5141

ཁས་བླངས་དང་རང་ཚིག་གི་བསལ་བ་ (1)

Part of speech	མིང་ཚིག
Definition	སློབ་དཔོན་ངག་གི་དབྱེ་བར་བཞེད། ཅེས་བྱ་བ། ངག་གི་དབྱེ་བ་སྟེ་ཞེས་པས་ཁས་བླངས་པ་ནི་སྔར་དམ་བཅས་པ་དང་ཕྱིས་བརྗོད་པ་གཉིས་འགལ་བ་སྟེ། དཔེར་ན་སྔར་མར་དམ་བཅས་ནས་ཕྱིས་མོ་གཤམ་དུ་བརྗོད་པ་བཞིན་ནོ། །རང་ཚིག་ནི་དམ་བཅས་པའི་དོན་དེ་ཉིད་ལ་དཔགས་ན་འགལ་བ་སྟེ། དཔེར་ན་རྗེས་དཔག་ཚད་མ་མ་ཡིན་ཞེས་བརྗོད་པ་ལྟ་བུའོ། །དེ་ནི་སྤྱི་གཞལ་བྱ་བདེན་པ་བཀག་ནས་བྱེ་བྲག་རང་གི་ཚིག་གིས་གཞལ་བྱ་ཁས་ལེན་པས་རང་ཚིག་གི་བསལ་བའོ། །ཀུན་ལས་བཏུས་སུ་གཉིས་ཀའང་། །དཔེ་གཅིག་གིས་བསྟན། གཞལ་བྱའི་དོན་ཅན་གྱི་ཚད་མ་དག་མེད་དོ་ཞེས་ཁས་བླངས་དང་རང་ཚིག་གཉིས་ཀ་དཔེ་གཅིག་གིས་གསུངས་ལ། རིགས་པའི་སྒོར། ལུང་ལ་དཔེར་བརྗོད་གཞན་དུ་གསུངས། །དེའི་དགོངས་པ་ཆོས་ཀྱི་གྲགས་པས་ཆོས་ནི་(ཚེ)་འཕོས་ནས་བདེ་བ་སྟེར་བར་བྱེད་པ་མ་ཡིན་ནོ། །ཞེས་གསལ་བར་གསུངས་སོ། །ཞེས་འཇམ་མགོན་ས་པཎ་གྱི་རིགས་གཏེར་རང་འགྲེལ་ལས་སོ། ། སློབ་དཔོན་ཕྱོགས་ཀྱི་གླང་པོ་ནི། ངག་གི་དབྱེ་བར་བཞེད་པ་ཡིན་ཏེ། ངག་དེའི་དངོས་བསྟན་གྱི་དོན་སྔ་ཕྱིར་འགལ་ན་ཁས་བླངས་འགལ་བ་དང་། དངོས་ཤུགས་འགལ་ན་རང་ཚིག་འགལ་ཞེས་འཇོག་པའི་ཕྱིར། མཚན་གཞི་ནི། ཁོ་བོའི་མ་མོ་གཤམ་མོ། །ཞེས་དང་། རྗེས་དཔག་ཚད་མ་མ་ཡིན་ནོ། །ཞེས་བརྗོད་པ་ལྟ་བུའོ། །དེ་གཉིས་ཀ་ཡང་། གཞལ་བྱའི་གནས་དང་པོ་གཉིས་ཀྱི་སྐབས་སུ་ནི་གེགས་བྱེད་ཙམ་ཡིན་གྱི། གནོད་བྱེད་མ་ཡིན་ཏེ། མ་ཡིན་ནོ་ཞེས་པའི་ཚིག་དེས་མོ་གཤམ་ཡིན་པ་ལ་གནོད་ན། ཚིག་དེས་མ་ཡིན་པ་དེ་གྲུབ་པར་འགྱུར་ལ། དེ་ལྟ་ན་མངོན་སུམ་གྱིས་གྲུབ་པའི་དོན་ལ་གཏན་ཚིགས་འཇུག་པར་འགྱུར་རོ། །དེ་བཞིན་དུ་རྗེས་དཔག་ཚད་མ་མ་ཡིན་ཞེས་བརྗོད་པའི་ཚིག་དེས། རྗེས་དཔག་ཚད་མ་ཡིན་པ་ལ་གནོད་ན། དེས་དེ་མ་ཡིན་པར་གྲུབ་པར་འགྱུར་ལ། དེ་ལྟ་ན། དངོས་སྟོབས་ཡུལ་ལ་ཕྱོགས་ཚིག་སྒྲུབ་བྱེད་དུ་ཐལ་བར་འགྱུར་རོ། །ཚད་མ་ཀུན་ལས་བཏུས་སུ་ནི། ལུང་དང་རང་ཚིག་དང་འགལ་བ་གཉིས་ཀ་ཡང་། དཔེ་གཅིག་གིས་བསྟན་པ་ཡིན་ཏེ། དཔེ་གཅིག་གི་སྟེང་དུ་གཏན་ལ་ཕབ་ཏུ་རུང་བ་ལྟར། གཞལ་བྱའི་རྟེན་ཅན་གྱི་ཚད་མ་དག་མེད་དོ། །ཞེས་པའི་དཔེར་བརྗོད་གཅིག་ཁོ་ན་བཤད་པའི་ཕྱིར་རོ། །རིགས་སྒོ་ནས། ལུང་དང་འགལ་བ་ལ་དཔེར་བརྗོད་གཞན་དུ་གསུངས་ཏེ། སྦྱིན་སོགས་ཚེ་འཕོས་ནས་བདེ་བ་སྟེར་བྱེད་མ་ཡིན་པ་དེ། དེའི་དཔེར་བརྗོད་དུ་དམ་བཅས་ནས་གསུངས་པའི་ཕྱིར། །ཞེས་པཎ་ཆེན་ཤཱཀྱ་མཆོག་གི་སྡེ་བདུན་རོལ་མཚོ་ལས་སོ། །
Domain	ཚད་མ།