5551

ཁོང་ཁྲོས་འཇོམས་རྒྱུའི་དགེ་རྩ་ (1)

Part of speech	མིང་ཚིག
Definition	མདོ། དབུ་མ། བྱང་ཆུབ་ཏུ་མ་བསྔོས་པ་དང་། བདག་མེད་མངོན་སུམ་དུ་རྟོགས་པའི་ཤེས་རབ་ཀྱིས་མ་ཟིན་པ་རྣམས་ཡིན་ལ། བཅོམ་པའི་དོན་ནི་འབྲས་བུ་འབྱིན་པའི་ནུས་པ་མེད་པར་བྱས་པ་ཡིན་ལ། ས་བོན་བཅོམ་པ་ནི་མ་ཡིན་ཏེ། འཇིག་རྟེན་པའི་ལམ་གང་གིས་ཀྱང་སྤང་བྱའི་ས་བོན་སྤོང་མི་ནུས་པའི་ཕྱིར་རོ། །ཞེས་དང་། ཁོང་ཁྲོས་དགེ་བ་འཇོམས་པའི་ཚུལ་ནི། མི་བཟོད་པ་ལས་གཞན་དུ་གྱུར་པ་སྟེ། སྟོབས་ཆེ་བའི་སྡིག་པ་ཡོད་པ་མ་ཡིན་ཏེ། གང་གི་ཕྱིར་ན་བྱང་སེམས་བདག་ཉིད་ཆེན་པོ་དེས་རྒྱལ་སྲས་རྣམས་ལ་ཁྲོས་པ་ཡིས་སྦྱིན་པ་དང་། ཚུལ་ཁྲིམས་ལས་བྱུང་བའི་དགེ་བ་བསྐལ་པ་བརྒྱར་བསགས་པ་ཁོང་ཁྲོའི་བསམས་པ་སྐད་ཅིག་མ་གཅིག་གིས་འཇོམས་པར་བཤད་པ་དེའི་ཕྱིར། ཇི་སྐད་དུ། འཇམ་དཔལ་རྣམ་པར་རོལ་པའི་མདོ་ལས། འཇམ་དཔལ་ཁོང་ཁྲོ་བ་ཞེས་བྱ་བ་ནི། བསྐལ་བ་བརྒྱར་བསགས་པའི་དགེ་བ་འཇོམས་པ་དེའི་ཕྱིར། ཁོང་ཁྲོ་བ་ཞེས་བྱའོ། །ཞེས་འགྲེལ་པར་དྲངས་སོ། །འདིར་ཁོང་ཁྲོའི་རྟེན་ནི་བྱང་སེམས་སོ་སྐྱེར་ངེས་ཏེ། འགྲེལ་པར་བྱང་སེམས་བདག་ཉིད་ཆེན་པོ་ཞེས་གསུངས་པའི་ཕྱིར། ཁོང་ཁྲོའི་ཡུལ་ལ་ནི་བྱང་སེམས་ཡིན་མ་ཡིན་གཉིས་སུ་ཡོད་ལ། བྱང་སེམས་ཀྱིས་བྱང་སེམས་མ་ཡིན་པ་ལ་ཁྲོས་པས་ནི་བསྐལ་པ་བརྒྱར་བསགས་པའི་དགེ་བ་འཇོམས་མི་ནུས་ཏེ། རྒྱལ་སྲས་རྣམས་ལ་ཞེས་ཡུལ་ངེས་པར་བཟུང་བའི་ཕྱིར། ཡུལ་བྱང་སེམས་ལ་ཡང་ས་ཐོབ་མ་ཐོབ་གཉིས་ལས། དང་པོ་ལ་ཁྲོས་ན་བསྐལ་པ་བརྒྱ་དང་། གཉིས་པ་ལ་ཡང་ས་ཐོབ་ཙམ་དང་། སའི་ཁྱད་པར་གོང་མ་ཐོབ་པ་གཉིས་ལས། དང་པོ་ལ་ཁྲོས་ན་བསྐལ་པ་སྟོང་དང་། གཉིས་པ་ལ་ཁྲོས་ན་དེ་བས་ཀྱང་ཆེས་ལྷག་པའི་བསྐལ་པར་བསགས་པའི་དགེ་བ་འཇོམས་པ་དང། བྱང་སེམས་མ་ཡིན་པས་བྱང་སེམས་ལ་ཁྲོས་ན་དགེ་རྩ་་འཇོམས་ཀྱི་སྟེང་དུ་ཁོང་ཁྲོའི་སེམས་ཀྱི་གྲངས་དང་མཉམ་པའི་བསྐལ་པའི་བར་དུ་དམྱལ་བར་གནས་པ་ལ་སོགས་པ་གསུངས་ཏེ། ཇི་སྐད་དུ། སྤྱོད་འཇུག་ལས། བསྐལ་པ་སྟོང་དུ་བསགས་པ་ཡིས། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང། །ཁོང་ཁྲོ་གཅིག་གིས་འཇོམས་པར་བྱེད། །ཅེས་དང་། སྡུད་པ་ལས། ལུང་བསྟན་མ་ཐོབ་བྱང་ཆུབ་སེམས་དཔའ་གང་ཞིག་གིས། །ལུང་བསྟན་ཐོབ་ལ་སེམས་ཁྲོས་རྩོད་པ་རྩོམ་བྱེད་ན། །ཐ་བ་སྐྱོན་ལྡན་སེམས་ཀྱི་སྐད་ཅིག་ཇི་སྙེད་པ། །དེ་སྙེད་བསྐལ་པར་བཞི་ནས་གོ་ཆ་བགོ་དགོས་སོ། །ཞེས་གསུངས་སོ། །ཡུལ་རྟེན་གཉིས་ཀ་བྱང་སེམས་མ་ཡིན་པ་ལ་བསྐལ་པ་བརྒྱ་སྟོང་སོགས་ཀྱི་ངེས་པ་མེད་ཀྱང་དགེ་རྩ་འཇོམས་པ་ཡོད་པར་བསླབ་བཏུས་ལས་གསུངས་སོ། །ཞེས་པཎ་ཆེན་ཤཱཀྱ་མཆོག་གིས་དབུ་འཇུག་རྣམ་བཤད་ལས་གསུངས་སོ། །
Domain	ཆོས་ལུགས།