56684

མེ་ལོང་ལྟ་བུའི་ཡེ་ཤེས་ (1)

Part of speech	མིང་ཚིག
Definition	མདོ། ཐེག་ཆེན། ལོང་ལྟ་བུའི་ཡེ་ཤེས་ལ། རྒྱུ་དང་ངོ་བོ་གཉིས་ལས། རྒྱུ་ལ་ངོ་བོའི་རྒྱུ་དང་གནས་གྱུར་གྱི་རྒྱུ་གཉིས། དང་པོ་ནི། ཐོས་བསམ་གྱི་ཤེས་རབ་སྟེ། མདོ་སྡེ་རྒྱན་ལས། འཛིན་པའི་ཕྱིར་དང་ཞེས་སོ། །གཉིས་པ་ནི། ཀུན་གཞི་སྟེ། སངས་རྒྱས་ཀྱི་ས་ལས། ཀུན་གཞི་རྣམ་ཤེས་གང་ཡིན་པ། །དེ་ནི་མེ་ལོང་ཡེ་ཤེས་གྱུར། །ཞེས་སོ། །ངོ་བོ་ནི། གཡོ་བྱེད་གཟུང་འཛིན་གཉིས་དང་བྲལ་བའི་ཆ་ནས་འཇོག་པའོ་ཞེས་ཀུན་མཁྱེན་གོ་རམས་པས་དབུ་མ་སྤྱི་དོན་ལས་གསུངས་སོ། ། ཁྱད་པར་ལྔ་ལྡན་གྱི་ཡེ་ཤེས་གང་ཞིག ལོངས་སྐུའི་གཟུགས་བརྙན་གྱི་ཚུལ་དུ་འབྱུང་ཞིང་། ཡེ་ཤེས་གཞན་གསུམ་གྱི་འབྱུང་གནས་སུ་དམིགས་པ་དེ། མེ་ལོང་ལྟ་བུའི་ཡེ་ཤེས་ཀྱི་མཚན་ཉིད། ཁྱད་པར་ལྔ་ནི། མེ་ལོང་ཡེ་ཤེས་ང་ཡི་མེད། །ཡོངས་སུ་མ་ཆད་རྟག་ཏུ་ལྡན། །ཤེས་བྱ་ཀུན་ལ་མ་རྨོངས་པ། །རྟག་ཏུ་དེ་ལ་མངོན་ཕྱོགས་མིན། །ཞེས་པ་དང། སྒྲ་བཤད་པ་ཡང། ཇི་སྐད་དུ། ཡེ་ཤེས་ཀུན་གྱི་རྒྱུ་མཚན་ཕྱིར། །ཡེ་ཤེས་འབྱུང་གནས་ཆེན་པོ་འདྲ། །ལོངས་སྤྱོད་རྫོགས་པའི་སངས་རྒྱས་ཉིད། །ཡེ་ཤེས་གཟུགས་བརྙན་འབྱུང་བའི་ཕྱིར། །ཞེས་གསུངས་སོ་ཞེས་པཎ་ཆེན་ཤཱཀ་མཆོག་གིས་རྒྱན་འགྲེལ་ལུང་དོན་རྒྱ་མཚོ་ལས་གསུངས་སོ། །
Domain	ཆོས་ལུགས།

མེ་ལོང་ལྟ་བུའི་ཡེ་ཤེས་ (2)

Part of speech	མིང་ཚིག
Definition	སྔགས། ཨ་ནུ་ཡོ་ག རྙིང་མ། མེ་ལོང་ཡེ་ཤེས་དེ་ཉིད་དཔེའི་སྒོ་ནས་མཚོན་པར་བྱེད་པའི་མཚན་ཞིག་སྟེ། ཆོས་རྣམས་ཐམས་ཅད་ཀྱི་ཆོས་ཉིད་གང་དུའང་མི་རྟོག་ཅིང་ཅིར་ཡང་མ་འགགས་པར་གསལ་བར་བྱེད་པས་མེ་ལོང་ལྟ་བུའི་ཡེ་ཤེས་ཞེས་བྱ། དེའང་དཔེ་མེ་ལོང་གི་ཆོས་བཅུ་དྲུག་སྒོ་ནས་མེ་ལོང་ཡེ་ཤེས་མཚོན་པར་བྱེད།