ཏུ་དགོན་གནས་ཕུལ། རིམ་བཞིན་ཤེའུ་ཁོག་ཏུ་དགོན་པ་གསར་དུ་ཕྱག་བཏབ་པས། གླིང་བསྟན་འཕེལ་ཕུན་ཚོགས་བསམ་གཏན་གླིང་ཞེས་ཕྱིའི་གཙུག་ལག་ཁང༌། ནང་གི་དགེ་འདུན་སྡེ། སྤང་བླང་གི་མཛད་ཕྲིན་གང་ཅི་ཐད་ནས་དར་ཞིང་རྒྱས་པ་འདི་བྱུང༌། ཐུན་མོང་དུ་གྲུབ་པའི་རྟགས་མཚན་མང་དུ་མངའ། གདུལ་བྱ་རྣམས་ལ་ཟབ་མོ་ཆོས་ཀྱི་འཁོར་ལོ་བར་མེད་དུ་བསྐོར་བའི་མཐར། ངོ་མཚར་བཅས་སྐུ་གཤེགས་སོ། །