48364

བྱེ་མདོ་སེམས་གསུམ་གྱི་བསྟན་བཅོས་ (1)

Part of speech	མིང་ཚིག
Definition	བསྟན་བཅོས་ལ་ངོ་བོ་ནི། སྤྱིར་གྲུབ་མཐའ་སྨྲ་བ་བཞི་ཆར་གྱིས་མིང་ཚིག་ཡི་གེའི་ཚོགས་སུ་སྣང་བ་ལ་འདོད་པར་མཚུངས་ལ། ཁྱད་པར་ནི་བྱེ་བྲག་སྨྲ་བས་མིང་ཚིག་ཡི་གེའི་ཚོགས་ཀྱི་བསྡུས་པ། ཡིད་ཀྱི་རྣམ་ཤེས་ཀྱིས་གཟུང་བྱ། ལྡན་པ་མིན་པའི་འདུ་བྱེད། ཕུང་པོ་གཞན་བཞི་ལས་རྫས་གཞན་པ་ཞིག་ལ་འདོད་དེ། དེས་དོན་དངོས་སུ་གོ་བར་བྱེད་པའི་ཕྱིར་ཏེ། རྗོད་བྱེད་ཀྱི་སྒྲ་རང་མཚན་རྣ་བས་ཐོས་པའི་རྗེས་སུ་ཡིད་ཀྱི་རྣམ་ཤེས་ལ་མིང་ཚིག་ཡི་གེའི་རྣམ་པ་སྣང་ཞིང་། དེ་ལས་དོན་དངོས་སུ་གོ་བའི་ཕྱིར། རྗོད་བྱེད་ཀྱི་སྒྲ་རང་མཚན་པ་དང་། ཡིག་འབྲུའི་གཟུགས་རྣམས་བསྟན་བཅོས་བཏགས་པ་བ་ཡིན་ཏེ། འདོགས་པའི་རྒྱུ་མཚན་ནི་དོན་བརྒྱུད་ནས་གོ་བར་བྱེད་པའི་ཕྱིར། བཏགས་པའི་དགོས་པ་ནི་དོན་གོ་བ་ལ་རྗོད་བྱེད་ཀྱི་སྒྲ་རང་མཚན་རྣ་བས་ཉན་པ་དང་། ཡིག་འབྲུ་ལ་མིག་གིས་བལྟ་དགོས་ཞེས་རྟོགས་པའི་ཆེད་ཡིན་པའི་ཕྱིར། དངོས་ལ་གནོད་བྱེད་ནི་དོན་དངོས་སུ་སྟོན་བྱེད་མིན་པའི་ཕྱིར། མདོ་སྡེ་པའི་ལུགས་ནི་ཁ་ཅིག་རྟོགས་པ་ལ་སྣང་བའི་སྒྲ་སྤྱི་ལ་འདོད་པ་ནི་མངོན་པ་སྨྲ་བའི་མདོ་སྡེ་བའི་ལུགས་མིན་ཏེ། དེ་གཟུགས་ཕུང་དུ་མི་རུང་བའི་ཕྱིར་རོ། །དེས་ན་འདིའི་ལུགས་ནི་རྗོད་བྱེད་ཀྱི་སྒྲ་རང་མཚན་ཡིན་པས་གཟུགས་ཕུང་དུ་བཤད་ལ། ཚད་མ་སྨྲ་བའི་མདོ་སྡེ་བ་ལྟར་ན་སྔ་མ་ལྟར་འདོད་པས་བསྟན་བཅོས་རྫས་སུ་མ་གྲུབ་པ་ནི་ཁྱད་པར་རོ། །དེའི་རྒྱུ་མཚན་ཡང་བསྟན་བཅོས་དོན་དངོས་སུ་རྗོད་བྱེད་ལ་འདོད་ལ། དངོས་ཀྱི་བརྗོད་བྱ་རྗོད་བྱེད་དོན་སྤྱི་དང་སྒྲ་སྤྱི། ཞེན་པའི་བརྗོད་བྱ་རྗོད་བྱེད་དོན་དང་སྒྲ་རང་མཚན་ལ་འདོད་པའི་ཕྱིར་དང་། རྩོམ་བྱེད་མིང་ཚིག་ཡི་གེ་གསུམ་ཡང་རྫས་སུ་མ་གྲུབ་ན་དེས་བརྩམས་པའི་བསྟན་བཅོས་རྫས་སུ་གྲུབ་པ་འགལ་བའི་ཕྱིར་རོ། ། སེམས་ཙམ་པའི་ལུགས་ནི་ཁྱད་པར་བཞི་དང་ལྡན་པ་སྟེ། ངོ་བོའི་ཁྱད་པར་ཡིད་ཤེས་ལ་མིང་ཚིག་ཡི་གེའི་ཚོགས་སུ་སྣང་བའི་རྣམ་རིག རྣམ་པའི་ཁྱད་པར་ཚིགས་བཅད་དམ་ལྷུག་པར་གནས་པ། བྱེད་ལས་ཀྱི་ཁྱད་པར་གདུལ་བྱའི་བློ་གྲོས་གོང་དུ་འཕེལ་བར་བྱེད་པ་དང་། རང་རང་གི་འདོད་པའི་དོན་གོ་བར་བྱེད་པ། རྒྱུད་ཀྱི་ཁྱད་པར་ཉན་པ་པོའི་རྒྱུད་ཀྱིས་བསྡུས་པའོ། །འོ་ན་དེ་རྩོམ་པ་པོས་ཅི་ལྟར་བརྩམས་ཤིང་འཆད་པ་པོས་ཇི་ལྟར་འཆད་ཅེ་ན། རྩོམ་པ་པོས་རང་ལ་སྣང་བའི་རྣམ་རིག་དེ་ཉིད་བརྩམས་ཤིང་འཆད་པ་པོས་རང་ལ་སྣང་བའི་རྣམ་རིག་དེ་ཉིད་བཤད་པས་ཉན་པ་པོས་རང་གི་རྣམ་རིག་དེ་ཉིད་གོ་བ་ཡིན་ཏེ། ཉི་ཤུ་པ་ལས། གཅིག་ལ་གཅིག་གི་དབང་གིས་ན། །རྣམ་པར་རིག་པ་ཕན་ཚུན་འགྱུར། །ཞེས་དང་། འབྲི་ལ་སོགས་པའི་ཡིད་དབང་གིས། །དྲན་པ་ཉམས་སོགས་འགྱུར་བ་བཞིན། །ཞེས་སོ་ཞེས་ཀུན་མཁྱེན་གོ་རམས་པའི་ངོ་མཚར་གསུམ་ལྡན་ལས་སོ། །
Domain	ཆོས་ལུགས།

{{#arraymap:བྱེ་མདོ་སེམས་གསུམ་གྱི་བསྟན་བཅོས་

|; |@@@ | | }}