52788

མཐར་ཐུག་གི་ཐེག་པ་ (1)

Part of speech	མིང་ཚིག
Definition	མདོ། དབུ་མ། བཅོམ་ལྡན་འདས་ཁྱོད་ཀྱིས་འགྲོ་བ་རྣམས་ལ་ཐེག་པ་དབྱེར་མེད་གཅིག་བསྟན་གྱི་གཉིས་དང་གསུམ་ལ་སོགས་པ་མ་ཡིན་ནོ། །དེ་གང་ཞེ་ན། གཞན་དང་མི་མཉམ་པ་བླ་ན་མེད་པ་སངས་རྒྱས་ཀྱི་ཐེག་པའོ། །འདིར་ཐེག་པ་ནི་གཉིས་ཏེ། འདིས་བགྲོད་པར་བྱེད་པ་ལམ་གྱི་ཐེག་པ་དང་། འདིར་བགྲོད་པར་བྱ་བ་འབྲས་བུའི་ཐེག་པའོ། །དེ་ལ་དང་པོ་ནི་འབྲས་བུ་ཐོབ་པའི་གེགས་དྲི་མ་སེལ་བྱེད་ཡིན་ལ། དེའང་དུ་མ་ཡོད་པ་མ་ཡིན་ཏེ། དེ་ཁོ་ན་ཉིད་མ་རྟོགས་པར་དྲི་མ་སེལ་མི་ནུས་ལ། དེ་ཁོ་ན་ཉིད་ལ་དབྱེ་བ་མེད་པའི་ཕྱིར་རོ། །གཉིས་པ་ནི་དྲི་མ་མཐའ་དག་དང་བྲལ་བའི་ཆོས་ཉིད་མངོན་སུམ་དུ་བྱས་པའི་ཡེ་ཤེས་ཡིན་ལ། །དེའང་ཐ་དད་མེད་དེ། ཆོས་ཀྱི་དབྱིངས་ལ་དབྱེ་བ་མེད་པའི་ཕྱིར་རོ། །དེའི་ཕྱིར་རྒྱུ་དང་འབྲས་བུའི་ཐེག་པ་གཅིག་ཉིད་ཡིན་ནོ་ཞེས་རེད་མདའ་བས་དབུ་འཇུག་རྣམ་བཤད་ལས་གསུངས་སོ། ། འདི་ནི་ཐེག་པ་གཅིག་ཞེས་པའི་དོན་ཏེ་ཡུལ་ཆོས་ཐམས་ཅད་ཀྱི་གནས་ལུགས་རྟོགས་ཚུལ་མི་འདྲ་བས་གཞན་དང་གཞན་དུ་རྣམ་པར་འགྱུར་བ་དང་རིགས་མི་འདྲ་བའི་དབྱེ་བ་ཡང་མེད་ཅིང་ཡུལ་ཅན་ཡེ་ཤེས་ཀྱང་རྟོགས་པ་མཐར་ཐུག་པའི་ཚེ་རྟོགས་ཚུལ་མི་འདྲ་བའི་དབྱེ་བ་མེད་པས་མཐར་ཐུག་ཐེག་པ་གཅིག་ཏུ་བསྟན་ནོ། །ཞེས་ཀུན་མཁྱེན་གོ་རམས་པས་འཇུག་པའི་དཀའ་འགྲེལ་ལས་གསུངས་སོ། ། མཐར་ཐུག་ཐེག་པ་གཅིག་ཁོ་ན་ཡིན་ཏེ། རྒྱུ་མཚན་ནི། དེ་ཁོ་ན་ཉིད་མ་རྟོགས་པར་ཉོན་མོངས་སྤོང་བའི་ཐབས་མེད་ཅིང་། དེ་ཡང་ཆོས་ཅན་ཇི་སྙེད་པའི་དབྱེ་བ་མཐའ་ཡས་ཀྱང་། དེ་ཁོ་ན་ཉིད་ཐམས་ཅད་རང་བཞིན་གཅིག་ཡིན་པ་ལྟར། ཡུལ་ཅན་ཡེ་ཤེས་ཀྱང་རང་བཞིན་གཅིག་ཡིན་པས་མཐར་ཐུག་པ་གཅིག་དང་། ལམ་གཅིག་དང་བགྲོད་པ་གཅིག་ཡིན་ནོ། །དེ་སྐད་དུ་མདོ་ལས། འོད་སྲུང་ཆོས་ཐམས་ཅད་མཉམ་པ་ཉིད་དུ་རྟོགས་ན་མྱ་ངན་ལས་འདའ་བ་ཡིན་ལ། དེ་ཡང་གཅིག་ཡིན་གྱི། གཉིས་དང་གསུམ་ནི་མ་ཡིན་ནོ། །དེས་ན་ཐེག་པ་ཡིན་ན། མཐར་ཐུག་སངས་རྒྱས་ཀྱི་ཐེག་པ་ཡིན་པས་ཁྱབ། ལམ་ཡིན་ན། མཐར་ཐུག་སངས་རྒྱས་ཀྱི་ལམ་ཡིན་པས་ཁྱབ། མྱང་འདས་ཡིན་ན། མཐར་ཐུག་གི་ཚེ་སངས་རྒྱས་ཀྱི་མྱང་འདས་ཡིན་པས་ཁྱབ། ཅེས་ཁས་ལེན་དགོས་སོ་ཞེས་པཎ་ཆེན་ངག་ཆོས་ཀྱིས་དབུ་མ་སྤྱི་དོན་ལས་གསུངས་སོ། །
Domain	ཆོས་ལུགས།