52681

མཐའ་བཞི་སྐྱེ་འགོག་གི་དམ་བཅའ་ (1)

Part of speech	མིང་ཚིག
Definition	མདོ། དབུ་མ། དབུ་མའི་བསྟན་བཅོས་ལས། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང། །སྐྱེ་བ་ནམ་ཡང་ཡོད་མ་ཡིན། །ཞེས་ཉེ་བར་བཀོད་པ་ཡིན་ནོ། །འདིར་འོག་གི་ཡོད་པ་མ་ཡིན་ཞེས་པ་བདག་ལས་ཞེས་སོགས་བཞི་དང་འབྲེལ་བས་དམ་བཅའ་སྟོན་ཏེ། ཕྱི་ནང་གི་དངོས་པོ་གང་དག་ཡུལ་དུས་གྲུབ་མཐའ་གང་ནའང་བདག་ལས་སྐྱེ་བ་ནམ་ཡང་སྲིད་པ་མ་ཡིན་ནོ་ཞེས་སོགས་བཞི་སྦྱར་བར་བྱའོ། །ཞེས་ཀུན་མཁྱེན་གོ་རམས་པས་འཇུག་པའི་དཀའ་འགྲེལ་ལས་གསུངས་སོ། ། ཕྱི་ནང་གི་གྲུབ་མཐའ་སྨྲ་བ་རྣམས་ཀྱི་ལོག་རྟོག་གི་གཉེན་པོར་དབུ་མ་པས་དམ་བཅའ་ཆེན་པོ་བཞི་མཛད་པ་ཡིན་ཏེ། གྲངས་ཅན་གྱི་གཉེན་པོར་བདག་སྐྱེ་འགོག་པའི་དམ་བཅའ། རང་སྡེ་སེམས་ཙམ་པ་མན་ཆད་ཀྱི་གཉེན་པོར་གཞན་སྐྱེ་འགོག་པའི་དམ་བཅའ། གཅེར་བུ་པའི་གཉེན་པོར་གཉིས་ཀ་ལས་སྐྱེ་བ་འགོག་པའི་དམ་བཅའ། སྤྱོད་པ་བའི་གཉེན་པོར་རྒྱུ་མེད་ལས་སྐྱེ་བ་འགོག་པའི་དམ་བཅའ་རྣམས་མཛད་པ་ཡིན་པའི་ཕྱིར་རོ། །ཞེས་པཎ་ཆེན་ངག་ཆོས་ཀྱིས་དབུ་མ་སྤྱི་དོན་ལས་གསུངས་སོ། །
Domain	ཆོས་ལུགས།