47906

བྱམས་པ་བསྒོམ་པ་ (1)

Part of speech

མིང་ཚིག

Definition

མདོ། དབུ་མ། ལས་དང་པོ་བ་རྣམས་ནི་རྒྱུ་མཚན་གྱི་སྒོ་ནས་བསྒོམ་དགོས་པས་བདག་ཉིད་ལ་ཕན་པ་དང། སངས་རྒྱས་ཀྱིས་བཟུང་བ་དང། སེམས་ཅན་ཉིད་ཀྱི་ཡོན་ཏན་ཏེ། རྒྱུ་མཚན་གསུམ་གྱིས་བསྒོམ་པར་བྱའོ། །དེ་ལ་བདག་ཉིད་ལ་ཕན་པ་ནི་འདི་ལྟར་ཚེ་འདིའི་མས། བདག་ལྟོར་ཞུགས་ནས་མ་བརླག་མ་སྨས་པར་བཟུང་བ་དང། བཙས་ནས་སྲིན་བུའི་ཆུ་བུར་ལྟར་རེག་མི་བཟད་པ་བགས་ཀྱིས་བསྐྱངས། ཁ་ཟས་སྙོད་ཅིང་མི་གཙང་བ་ལག་པས་ཕྱགས། བརྩེ་གདུང་ཚད་མེད་པར་བྱས། བྱམས་པའི་མིག་གིས་བལྟས། སྙན་པའི་ཚིག་གིས་དྲིད། འཚམ་པའི་འཚོ་བ་བྱིན། ཡ་ང་བའི་འཇིགས་པ་ཐམས་ཅད་ལས་བསྲུངས། འཇིག་རྟེན་པའི་བརྡ་དང་ཐ་སྙད་ཐམས་ཅད་བསླབས། ནོར་གྱི་སྙིང་པོ་བྱིན་པའི་བུའི་དོན་དུ་ཚེ་འདིར་ལྟོགས་འཁྱགས་ངལ་དུབ་དང་ལུས་སྲོག་འདོར་བའི་དཀའ་བ་སྤྱད། མི་དགེ་བ་བཅུ་ཆར་བསྐྱེད་པས་ཕྱི་མར་ངན་སོང་དུ་ལྷུང་བའི་ལས་བྱས་ཏེ། མདོར་ན་བུའི་ཉེས་པ་སྐྱོབ་ཅིང་ཅི་བཟང་བྱས་པས་ཤིན་ཏུ་དྲིན་ཆེ་བར་བསམ་པས་དེ་སྡུག་ཅིང་ཕན་གདགས་བྱར་འཛིན་པ་འབྱུང་ལ། དེ་བཞིན་དུ་སེམས་ཅན་དག་ནི་རེ་རེས་ཀྱང། །ཡང་ནས་ཡང་དུ་མ་བྱས་ཏེ། །ཞེས་པའི་ཚུལ་གྱིས་སེམས་ཅན་ཐམས་ཅད་ཀྱི་དྲིན་བསམ་པས་དེ་སྙིང་དུ་སྡུག་ཅིང་ཕན་གདགས་བྱར་འཛིན་པ་འབྱུང་ངོ་། །སངས་རྒྱས་ཀྱིས་བཟུང་བ་ནི། སེམས་ཅན་རྣམས་ནི་བུ་གཅིག་པ་ལྟར་དེས་བཟུང་བས་དེ་ལ་གནོད་པ་བྱས་ན་ང་ལ་གནོད་བྱས་ཤིང། སེམས་ཅན་ཕན་པ་བྱས་ན་ང་ལ་མཆོད་པའི་མཆོག། ཅེས་པའི་ཚུལ་གྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བུ་གཅིག་པ་ལྟར་གཅེས་པར་མཛད་པས་ཀྱང་བླ་མའི་བུ་ལྟར་སྡུག་ཅིང་ཕན་གདགས་པར་བསམ་པའོ། །སེམས་ཅན་ཉིད་ཀྱི་ཡོན་ཏན་ནི། སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ཡིན་པས་ཀྱང་རྒྱལ་པོའི་བུ་དང། ནོར་བུའི་ཟ་མ་ཏོག་དང། དར་ཡུག་གི་རྡུལ་བཞིན་སྡུག་ཅིང་ཕན་གདགས་བྱར་བསམ་པའོ། །ཅི་ལྟར་བསྒོམ་པའི་ཚུལ་ནི། ཐོག་མར་ཚེ་འདིའི་མ་ལ་བྱམས་པ་རང་གི་ཚད་དུ་བསྒོམ་པར་བྱ་དེ་ནས་མ་དེའི་ཚད་ཀྱིས་ཉེ་འབྲེལ་ནས། ཡུལ་མི་ནས་འཛམ་བུའི་གླིང་ནས་གླིང་བཞི་ནས། སྟོང་གསུམ་ནས་ནམ་མཁའི་མཐར་ཐུག་པར་བསྒོམས་ཏེ་བྱམས་པ་དང་ལྡན་པའི་སེམས་རྒྱ་ཆེན་པོ་ཤིན་ཏུ་ཡངས་པ་ཚད་མེད་པ་ཞེས་པར་འགྱུར་རོ། །གོམས་པར་བྱས་པའི་ཕན་ཡོན་ནི། སེམས་ཅན་རྣམས་ལ་རྗེ་བོ་གཙོས་སུམ་བརྒྱའི་ཁ་ཟས་དུས་གསུམ་རྟག་ཏུ་ཕྱིན་པ་དང་། སངས་རྒྱས་ལ་ལོངས་སྤྱོད་ཐམས་ཅད་ཀྱིས་རྟག་ཏུ་མཆོད་པ་བས་བསོད་ནམས་ཆེ་བ་དང། བྱམས་ཆོས་ཡོན་ཏན་བརྒྱད་ལྡན་ཐོབ་པ་དང། འདིར་སྙིང་རྗེ་དང་བྱང་ཆུབ་ཀྱི་སེམས་སྐྱེ་བའོ། །ཞེས་ཀུན་མཁྱེན་གོ་རམས་པས་དབུ་མའི་སྤྱི་དོན་ལས་གསུངས་སོ། །