54702

མར་པ་ལོ་ཙཱ་ (1)

Part of speech

མིང་ཚིག

Definition

སྒྲ་བསྒྱུར་མར་པ་ལོ་ཙཱ་ཆོས་ཀྱི་བློ་གྲོས་མཆོག་ནི། ལྷོ་བྲག་ཆུ་ཁྱེར་དུ། ཡབ་མར་པ་དབང་ཕྱུག་འོད་ཟེར་དང་། ཡུམ་སྐལ་ལྡན་སྐྱིད་གཉིས་ཀྱི་སྲས་སུ་ཆུ་བྱི་ ༡༠༡༢ ལོར་འཁྲུངས། སྐུ་ཆུང་དུས་ནས་འབྲི་ཀློག་མཁས་ཤིང་སྤྱོད་པ་གྱོང། དགུང་ལོ་བཅུ་གཉིས་ལ། འབྲོག་མིའི་མདུན་ནས་སྒྲ་བསླབས། གཉོས་ལོ་དང་འགྲོགས་ནས་བལ་ཡུལ་དུ་ཕེབས། བལ་པོ་ཕམ་ཐིང་པའི་མདུན་ནས་གདན་བཞི་གསན། སྒྲ་ཚད་གསོ་རིག་ལ་ཞར་ཆོས་མཛད། པེནྟ་ཏ་པ་ཆེན་པོས་རྒྱ་གར་དུ་ཁྲིད། དཔལ་ནཱ་རོ་པ་དང་མཇལ། དགྱེས་རྡོར་ལྷ་དགུའི་དབང་བསྐུར་བས། དབང་དུས་དེར་མཐོང་ལམ་རྟོགས། ཡེ་ཤེས་སྙིང་པོ་ལ་ཕ་རྒྱུད། ཞི་བ་བཟང་པོ་ལ་མ་རྒྱུད། མཻ་ཏྲི་པ་ལ་མཚན་བརྗོད་གསན། ལྕམ་ནི་གུ་མ་དང་། སིངྒ་ལི་པ། ཀུ་སཱ་ལི་སོགས། ཟླ་མེད་ཀྱི་བླ་མ་གཉིས། ཁྱད་པར་གྱི་གྲུབ་ཐོབ་ལྔ། སྣང་བ་འགྱུར་ངེས་ཀྱི་བླ་མ་བཅུ་གསུམ་དང་། རྒྱ་གར་དུ་ལན་གསུམ་བཅས། སྡོམ་པས་ལོ་བཅུ་དྲུག་ལྷག་ཙམ། ནཱ་རོ་པ་ལ་སོགས་པ་བསྟེན། བལ་པོར་ལན་ལྔ་ཕེབས་པར་བཤད། སྐུ་ཚེའི་སྨད་དུ་ལྷོ་བྲག་གྲོ་བོ་ལུང་དུ་གདན་ཆགས་ཏེ། བདག་མེད་མ་སོགས། ཇོ་མོ་བརྒྱད་ཁབ་ཏུ་བཞེས་པར། གཙོ་མོའི་སྲས་དར་མ་མདོ་སྡེ། ལྕམ་བཞི་ལ། སྲས་ཕོ་མོ་བདུན་ཙམ་འཁྲུངས་ཤིང་། དངོས་ཞེན་ཆེ་ཆེ་ལྟར་མཛད་པས། ཕལ་ཆེར་གྱིས་ཐ་མལ་པ་ལྟ་བུར་མཐོང་ཞིང་། ལས་ཅན་རྣམས་ཀྱིས་ནི། རྡོ་རྗེ་ཐེག་པའི་བླ་མར་ཤེས་ནས། སོ་སོའི་སྐལ་བའི་ལམ་སྟོན་མཛད་པ་ནི། རྔོག་ལ་དགྱེས་རྡོར། མ་ཧཱ་མཱ་ཡ། གདན་གཞི་རྩ་འགྲེལ་མན་ངག་བཅས་གནང་། མེས་སྟོན་ཚོན་པོ་ལ། བདེ་དགྱེས་གསང་གསུམ། མཱ་ཡ། སངས་རྒྱས་ཐོད་པ། མན་ངག་དང་བཅས་པ་གནང་། མཚུར་སྟོན་དབང་རྡོར་ལ། གསང་འདུས་ལུགས་གསུམ། རྩ་རྒྱུད་སྒྲོན་གསལ། རྒྱུད་ཕྱི་རྩ་འགྲེལ། བསྐྱེད་རྫོགས་ཀྱི་མན་ངག དགྱེས་རྡོར་སོགས་གནང་། མི་ལ་ལ། བདེ་དགྱེས་གསང་འདུས། གདན་བཞི། སངས་རྒྱས་ཐོད་པ། མཱ་ཡ་རྣམས་མཐར་ཕྱིན་པ་གནང་ཡང་། སྒྲུབ་བརྒྱུད་ཀྱི་བཀའ་བབས་པས། བརྒྱུད་འཛིན་རྒྱས་ཀྱང་། བཤད་རྒྱུན་བདེ་མཆོག་ལས་མ་དར། སྐུ་ཚེ་འདིར་ཀྱཻའི་རྡོ་རྗེའི་གོ་འཕང་མངོན་དུ་གྲུབ་པས། ཚོགས་ཀྱི་འཁོར་ལོའི་དུས་སུ་ཉིད་གཙོ་བོ་དང་། ཇོ་མོ་བརྒྱད་འཁོར་གྱི་ལྷ་མོ་བརྒྱད་དེ། ཀྱཻ་རྡོར་སྤྲུལ་པའི་ལྷ་དགུར་ལས་ཅན་ལ་དངོས་སུ་སྣང་བ་དང་། ས་ཐམས་ཅད་རྫོགས་ཀྱང་ས་བཅུ་པའི་ཚུལ་འཛིན། གྱ་དྲུག་པ་རབ་བྱུང་གཉིས་པའི་མེ་གླང་ ༡༠༩༧ ལོའི་རྟ་པ་ཟླ་བའི་ཚེས་བཅོ་ལྔ་ལ་བབས་པ་ན། བདག་མེད་མ་འོད་ཀྱི་གོང་བུར་གྱུར་པ་ཐུགས་ཀར་བསྡུས། སྤྱི་བོ་ནས་འོད་དང་བཅས། མཁའ་འགྲོའི་ཚོགས་ཀྱིས། རོལ་མོའི་སྒྲ་དང་མཆོད་པའི་སྤྲིན་བཅས། དགོངས་པ་མྱ་ངན་ལས་འདས་སོ། །སློབ་མའི་གཙོ་བོ། ཀ་ཆེན་བཞི་དང་། སྲས་དར་མ་མདོ་སྡེ། མར་པ་མགོ་ཡག དོལ་པ་གག་སྟོན། གྲའི་མེའུ་ཆུང་། ཆུ་གོང་དཔལ་ལེ། དགེ་བཤེས་ཁེ་གད། མཇལ་བ་ལ་སྔ་བ་ཀློག་སྐྱ། གཉལ་གྱི་ཤུད་ཀྱི་ལྦ་བ་ཅན། འཕྲང་གི་རྒྱ་སྟོན་ཞིག་པོ། གཙོང་རོང་རྒྱ་མཁར་གྱི་ཞང་སྟོན། ལྷོ་པ་ཏེ་སྒོམ། ཆོས་འབྲེལ་ཙམ་གྱི་སློབ་མ་ཙ་མི་ལོ་ཙཱ། མར་དོ། སྤུ་རེངས་ལོ་ཆུང་སོགས་མང་ངོ་། །