52661

མཐའ་དང་པོ་བཀག་པའི་དགོས་པ་ (1)

Part of speech	མིང་ཚིག
Definition	མདོ། དབུ་མ། སྡུག་བསྔལ་སྤང་བའི་དགོས་པ་ནི། ཆོས་ཕུང་པོ་ལ་བདེན་པར་འཛིན་པའི་བདེན་འཛིན་ཡོད་ན་དངོས་འབྲེལ་གང་ཟག་གི་བདེན་འཛིན་ངེས་པར་འབྱུང། དེ་ཉིད་ཡན་ལག་བཅུ་གཉིས་ཀྱི་ཐོག་མའི་མ་རིག་པ་ཡིན་ཞིང་། དེ་ལས་ཡན་ལག་ཕྱི་མ་རྣམས་འབྱུང་བས་སྡུག་བསྔལ་གྱི་རྒྱུའི་གཙོ་བོ་ནི་ཆོས་ལ་བདེན་པར་འཛིན་པའི་བདེན་འཛིན་ཡིན་ཏེ། རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོན་ན་ཡང་ལས་ཏེ། །དེ་ལས་ཀྱང་ནི་སྐྱེ་བ་ཡིན། །ཞེས་གསུངས་པས་སོ། །དབུ་མའི་གཞུང་ལས་བཤད་པའི་མཐའ་དང་པོ་འགོག་པའི་རིགས་པ་ལ་བརྟེན་ནས་རྟེན་ཅིང་འབྲེལ་བར་འབྱུང་བ་སྐྱེ་མེད་ཀྱི་དོན་རྟོགས་ན་གང་ཟག་གི་བདག་འཛིན་འགགས་ཤིང། དེས་ཉོན་མོངས་པ་མི་བསྐྱེད། དེས་ལས་མི་སོག་པས་འབྲས་བུ་སྡུག་བསྔལ་ཀྱི་ཕུང་པོ་མཐའ་དག་འགགས་ཏེ། རྩ་བར། མ་རིག་འགགས་པར་གྱུར་ན་ནི། །འདུ་བྱེད་རྣམས་ཀྱང་འབྱུང་མི་འགྱུར། །མ་རིག་འགགས་པར་འགྱུར་བ་ནི། །ཤེས་པས་དེ་ཉིད་བསྒོམས་པས་སོ། །ཞེས་གསུངས་སོ། །བྱང་ཆུབ་ཐོབ་པའི་དགོས་པ་ནི། བྱང་ཆུབ་ཐོབ་པར་འདོད་པ་དག་གིས་བདེན་པ་དགག་དགོས་ཏེ། ཉན་ཐོས་ཀྱི་བྱང་ཆུབ་ཐོབ་པ་ལ་ཉེར་ལེན་གྱི་ཕུང་པོའི་སྟེང་དུ་བདེན་པ་དགག་དགོས། རང་རྒྱལ་གྱི་བྱང་ཆུབ་ཐོབ་པ་ལ་དེའི་སྟེང་དུ་གཟུང་བ་ཕྱི་རོལ་གྱི་དོན་དང་ཀུན་ནས་ཉོན་མོངས་ཀྱི་ཆོས་སོགས་ལ་བདེན་པ་དགག་དགོས། ཐེག་ཆེན་གྱི་བྱང་ཆུབ་ཐོབ་པ་ལ་མཐའ་བཞི་ཆར་གྱི་སྤྲོས་པ་དགག་དགོས་པའི་ཕྱིར་རོ། །དེ་དག་གི་རྒྱུ་མཚན་ཡང་ཉེར་ལེན་གྱི་ཕུང་པོ་བདེན་མེད་དུ་མ་རྟོགས་ན་གང་ཟག་གི་བདག་མེད་རྟོགས་པར་མི་འགྱུར། གཟུང་བ་ཕྱི་རོལ་གྱི་དོན་དང་ཀུན་ནས་ཉོན་མོངས་ཀྱི་གཟུང་བ་སོགས་བདེན་མེད་དུ་མ་རྟོགས་ན་རང་རྒྱལ་གྱི་ལམ་གྱི་ཁྱད་ཆོས་མི་འགྲུབ། མཐའ་བཞིའི་སྤྲོས་པ་མ་བཀག་ན་ཐེག་ཆེན་ཐུན་མོང་མ་ཡིན་པའི་ལྟ་བ་མི་འགྲུབ་པའི་ཕྱིར་རོ། །ཞེས་ཀུན་མཁྱེན་གོ་རམས་པས་དབུ་མའི་སྤྱི་དོན་ལས་གསུངས་སོ། །
Domain	ཆོས་ལུགས།