48558

བྲག་དཀར་བློ་བཟང་དཔལ་ལྡན་བསྟན་འཛིན་སྙན་གྲགས་ (1)

Part of speech

མིང་ཚིག

Definition

རྗེ་འདི་ནི་དཀར་མཛེས་འཁྲིགས་ལུང་རི་ཁྲོད་དུ་ཡབ་བསམ་གཏན་ཚེ་རིང་དང༌། ཡུམ་ཚེ་རིང་མའི་སྲས་སུ་རབ་བྱུང་བཅུ་བཞི་པ་མེ་སྟག་ཕྱི་ལོ་ ༡༨༦༦ ལོའི་ཟླ་བ་དང་པོའི་ཚེས་གཅིག་ཉིན་འཁྲུངས། དགུང་ལོ་བཞི་ལ་བྲག་དཀར་བྱང་ཆུབ་རྒྱལ་མཚན་གྱི་ཡང་སྲིད་དུ་ངོས་བཟུང༌། མཚན་བློ་བཟང་དཔལ་ལྡན་བསྟན་འཛིན་སྙན་གྲགས་ཞེས་གསོལ། དགུང་ལོ་ལྔ་ལ་དགེ་རྒན་རྡོ་རྗེ་འབུམ་ལས་ཡི་གེ་འབྲི་ཀློག་གསན། དགུང་ལོ་དགུ་ནས་ཡོངས་འཛིན་བློ་ལྡན་ཆོས་འཕེལ་གྱི་དྲུང་ནས་དག་ཡིག་དང༌། སུམ་རྟགས། སྙན་ངག མདོ་སྔགས་ཀྱི་གཞུང་ཆེན་སྐོར་གྱི་བཤད་ཁྲི་སོགས་སྦྱངས། དྲུང་སར་བླ་མ་བློ་བཟང་དཔལ་ལྡན་བསྟན་འཛིན་ཚུལ་ཁྲིམས་ལས་རབ་ཏུ་བྱུང༌། རྒྱལ་རོང་བླ་མ་དཀོན་བཟང་པོ་དང་ཁང་གསར་བློ་བཟང་མཐུ་སྟོབས་རྒྱ་མཚོ་གཉིས་ལས་དབྱངས་ཅན་སྒྲ་མདོ་དང༌། སྙིང་ཐིག་གི་རྩ་རླུང་འཕྲུལ་འཁོར་ལག་ཁྲིད། འཇིགས་བྱེད་ལྷ་བཅུ་གསུམ་གྱི་དབང་སོགས་གསན། དགུང་ལོ་བཅུ་བདུན་ཐོག་དབུས་ལྷ་ལྡན་དུ་ཕེབས་ཏེ་འབྲས་སྤུངས་བློ་གསལ་གླིང་ཏྲེ་བོ་ཁང་ཚན་དུ་ཞུགས། གཞུང་བཀའ་པོད་ལྔ་ལ་གསན་བསམ་རྒྱ་ཆེར་གནང་ཐོག རིགས་ལམ་རྩོད་གྲྭའི་ནང་དུ་གྲྭ་སྐོར་མཛད་སྐབས་མང་ཐོས་དགེ་བཤེས་རྣམས་ཀྱིས་བསྔགས་བརྗོད་གནང་ཞིང༌། མཁས་པའི་སྙན་གྲགས་བརྟས། དེ་ནས་མུ་མཐུད་རིག་པའི་གནས་སྒོ་ཀུན་ལ་སྦྱོང་བའི་ཐུགས་བརྩོན་ཆེས་ཆེར་སྐྱེས་ཏེ། གྲུབ་དབང་དྷརྨ་སེངྒེ་ལས་གསོ་བ་རིག་པ་དང༌། གཅོད་ཀྱི་དབང་ཁྲིད། གོང་ས་ལྔ་པའི་གསང་བ་རྒྱ་ཅན་ཀློང་ཆེན་སྙིང་ཐིག་གི་དབང་ལུང་ཁྲིད་གསུམ། ཀུན་མཁྱེན་ཀློང་ཆེན་པའི་གསུང་ཆོས་སོགས་ཟབ་ཆོས་མང་དུ་གསན་ཏེ་རིགས་ཀྱི་བདག་པོར་གྱུར། དགུང་ལོ་ཉེར་གཉིས་ཐོག་མདོ་སྨད་དུ་ཕྱིར་ཕེབས་ནས་བྲག་དཀར་བྱང་ཆུབ་གླིང་དུ་བཞུགས། དེར་ཡང་གླིང་ཡོངས་འཛིན་མཆོག་སྤྲུལ་རིན་པོ་ཆེ་དང༌། སེ་རོང་འཇམ་དབྱངས་དབང་ཕྱུག་རབ་བརྟན། ཉ་རྒྱས་མཆོག་སྤྲུལ་སོགས་མཁས་གྲུབ་ཀྱི་ཡོངས་འཛིན་ཇི་སྙེད་སྤྱི་བོར་བཀུར་ཏེ་བསྟན་འགྱུར་གྱི་ལུང་དང༌། ལམ་རིམ་ཆེ་ཆུང༌། རྗེ་ཙོང་ཁ་པ་ཡབ་སྲས་ཀྱི་གསུང་འབུམ། གསང་བདེའི་དབང༌། བདེ་མཆོག་ལུས་དཀྱིལ་དུས་འཁོར་སྦྱོར་དྲུག་སོགས་མདོ་སྔགས་ཀྱི་རིག་གནས་འབྱམས་ཀླས་པར་མང་ཐོས་མཁས་པའི་མངའ་བརྙེས། དགུང་ལོ་ཉེར་བདུན་ནས་བཟུང་བྲག་དཀར་རི་ཁྲོད་མཱ་ལ་ནང་དང༌། ཆོས་དབྱིངས་དགོན། བྲག་མགོའི་དགེ་ཐར་ལུང་སོགས་སུ་གདན་ས་མཛད་དེ་གཞུང་བྱམས་ཆོས་སྡེ་ལྔ་དང༌། དབུ་མ་རྩ་འཇུག བཞི་གཞི་གསུམ། རིགས་ཚོགས། བསྟོད་ཚོགས་སོགས་འཆད་ཁྲིད་མཛད། གཞན་ཡང་དཀར་མཛེས། བྲག་མགོ། མི་ཉག གསེར་ཐར་སོགས་གནས་མཆོག་མང་པོར་ཞབས་ཀྱིས་བཅགས་ཏེ་བདེ་གསང་འཇིགས་གསུམ། སྙིང་ཐིག ཞི་གཅོད་སོགས་ཀྱི་དབང་ལུང་ཁྲིད་གསུམ་དང༌། བཀའ་བསྟན་འགྱུར་དང༌། རྗེ་ཙོང་ཁ་པའི་གསུང་འབུམ། བླ་མ་སོ་སོའི་གསུང་འབུམ་སྣ་ཚོགས་ཀྱི་ལུང་གནང་བ་སོགས་འདུལ་གདུལ་བྱ་རྣམས་སྐལ་ལྡན་གྱི་ལམ་དུ་བཀོད། ཨ་མདོ་དགེ་བཤེས་འཇམ་དཔལ་རོལ་པའི་བློ་གྲོས་དང༌། དགེ་ཐོག་མཆོག་སྤྲུལ་བློ་གྲོས་འགྱུར་མེད་ཆོས་ཀྱི་དབང་ཕྱུག རྭ་ཧོ་མཆོག་སྤྲུལ་འཇམ་དབྱངས་གྲུབ་པའི་དབང་པོ། ཨ་པང་གཏེར་ཆེན་ཨོ་རྒྱན་ཕྲིན་ལས་གླིང་པ་སོགས་མཁས་གྲུབ་གཉིས་ལྡན་གྱི་སྐྱེས་སྐྱེ་ཆེན་དུ་མ་ཞལ་སློབ་ཏུ་གྱུར། བཀའ་འགྱུར་གསེར་བྲིས་གནང་བ་དང༌། རྡོ་རྗེ་སེམས་དཔའ་དང༌། བྱམས་པ་སོགས་གསེར་ཟངས་ཀྱི་སྐུ་མང་པོ་བཞེངས། སྙན་ངག་གི་དཔེར་བརྗོད་དང༌། བསྟོད་ཚོགས། བླ་མ་རྒྱུད་པའི་རྣམ་ཐར། གསང་འདུས་རྩ་རྒྱུད། སྔགས་རྫོགས་སྐོར་གྱི་འགྲེལ་བཤད་སོགས་པར་དུ་འཁོད་པ་གླེགས་བམ་བཅུ་བདུན་ཙམ་བཞུགས། མཐར་རབ་བྱུང་བཅུ་དྲུག་པའི་ས་སྦྲུལ་ལོའི་ཟླ་བརྒྱད་པའི་ཚེས་གསུམ་ཉིན་ཕྱི་ལོ་ ༡༩༢༩ ལ་སྐུ་གཤེགས།

{{#arraymap:བྲག་དཀར་བློ་བཟང་དཔལ་ལྡན་བསྟན་འཛིན་སྙན་གྲགས་

|; |@@@ | | }}