53504

མདོ་ཡི་དངོས་ཤུགས་ཀྱི་རྟེན་འབྲེལ་འཕེན་འགྲུབ་བརྒྱད་ (1)

Part of speech	མིང་ཚིག
Definition	མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་ལ་འཕེན་འགྲུབ་ཀྱི་ཡན་ལག་བརྒྱད་ཚང་དགོས་ཏེ། དེ་ལ་འཁོར་བས་བསྡུས་པའི་རྒྱུ་འབྲས་ཆ་གཉིས་ངེས་པར་དགོས་པར་གང་ཞིག དེ་རེ་རེའི་སྟེང་དུ་ཡང་འཕེན་འགྲུབ་ཀྱི་ཡན་ལག་བཞི་བཞི་ཚང་བའི་ཕྱིར། དེ་ལྟར་བརྒྱད་ཡོད་པ་ལས་འཕེན་བྱེད་ཀྱི་རྒྱུ་གཅིག་མ་རིག་པ། འདུ་བྱེད་རྣམ་པར་ཤེས་པ་གསུམ་གྱི་སྐབས་སུ་དངོས་སུ་བསྟན། གཅིག་སྲེད་ལེན་སྲིད་པ་གསུམ་གྱི་སྐབས་སུ་ཤུགས་ལ་བསྟན། འཕངས་པའི་འབྲས་བུ་གཅིག་མིང་གཟུགས་ནས་ཚོར་བའི་བར་དུ་དངོས་སུ་བསྟན། གཅིག་སྐྱེ་བ་དང་རྒ་ཤི་གཉིས་ཀྱི་སྐབས་སུ་ཤུགས་ལ་བསྟན། འགྲུབ་བྱེད་ཀྱི་རྒྱུ་གཅིག་སྲེད་ལེན་སྲིད་པ་གསུམ་གྱིས་སྐབས་སུ་དངོས་སུ་བསྟན། གཅིག་མ་རིག་པ་སོགས་ཀྱི་སྐབས་སུ་ཤུགས་ལ་བསྟན། གྲུབ་པའི་འབྲས་བུ་གཅིག་སྐྱེ་བ་དང་རྒ་ཤི་གཉིས་ཀྱི་སྐབས་སུ་དངོས་སུ་བསྟན། གཅིག་མིང་གཟུགས་ནས་ཚོར་བའི་བར་ལ་ཤུགས་ལ་བསྟན་པ་ཡིན་ནོ། །ལུགས་འདི་ལ་ཡན་ལག་བཅུ་གཉིས་ཆ་གཅིག་གི་ཚོར་བའི་རྐྱེན་གྱིས་སྲེད་པ་འབྱུང་བ་དང་། ཚོར་བ་སྲེད་ལེན་གྱིས་གསོས་བཏབ་པའི་རྗེས་སུ་སྐྱེ་བ་ཕྱི་མ་ལ་འབྱུང་བ་མི་འགལ་ཏེ། དངོས་བསྟན་གྱི་ཚོར་བའི་རྐྱེན་གྱིས་སྲེད་པ་འབྱུང་ལ་ཤུགས་བསྟན་གྱི་ཚོར་བ་དེ་སྲེད་ལེན་གྱིས་གསོས་བཏབ་པའི་རྗེས་སུ་སྐྱེ་བ་ཕྱི་མ་ལ་འབྱུང་བའི་ཕྱིར་རོ་ཞེས་ཀུན་མཁྱེན་གོ་རམས་པའི་རྟེན་འབྲེལ་རབ་གསལ་ལས་སོ། །
Domain	ཆོས་ལུགས།