49522

བློའི་སྟོབས་ཀྱིས་ཉན་རང་ཟིལ་གྱིས་གནོན་པ་ (1)

Part of speech	མིང་ཚིག
Definition	མདོ། དབུ་མ། ནམ་གྱི་ཚེ་བློས་ཟིལ་གྱིས་གནོན་ཞེ་ན། རིང་དུ་སོང་བར་བློ་ཡང་ལྷག་པར་འགྱུར། །རྒྱལ་བའི་སྲས་པོ་དེ་ནི་གང་གི་ཚེ་སེམས་བསྐྱེད་པ་བདུན་པ་རིང་དུ་སོང་བར་སོན་པ་དེའི་ཚེ་བློ་ཤེས་རབ་ཀྱི་སྟོབས་ཀྱིས་ཀྱང་ཉན་རང་དག་ལས་ལྷག་པར་འགྱུར་ཏེ། ས་དེར་ཐབས་ཀྱི་ཕ་རོལ་ཏུ་ཕྱིན་པ་ཐོབ་པས་སེམས་ཀྱི་སྐད་ཅིག་རེ་རེ་ཞིང་འགོག་པ་ལ་སྙོམས་པར་འཇུག་ཅིང་ལྡང་བའི་ཕྱིར་དང། ཉན་རང་དག་གིས་དེ་ལྟར་མི་ནུས་པའི་ཕྱིར་རོ་ཞེས་རེད་མདའ་བས་དབུ་འཇུག་རྣམ་བཤད་ལས་གསུངས་སོ། །ས་བདུན་པར་ཉན་རང་གི་ཤེས་རབ་ཀྱི་བྱ་བ་ཐམས་ཅད་ལས་ཤིན་ཏུ་འདས་ཏེ། དེའི་བྱ་བ་ནི། ཉོན་སྒྲིབ་ཀྱི་ས་བོན་སྤོང་བའི་བྱ་བ་ཙམ་བྱེད་ཀྱི་ཤེས་བྱའི་སྒྲིབ་པ་སྤོང་བའི་བྱ་བ་ཅུང་ཟད་ཀྱང་མི་བྱེད་པ་དེ་ཡིན་ལ། ས་བདུན་པར་བྱང་སེམས་རང་གི་ཡུལ་ཤེས་པའི་ཆེ་བ་སྟེ། ཆོས་ཀྱི་བདག་མེད་རྒྱས་པར་བསྒོམ་པའི་སྟོབས་ཀྱིས་ཉོན་སྒྲིབ་མ་ལུས་པ་དྲུངས་འབྱིན་པའི་བར་ཆད་མེད་ལམ་སྐྱེས་ཤིང། ངོ་སྐལ་གྱི་ཤེས་སྒྲིབ་སྤོང་བའི་བྱ་བ་དང་བཅས་པ་ཡིན་ལ། ས་སྔ་མ་རྣམས་སུ་ཤེས་སྒྲིབ་རགས་པ་སྤངས་པའི་རྣམ་པར་གྲོལ་བའི་ལམ་ཡང་མངོན་དུ་བྱས་པས་ཉན་རང་གི་ཤེས་རབ་ཀྱི་བྱ་བ་ལས་ཤིན་ཏུ་འདས་པའི་ཕྱིར། ས་སྔ་མ་རྣམས་སུ་ནི་ཉན་རང་བློས་གནོན་པར་མི་ནུས་ཏེ། དེར་ཉོན་སྒྲིབ་མ་ལུས་པར་སྤོང་བའི་གཉེན་པོ་མ་ཐོབ་པའི་ཕྱིར་རོ་ཞེས་པཎ་ཆེན་ཤཱཀ་མཆོག་གིས་ངེས་དོན་གནད་ཀྱི་ཊཱིཀ་ལས་གསུངས་སོ། །ས་བཅུ་པར། བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་རང་གི་ཡུལ་ཤེས་པའི་ཆེ་བ་ལ་གནས་པས་ཉན་ཐོས་དང་རང་སངས་རྒྱས་ཀྱི་བྱ་བ་ཐམས་ཅད་ལས་ཤིན་ཏུ་འདས་པ་ཡིན་ནོ་ཞེས་གསུངས། རང་གི་ཡུལ་ཤེས་པའི་ཆེ་བའི་དོན་ནི་ཐེག་ཆེན་རང་གི་ཐུན་མོང་མ་ཡིན་པའི་ཡུལ་སྤྲོས་པ་མཐའ་དག་བཀག་པའི་འགོག་པ་ཐོས་བསམ་གྱིས་ཤེས་པ་ཚོགས་སྦྱོར་ནས་ཡོད། མངོན་སུམ་དུ་ཤེས་པ་ས་དང་པོ་ནས་ཡོད་ཀྱང། དེའི་ཆེ་བ་ནི་མཚན་འཛིན་སླར་མི་སྐྱེ་བའི་ཆོས་ཅན་དུ་བྱེད་པའི་ནུས་པ་ཡིན་ལ་དེ་ས་བདུན་པ་ནས་ཐོབ་པས་ཟིལ་གྱིས་གནོན་ཅེས་པའི་དོན་ཏོ། །ཞེས་ཀུན་མཁྱེན་གོ་རམས་པས་འཇུག་པའི་དཀའ་འགྲེལ་ལས་གསུངས་སོ།
Domain	ཆོས་ལུགས།