4570

ཁྲི་དམར་ཡེ་ཤེས་བསྟན་འཛིན་ (1)

Part of speech

མིང་ཚིག

Definition

རབ་བྱུང་བཅུ་གསུམ་པའི་ཤིང་སྟག་ཕྱི་ལོ་ ༡༧༩༤ ལོར་ཀ་རྒྱའི་བིས་རྒྱར་འཁྲུངས། བིས་ཐང་ཡེ་ཤེས་དར་རྒྱས་ལས་རབ་ཏུ་བྱུང་། བཱ་ཡན་སྟོད་ཐའི་དགོན་དུ་ཕེབས་ནས་འདོན་ཆོས་བསླབས། དགུང་ལོ་བཅོ་ལྔ་པར་བྱ་ཁྱུང་དགོན་པའི་ཆོས་སྒོར་ཞུགས། མདོ་སྔགས་རིག་གནས་ཀུན་ལ་སྦྱངས། གྲྭ་སར་ཕེབས་ཏེ་མཚན་བཏགས་བཞེས། པཎ་ཆེན་རིན་པོ་ཆེ་སོགས་ལས་བསྙེན་རྫོགས་ཞུས། མདོ་སྨད་རང་ཡུལ་དུ་ཕེབས། ཞེ་བདུན་པ་རབ་བྱུང་བཅུ་བཞི་པའི་ལྕགས་བྱི་ཕྱི་ལོ་ ༡༨༤༠ ལོར་བྱ་ཁྱུང་དགོན་པའི་གདན་སའི་ཁྲིར་ཕེབས། ལོ་ལྔའི་རིང་དུ་གདན་ས་བསྐྱངས། རྗེ་གསེར་ཁང་བའི་ཞབས་ལ་གཏུགས། སྒྲུབ་པ་ཉམས་ལེན་མཛད། ལུགས་གཉིས་ཀྱི་མཁྱེན་རྒྱ་ཆེ། རྒྱ་རྒྱའི་དགོན་དང་ཀ་མདོ་གདོང་དམར་སྣ་སོགས་སུ་བཞུགས་ནས་ཉམས་བཞེས་བསྐྱངས། རྒྱུད་པའི་འདུས་སྤྱིས་ཞུས་ངོར་གསང་འདུས་དང་བདེ་མཆོག་གི་དབང་གནང་། ལམ་རིན་ཆེན་མོའི་བཤད་ལུང་དང་། བདེ་ལམ་གྱི་ཉམས་ཁྲིད་སོགས་གནང་། གྱ་གཅིག་པ་རབ་བྱུང་བཅོ་ལྔ་པའི་ཤིང་ཁྱི་ཕྱི་ལོ ་༡༨༧༤ ལོར་སྐུ་གཤེགས། བྱ་ཁྱུང་དགོན་པའི་མཁན་རབས་རེ་གཉིས་པ་ཡིན། གསུང་རྩོམ་ལ་བར་དོའི་འཕྲང་སྒྲོལ་གྱི་འགྲེལ་བ། སྐུ་གསུམ་ལམ་ཁྱེར་ཚིགས་བཅད་མ། རིམ་གཉིས་ཀྱི་སྡོམ་སྦྱར་བྱང་མེད་པ་ཡང་མང་ཙམ་ཡོད་ཅེས་རྗེ་བདེ་ཡངས་རིན་པོ་ཆེས་གསུངས་ཞེས་བྱ་ཚང་བའི་གདན་རབས་སུ་བཀོད་འདུག