56083

མིའི་ཆོས་བླ་མ་ (1)

Part of speech	མིང་ཚིག
Definition	མདོ། འདུལ་བ། མིའི་ཆོས་བླ་མ་ལ་བཤད་ལུགས་གཉིས་ལུང་ལས་གསུངས་ཏེ། ཐོབ་པའི་སྒོ་ནས་མིའི་ཆོས་དང་བླ་མ་ཡོན་ཏན་ཐ་དད་དུ་བསྟན་པ་དང། སྤངས་པའི་སྒོ་ནས་མིའི་ཆོས་དང་བླ་མ་སྐྱོན་དང་ཡོན་ཏན་དུ་བསྟན་པའོ། །དང་པོ་ལྟར་ན་མིའི་ཆོས་ནི་མྱ་ངན་ལས་འདས་པ་ཡིན་ལ། བླ་མ་ནི་ཁམས་གོང་མའི་སེམས་སོ། །གཉིས་པ་ལྟར་ན་འོད་ལྡན་ལས་མིའི་ཆོས་ལས་བླ་མ་ཞེས་གསུངས་སོ། །མིའི་ཆོས་སྒྲིབ་པ་ལྔ་སྤངས་པ་སྟེ། ལུང་རྣམ་འབྱེད་ལས་མིའི་ཆོས་ཞེས་བྱ་བ་ནི་སྒྲིབ་པ་ལྔ་པོ་དག་གོ ། བླ་མ་ཞེས་བྱ་བ་ནི་དེ་དག་སྤངས་པ་གང་ཡིན་པའོ་ཞེས་གསུངས་སོ། །སྒྲིབ་པ་ལྔ་ནི། འདོད་འདུན་དང། གནོད་སེམས་དང། གཉིད་རྨུགས་དང་། རྒོད་འགྱོད་དང། ཐེ་ཚོམ་སྟེ། དེ་དག་ནི་ཕྱི་ནང་གི་འདོད་ཡོན་ལ་ཆགས་ཤིང་ཐོབ་པར་འདུན་པ་དང། གཞན་ལ་གནོད་པའི་བསམ་པ་དང། འཇུག་པ་རང་དབང་མེད་པར་སེམས་བསྡུས་པ་དང། རིག་པ་གསལ་སྣང་མེད་པར་བློང་བློང་བ་ཉིད་དང། སེམས་རྣམ་པར་མ་ཞི་བ་ཉིད་དང། ངན་པར་བྱས་པ་ཡིད་ལ་བཅགས་པ་དང་ཆོས་ཀྱི་དོན་ལ་ཐེ་ཚོམ་ཟ་བའོ། །དེ་དག་ལ་ཅིའི་ཕྱིར་སྒྲིབ་པ་ཞེས་བྱ་ཞེ་ན། ལྔ་པོ་དེ་དག་ཆོས་ཅན། སྒྲིབ་པ་ཡིན་ཏེ། བསླབ་པ་གསུམ་ལ་སྒྲིབ་པ་ཡིན་པའི་ཕྱིར་རོ། །སྤྱིར་ན་ལྔ་པོ་ཐམས་ཅད་ཀྱིས་བསླབ་པ་གསུམ་ཆར་ལ་སྒྲིབ་མོད་ཀྱི། བྱེ་བྲག་ཏུ་འདོད་འདུན་དང་གནོད་སེམས་ཀྱིས་ཚུལ་ཁྲིམས་ལ་སྒྲིབ། གཉིད་རྨུགས་དང་རྒོད་འགྱོད་གྱིས་ཏིང་ངེ་འཛིན་ལ་སྒྲིབ། ཐེ་ཚོམ་གྱིས་ཤེས་རབ་ཀྱི་བསླབ་པ་ལ་སྒྲིབ་སྟེ། དེ་ལྟར་རྣམ་བཤད་རིག་པ་ལས་བཤད་དོ། །ཞེས་ཀུན་མཁྱེན་མཚོ་སྣ་བའི་མདོ་རྩའི་རྣམ་བཤད་ཉི་མའི་འོད་ཟེར་ལེགས་བཤད་ལུང་གི་རྒྱ་མཚོ་ལས་སོ། །འདིར་མི་ཆོས་བླ་མ་ནི། མཚན་ཉིད་པ་མྱ་ངན་ལས་འདས་པ་ནས། རྒྱུན་དུ་ཞུགས་པའི་འབྲས་བུ་ཡན་ཆད་ཡིན་ལ། རྗེས་མཐུན་པ་ནི་བསམ་གཏན་གྱི་དངོས་གཞི་ཐོབ་པ་ཡན་ཆད་ཡིན་ལ། བསམ་གཏན་གྱི་ཉེར་བསྡོགས་ལ་བརྟེན་པའི་དྲན་པ་ཉེར་བར་གཞག་པ་དང་། ཡང་དག་པར་སྤོང་བ་སོགས་ནས་སྦྱོར་ལམ་གྱི་བར་ནི་སྐབས་འདིར་བླ་མར་མི་འོང་སྟེ། མོས་པ་ཡིད་བྱེད་ཀྱི་དབང་དུ་བྱས་པའི་ཕྱིར། ཇི་སྐད་དུ་སྦོམ་པོའི་དབང་དུ་བྱས་པ་ཉིད་ནི་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཉོན་མོངས་པ་རྣམ་པར་གནོན་པའོ། །ཞེས་པཎ་ཆེན་ཤཱཀ་མཆོག་གིས་འདུལ་མདོའི་སྣང་བྱེད་ཉི་མའི་ཤིང་རྟ་ལས་གསུངས་སོ། །
Domain	ཆོས་ལུགས།