4578

ཁྲི་བཀྲ་ཤིས་ལྡེ་ (1)

Part of speech

མིང་ཚིག

Definition

རབ་བྱུང་ལྔ་པའི་ཆུ་བྱི་ཕྱི་ལོ་ ༡༣༡༢ ལོར་ཡབ་ཆོས་སྐྱོང་ལྡེ་དང་། ཡུམ་ཀུན་དགའ་འབུམ་གཉིས་ཀྱི་སྲས་སུ་འཁྲུངས། བཤེས་གཉེན་ལ་བསྟེན་ནས་དཔེ་ཡིག་ལུང་གསུམ་ལ་སྦྱངས། བསོད་ནམས་འབུམ་ཁབ་ཏུ་བཞེས། རབ་བྱུང་དྲུག་པའི་ས་སྟག་ཕྱི་ལོ་ ༡༣༣༨ ལོར་ཕུན་ཚོགས་ལྡེ་འཁྲུངས། དགུང་ལོ་སོ་དགུ་པ་རབ་བྱུང་དྲུག་པའི་ཆུ་འབྲུག་ཕྱི་ལོ་ ༡༣༥༢ ལོར་མང་ཡུལ་གུང་ཐང་གི་ཆབ་སྲིད་བསྐྱངས། ཡབ་ཀྱི་དགོངས་རྫོགས་སུ་རྒྱལ་བའི་སྐུ་བརྙན་དང་། ཡུམ་གྱི་ཆེད་དུ་སྒྲོལ་མའི་སྐུ་བརྙན་བཞེངས། བསྟན་འགྱུར་ཡང་གསེར་གྱི་ཡང་ཞུན་གྱིས་བྲིས། རབ་བྱུང་དྲུག་པའི་ཆུ་ཡོས་ཕྱི་ལོ་ ༡༣༦༣ ལོར་ལོ་ཆེན་བྱུང་ཆུབ་རྩེ་མོ་སོགས་ཀྱིས་ཞུས་དག་དང་རབ་གནས་མཛད། རྫོང་དཀར་གྱི་ལྕགས་རི་ཕྱི་མ་དང་། ལྕགས་རི་ཆེན་པོའི་ལྕགས་སྐོར། སྟག་ཚང་དཔེའུ་ཆེན་གྱི་ལྕགས་ཁང་ལྕགས་རིའི་འོག་ནས་རྒྱང་རིང་པོར་ཤར་བསྐྱོད་ཐུབ་པའི་དོང་ལམ་དང་། གསང་སྒོ་དཔེའུ། རྫོང་གི་དབུས་དང་། ཆོས་སྡེའི་ནང་དུ་ཁྲོན་ཆུ་བཏོན། རྡོ་ཀྱོང་ཆེན་པོ་སོགས་ཉེ་བར་སྤྱོད་པའི་རིགས་བཅས་ཞིབ་ཚགས་མཛད། གླེགས་ཤིང་ལ་གསེར་རིས་དང༌། བསྡེམ་ཐག་སི་ཏཱ་ཧོ(སི་ཤན་ལས་བཟོས་པའི་ཐག་པ)ལས་བཟོས་པའི་གླེགས་ཐག དཔེ་སྒྲིལ་བཟང་གོས་ཤ་སྟག་ལས་གྲུབ་པ་ཞིག་བཞེངས། གསེར་ཡིག་གིས་བྲིས་པའི་བཀའ་འགྱུར་ཆ་ཚང་བཞེངས་རྒྱུ་འདུན་ཡོད་ཀྱང་། རབ་བྱུང་དྲུག་པའི་ཤིང་སྦྲུལ་ཕྱི་ལོ་ ༡༣༦༥ ལོར་སྐུ་གཤེགས། མང་ཡུལ་གུང་ཐང་གི་རྒྱལ་རབས་བཅུ་གསུམ་པ་ཡིན།