52682

མཐའ་བཞི་སྐྱེ་འགོག་གི་དམ་བཅའི་གྲངས་ངེས་ (1)

Part of speech	མིང་ཚིག
Definition	མདོ། དབུ་མ། ཅིའི་ཕྱིར་དམ་བཅའ་བཞིར་གྲངས་ངེས་ཤེ་ན། ལྷན་སྐྱེས་ཀྱི་བློས་སྐྱེ་བ་རང་བཞིན་གྱིས་ཡོད་པར་འཛིན་པ་ལྟར་དངོས་པོར་སྨྲ་བ་རྣམས་ཀུན་བརྟགས་ཀྱི་བློས་ཀྱང་འདོད་ལ་འདོད་ཚུལ་རྒྱང་ཕན་པ་དང་། གཙོ་བོ་དབང་ཕྱུག་དང་བཅས་པར་སྨྲ་བའི་གཅེར་བུ་པ་དང་། གྲངས་ཅན་པ་དང་། རང་གི་སྡེ་པ་དངོས་པོར་སྨྲ་བ་རྣམས་ཀྱིས་འདོད་ཚུལ་བཞི་པོ་འདི་ཁོ་ནར་ངེས་ཤིང་། ལྔ་པ་མེད་པའམ། ལྷན་སྐྱེས་ཀྱི་ཞེན་ཡུལ་ཉིད་འགོག་པའི་ཚེ་སྐྱེ་བའི་དོགས་པ་ལ་མཐའ་བཞི་སྲིད་ཅིང་། ལྔ་པ་མི་སྲིད་པས་དོགས་པའི་མཐའ་དགག་པའི་དམ་བཅའ་བཞི་མཛད་པ་ཡིན་ཏེ། འདི་ལྟར་སྐྱེ་བ་རྒྱུ་ལ་ལྟོས་མི་ལྟོས་གཉིས་ལས་ཕྱི་མ་རྒྱུ་མེད་ཀྱི་ཕྱོགས་སུ་འདུས། དང་པོ་ལའང་རྒྱུ་དེ་འབྲས་བུ་ལས་ཐ་དད་མི་དད་གཉིས་སུ་ངེས་ལ། དེ་ལའང་ཐ་དད་པ་ཁོ་ན་ལས་སྐྱེ་ན་གཞན་སྐྱེའི་ཕྱོགས་སུ་འདུས། ཐ་མི་དད་པ་ཁོ་ན་ལས་སྐྱེ་ན་བདག་སྐྱེའི་ཁོངས་སུ་འདུས། གཉིས་ཀ་ལས་སྐྱེ་ན་གཉིས་ཀ་ལས་སྐྱེ་བའི་ཁོངས་སུ་འདུས་ཤིང་། དེ་ལས་གཞན་པའི་མཐའ་མི་སྲིད་པའི་ཕྱིར་རོ། །ཞེས་ཀུན་མཁྱེན་གོ་རམས་པས་དབུ་མའི་སྤྱི་དོན་ལས་གསུངས་སོ། །
Domain	[ཆོས་ལུགས།, ལྟ་གྲུབ།]