4571

ཁྲི་དར་མ་ཨུ་དུམ་བཙན་ (1)

Part of speech

མིང་ཚིག

Definition

ཡབ་ཁྲི་ལྡེ་སྲོང་བཙན་དང་ཡུམ་འབྲོ་བཟའ་ལྷ་རྒྱལ་མང་མོ་རྗེ་གཉིས་ཀྱི་སྲས་སུ་ཤིང་ལུག་ཕྱི་ ༨༡༥ ལོར་འཁྲུངས། རང་ལོ་ཉེར་བདུན་ལྕགས་བྱ་ནས་ཆུ་ཁྱི་ཕྱི་ལོ་ ༨༤༢ བར་ལོ་གཉིས་ལ་སྲིད་བསྐྱངས། སྦས་རྒྱལ་ཏོ་རེ་དང་སྣ་ནམ་རྒྱལ་ཚ་ཁྲི་འབུམ་གྱིས་བློན་པོ་བྱས། བཙུན་མོ་སྣ་ནམ་བཟའ་དང་། ཚེ་སྤོང་བཟའ་བཙན་མོ་འཕན་གཉིས་ཁབ་ཏུ་བསུས། འབྲི་ལྷ་ཁང་བཞེངས་ཤིང་དཀོན་མཆོག་ལ་སྲི་ཞུ་མཛད། བཙན་པོ་འདི་ཁྲིར་བཞུགས་སྐབས་རི་ཉིལ། ཆུ་ལོག ཞིང་ལ་བཙའ་ཐན་བཅས་རང་བྱུང་གི་གནོད་སྐྱོན་ཚབས་ཆེན་ཕོག་པའི་རྐྱེན་གྱིས་བོད་ལ་མུ་གེ་དང་ནད་ཡམ་མཆེད་པ་སོགས་ཕྱི་ནང་གི་རྐྱེན་དུ་མས་དམ་ཆོས་བསྒྱུར་བའི་འཕྲོ་ཆད། ལོ་པཎ་མང་པོ་ས་མཐར་ཕེབས་དགོས་བྱུང་། དགེ་འདུན་ལ་བླ་ནས་འཚོ་བ་སྦྱོར་བའི་མཚམས་ཆད། གྲྭ་བཙུན་རྣམས་ཀྱིས་ཚུལ་མིན་གྱི་སྤྱོད་པ་མང་དུ་བྱས་པ་དང་བྱེད་དུ་བཅུག། ཆོས་བྱེད་རྣམས་རྒྱལ་པོ་ལ་མ་གུས་པ་ཆེན་པོ་བྱུང་། འོན་ཀྱང་རྒྱལ་པོ་འདིའི་རིང་རྒྱལ་མཚམས་དང་ཕྱི་འབྲེལ་དམག་སྟོབས་སོགས་ལ་ཉམས་རྒུད་དང་འཕོ་འགྱུར་གང་ཡང་བྱུང་མེད་པ་འདྲ། རང་ལོ་སོ་དགུ་པ་ཕྱི་ལོ་ ༨༤༢ ལ་ལྷ་ལུང་དཔལ་གྱི་རྡོ་རྗེས་ལྐོག་མདའ་བརྒྱབ་ནས་བཀྲོངས་ཞེས་གྲགས་ཀྱང་། ཐང་ཡིག་གསར་མ་དང་འབྲེལ་ཡོད་ལོ་རྒྱུས་ཡིག་ཆ་ཁག་ན་བློན་ཆེན་ཞང་ཡན་ལི་སྤུན་མཆེད་ཀྱིས་བཀུམ་པར་བཤད་པ་ཡོད་པའི་དཔྱད་འོས་ཤིན་ཏུ་ཆེ། མཚན་གྱི་རྣམ་གྲངས་ལ། ཏུན་ཧོང་ཡིག་རྙིང་ལས། འུ་དུན་བརྟན། ལྡེའུ་ཆོས་འབྱུང་ལས་དར་མ། ཉང་རལ་ཆོས་འབྱུང་ལས། དར་མ་འུ་དུམ་བཙན་པོ། ས་ཆེན་རྒྱལ་རབས་ལས། གླང་དར་མ་སྤྲེལ་མགོ ཡར་ཀླུང་ཆོས་འབྱུང་དང་དེབ་དམར་ལས། གླང་དར་མ། རྒྱལ་རབས་གསལ་མེ་ལས། ཁྲི་གླང་དར་མ་དབུ་དུམ་བཙན། ལྷ་བཙན་པོའི་གདུང་རབས་དང་སྔོན་གཏམ་མེ་ཏོག་ཕྲེང་བ་ལས། གནོད་སྦྱིན་དར་མ་འུ་དུམ་བཙན། ཐང་ཡིག་དང་དེབ་སྔོན་ལས། ཐ་མུ། བཤད་མཛོད་ཆེན་མོ་ལས། དར་མ། མཁས་པའི་དགའ་སྟོན་ལས། ཁྲི་དར་མ་ཨུ་དུམ་བཙན། འཕྲུལ་གྱི་ལྡེ་མིག་ལས། ཁྲི་དར་མ་འུ་དུམ་བཙན། དཔྱིད་ཀྱི་རྒྱལ་མོའི་གླུ་དབྱངས་ལས། གླང་དར་མ་འུ་དུམ་བཙན་སོགས་འབྲི་ཚུལ་སྣ་ཚོགས་མཆིས། སྲས་ཡུམ་བརྟན་དང་འོད་སྲུང་གཉིས་འཁྲུངས།