5259

ཁུ་སྟོན་བརྩོན་འགྲུས་གཡུང་དྲུང་ (1)

Part of speech

མིང་ཚིག

Definition

རབ་བྱུང་ཡར་སྔོན་གྱི་ལྕགས་ཕག་ཕྱི་ལོ་ ༡༠༡༡ ལོར་ཡུལ་ཡར་ལུང་དུ་འཁྲུངས། གྲུ་མེར་ཚུལ་ཁྲིམས་འབྱུང་གནས་ཀྱི་དྲུང་དུ་རབ་ཏུ་བྱུང༌། རྔོག་ལེགས་པའི་ཤེས་རབ་དང་། འབྲེ་ཤེས་རབ་འབར་རྣམས་འགྲོགས་ནས་ཁམས་ཕྱོགས་སུ་ཕེབས། ཇོ་བོ་སེ་བཙུན་གྱི་ཞབས་ལ་གཏུགས་ཏེ་ཆོས་མང་དུ་གསན། འབྲོམ་སྟོན་པ་རྒྱལ་བའི་འབྱུང་གནས་མངའ་རིས་སུ་ཕེབས་པའི་ཕྱི་ལོར་དབུས་སུ་ཆིབས་ཁ་བསྒྱུར། ཇོ་བོ་རྗེ་དཔལ་ལྡན་ཨ་ཏི་ཤའི་ཞབས་ལ་གཏུགས། བྱང་ཆུབ་ལམ་སྒྲོན་གཙོར་མཛད་པའི་མདོ་སྔགས་ཀྱི་ཆོས་སྐོར་མང་དུ་གསན། ཐང་པོ་ཆེ་ནས་སློབ་མ་རྣམས་ལ་ཕར་ཕྱིན་གྱི་འཆད་ཉན་མཛད། གྲྭ་པ་ཡང་མང་དུ་འདུས། དྭགས་པོ་དབང་རྒྱལ་གྱིས་ཀྱང་ཁོང་གི་ཞབས་ལ་གཏུགས་ཏེ། ཕར་ཕྱིན་ལེགས་པར་སྦྱངས། གདན་ས་དབོན་པོ་འབྱུང་གནས་རྒྱལ་མཚན་ལ་གཏད། དགུང་ལོ་རེ་ལྔ་པ་རབ་བྱུང་དང་པོའི་ཤིང་ཡོས་ཕྱི་ལོ་ ༡༠༧༥ ལོར་སྐུ་གཤེགས། གསུང་རྩོམ་ནི་བོད་ཀྱི་ལོ་རྒྱུས་ལོག་གནོན་ཆེན་མོ་ཞེས་ཁ་བྱང་དུ་འཁོད་པ་ཞིག་དཔའ་བོ་གཙུག་ལག་ཕྲེང་བས་གཟིགས་མྱོང་ཚུལ་ཆོས་འབྱུང་མཁས་པའི་དགའ་སྟོན་བོད་ཀྱི་རྒྱལ་རབས་ཀྱི་མཇུག་ཏུ་གསུངས་འདུག ཁུ་རྔོག་འབྲོམ་གསུམ་ཞེས་གྲགས་ཆེ་བའི་ཁུ་སྟོན་བརྩོན་འགྲུས་གཡང་དྲུང་ཡིན།