50918

མཁས་པ་ལ་སྒྲུབ་ངག་འགོད་པ་ (1)

Part of speech	མིང་ཚིག
Definition	མཁས་པ་ལ་ནི་གཏན་ཚིགས་ཉིད། །གཏན་ཚིགས་བརྗོད་པས་ཁྱབ་པ་དྲན་ནུས་པར་ཤེས་པ་དེ་ལ་གཏན་ཚིགས་ཙམ་གྱིས་གྲུབ་སྟེ། དཔེར་ན་བྱས་པ་ལ་མི་རྟག་པར་ཁྱབ་པར་སྨྲ་བའི་རྒོལ་བ་མཁས་པ་དེ་ལ་འོ་ན་སྒྲ་ཡང་བྱས་སོ་ཞེས་བརྗོད་པས་འགྲུབ་བོ། །ཚོགས་སུ་ཁྱབ་པ་ངག་ཏུ་མི་བརྗོད་ན་མཁས་སུ་ཟིན་ཡང་སྐབས་དེར་སྒྲུབ་པའི་ངག་རྫོགས་པར་སྦྱར་ཏེ། མ་རྫོགས་ན་ཀླན་ཀར་འགྱུར་བའི་ཕྱིར་རོ། །དེས་མཚོན་ནས་ཕྱོགས་ཆོས་ཁར་འབྱིན་པ་ལ་ཁྱབ་པ་ཙམ་བརྗོད་པའང་སྐྱོན་མེད་པར་ཤེས་པར་བྱའོ། །དེས་ན་ཕྱིར་རྒོལ་གྱི་བློའི་བྱེ་བྲག་གིས་གསུམ་དུ་འགྱུར་ཏེ། ཕྱིར་རྒོལ་ཕྱོགས་ཆོས་ཁྱབ་པ་གཉིས་ཀ་དྲན་རུང་མེད་པ། གཉིས་ཀ་དྲན་པ། དྲན་རུང་ཡོད་ཀྱང་མ་དྲན་པའོ། །དེ་ལ་སྔ་མ་གཉིས་ནི། བསྒྲུབ་པ་འགོད་པའི་ཡུལ་མ་ཡིན་ཏེ། དང་པོ་ལ་མི་ནུས། གཉིས་པ་ལ་མི་དགོས་པའི་ཕྱིར་རོ། །གསུམ་པ་ཕྱོགས་ཆོས་ཁྱབ་པ་གཉིས་ཀ་མ་དྲན་པ་ལ་ཆོས་མཐུན་མི་མཐུན་གྱི་ངག་དང་། ཕྱོགས་ཆོས་མི་ཤེས་པ་ལ་ཕྱོགས་ཆོས་དང། ཁྱབ་པ་མི་ཤེས་པ་ལ་ཁྱབ་པ་བརྗོད་པའང་དོན་གྱིས་ཤེས་པར་བྱའོ། །ཞེས་འཇམ་མགོན་ས་པཎ་གྱི་རིགས་གཏེར་རང་འགྲེལ་ལས་སོ། །བྱས་མི་རྟག་གམ། མེ་དུའི་འབྲེལ་བ་ལ་མཁས་པའི་གང་ཟག་ལ། ཁྱབ་པ་བརྗོད་མི་དགོས་ཀྱི་སྒྲ་ཡང་བྱས་སོ་ཞེས་སམ། ལ་ལ་དུ་བ་ཡོད་དོ་ཞེས་གཏན་ཚིགས་ཉིད་བརྗོད་པས་གྲུབ་ལ། དེ་བཞིན་དུ་ཕྱོགས་ཆོས་ངེས་ན་ཁྱབ་པ་རྐྱང་པ་བརྗོད་པའང་དོན་གྱིས་རིག་པར་བྱ་ལ། རྩོད་པའི་སྐབས་སུ་ཐམས་ཅད་ངག་ཚང་བར་སྦྱར་དགོས་ཏེ། དེ་ལྟ་མིན་ན་ཀླན་ཀར་འགྱུར་བའི་ཕྱིར་རོ། །དེའང་རྟགས་བསྟན་བྱའི་ཡུལ་ནི། ཕྱིར་རྒོལ་ཕྱོགས་ཆོས་དང་ཁྱབ་པ་གཉིས་ཀ་དྲན་རུང་མེད་པ་ལ། རྟགས་བསྟན་ཀྱང་རྗེས་དཔག་སྐྱེ་བའི་ནུས་པ་མེད་པས། ཚུལ་གསུམ་ཚོགས་པའམ་གང་རུང་མ་ཤེས་དྲན་རུང་དུ་ཡོད་པའི་ངོར་སྟོན་པ་ཡིན་ནོ། །ཞེས་ཀུན་མཁྱེན་རོང་སྟོན་གྱི་རིགས་གཏེར་རྣམ་བཤད་ལས་སོ། །ཚུལ་གསུམ་ཤེས་པའི་མཁས་པ་ལ་སྦྱོར་ཚུལ་ནི། ངག་ཉུང་རྒྱས་གཉིས་ཀ་སྦྱར་མི་དགོས་ཏེ། གཏན་ཚིགས་ཉིད་བརྗོད་པའི་ཚིག་ཉུང་ངུ་དེ་བཀོད་པས་ཆོག་པའི་ཕྱིར། དེ་ལའང་ཚུལ་གསུམ་ཀ་བརྗོད་པ་དང་། རེ་རེ་བརྗོད་པའོ། །ཕྱི་མ་དེ་ལའང་ཕྱོགས་ཆོས་རྐྱང་པ་བརྗོད་པ་དང་། ཁྱབ་པ་རྐྱང་པ་བརྗོད་པའོ། །དེ་ལྟར་གསུམ་དུ་འབྱེད་པའི་ཤེས་བྱེད་ཀྱང་། རྒོལ་བ་མཁས་པ་དེ་ལ་ཚུལ་གསུམ་ཀ་དྲན་ལམ་ན་མེད་པ་དང་། གང་རུང་རེ་རེ་དྲན་ལམ་ན་མེད་པ་གཉིས་དང་། ཕྱི་མ་ལའང་ཕྱོགས་ཆོས་མེད་ལ་ཁྱབ་པ་དྲན་ལམ་ན་ཡོད་པ་དང་། ཁྱབ་པ་མེད་ལ་ཕྱོགས་ཆོས་དྲན་ལམ་ན་ཡོད་པའི་དབྱེ་བས་གསུམ་ཡོད་པས་སོ། །ཞེས་པཎ་ཆེན་ཤཱཀ་མཆོག་གི་སྡེ་བདུན་རོལ་མཚོ་ལས་སོ། །
Domain	ཚད་མ།