55134

མི་དགེ་བ་བཅུའི་ལས་ཀྱི་རྣམ་སྨིན་གྱི་འབྲས་བུ་ (1)

Part of speech	མིང་ཚིག
Definition	མདོ། མངོན་པ། མི་དགེ་བ་བཅུ་པོ་ཐམས་ཅད་ཀྱིས་ཀྱང་བདག་པོ་དང་རྒྱུ་མཐུན་པ་དང་རྣམ་པར་སྨིན་པའི་འབྲས་བུ་གསུམ་གསུམ་འབྱིན་པར་འདོད་དེ། དེ་ལ་མི་དགེ་བ་བཅུ་པོ་དེ་དག་ཆེན་པོས་དམྱལ་བ་དང་འབྲིང་གིས་དུད་འགྲོ་དང་ཆུང་ངུས་ཡི་དྭགས་སུ་རྣམ་པར་སྨིན་པར་འགྱུར་ཏེ་འདི་ནི་རྣམ་སྨིན་གྱི་འབྲས་བུའོ། །དེ་ལྟར་ཡང་མདོ་ལས། མི་དགེ་བ་ཀུན་ཏུ་བསྟེན་པ་དང་། གོམས་པར་བྱས་པ་དང་། ལན་མང་དུ་བྱས་པ་ཐམས་ཅད་ཀྱིས་དམྱལ་བ་དག་ཏུ་སྐྱེ་བར་འགྱུར་ཏེ་འདི་ནི་དེ་དག་གི་རྣམ་པར་སྨིན་པའི་འབྲས་བུ་ཡིན་ནོ་ཞེས་པ་དང་། རིན་པོ་ཆེའི་ཕྲེང་བ་ལས་ཀྱང་། མི་ཉིད་ལ་ནི་འབྲས་བུ་འདི། །ཀུན་གྱིས་དང་པོར་ངན་འགྲོའོ། །ཞེས་གསུངས་ཏེ། དེ་ལ་ཀུན་ཏུ་བསྟེན་པ་ནི་སྦྱོར་བའོ། །གོམས་པར་བྱས་པ་ནི་དངོས་སོ། །ལན་མང་དུ་བྱས་པ་ནི་མཇུག་སྟེ་དེ་དག་གསུམ་ག་ཚང་བ་ནི་ཆེན་པོ་ཡིན་ལ་གཉིས་ཚང་བ་ནི་འབྲིང་དང་གཅིག་ནི་ཆུང་ངུ་ཡིན་ནོ་ཞེས་ཤེས་པར་བྱའོ། །ལས་གདགས་པ་ལས་ཀྱང་། མི་དགེ་བ་བཅུ་པོ་དེ་དག་ཆེན་པོ་དང་འབྲིང་དང་ཆུང་ངུ་གསུམ་ལས་ཆེན་པོ་ཀུན་ཏུ་བསྟེན་ཞིང་བསྒོམས་ཏེ་མང་དུ་བྱས་པས་ནི་སེམས་ཅན་དམྱལ་བ་རྣམས་སུ་སྐྱེ་ལ། འབྲིང་གིས་ནི་དུད་འགྲོ་དང་། ཆུང་ངུས་ནི་ཡི་དྭགས་སུ་སྐྱེ་བར་འགྱུར་རོ། །དེ་དག་གི་ཆེ་ཆུང་ཉིད་ཇི་ལྟར་ཤེས་པར་བྱ་ཞེ་ན། ཀུན་ནས་དཀྲིས་པ་ཆུང་ངུ་དང་འབྲིང་དང་ཆེན་པོས་ཀུན་ནས་དཀྲིས་ཏེ་བྱེད་ན་གོ་རིམ་བཞིན་དུ་རྣམ་པར་སྨིན་པ་ཆུང་ངུ་དང་འབྲིང་དང་ཆེན་པོར་འགྱུར་རོ་ཞེས་བཤད་དོ། །སའི་དངོས་གཞི་ལས་ནི། ཆུང་ངུར་སྤྱད་པས་དུད་འགྲོར་སྐྱེ་བར་བཤད་དོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།