50647

མཁན་ཆེན་རྩི་འདུལ་བ་ཐུགས་རྗེ་བྱང་ཆུབ་ (1)

Part of speech

མིང་ཚིག

Definition

དུས་རབས་བཅུ་གཉིས་པའི་སྨད་དུ་འཁྲུངས། གཞོན་དུས་ནས་རབ་ཏུ་བྱུང་། ཕར་ཕྱིན་ལ་ཤིན་ཏུ་མཁས་པར་གྱུར། གཙུག་ལག་ཁང་བཞེངས་ཤིང་དགེ་འདུན་སྡེ་གཙུགས་པར་མཛད། གྲྭ་རྒྱུགས་དང་ཚུལ་འཛུགས་ལ་སོགས་པ་མཛད་པས་དགེ་འདུན་སྟོང་ལྷག་ཙམ་འདུས། ཐུགས་དམ་གྱི་མཐིལ་སྨན་བླ་དང་སྒྲོལ་མ་ལ་མཛད་པས་ཞལ་གཟིགས། ཞང་སྟོན་དགྲ་འཇིགས་དང་མཇལ། སྤྱན་རས་གཟིགས་བཅུ་གཅིག་ཞལ་གྱི་ལུང་དང་། ལག་ལེན་སྒྲུབ་ཐབས་བསྙེན་ཚད་དང་བཅས་པ་ཞུས། བསྙུང་གནས་སྟོང་ཕྲག་གཅིག་གི་དམ་བཅའ་བླ་མ་ཞང་སྟོན་དགྲ་འཇིགས་ལ་ཕུལ། དེ་ལྟར་ཉམས་ལེན་ཡང་མཛད་པས་ས་ཟླ་ཚེས་བཅུ་དྲུག་ཉིན་ཐུགས་རྗེ་ཆེན་པོའི་ཞལ་གཟིགས། འགྲོ་དོན་མཛད་དེ་དགོངས་པ་ཆོས་དབྱིངས་སུ་གཤེགས། སློབ་མ་མཆོག་ཏུ་གྱུར་པ་ནི་ལྡོག་ལོང་བ་ཤཱཀྱ་བྱང་ཆུབ་ཡིན། ཐུགས་རྗེ་ཆེན་པོ་དཔལ་མོ་ལུགས་ཀྱི་བརྒྱུད་པའི་གདམས་རྒྱུན་འཛིན་མཁན་ཡིན།