57822

ཚ་དམྱལ་བརྒྱད་ (1)

Part of speech	མིང་ཚིག
Definition	འཛམ་བུའི་གླིང་འདི་ཉིད་ཀྱི་འོག་དཔག་ཚད་སྟོང་ཕྲག་ཉི་ཤུ་འདས་པ་ན་དམྱལ་བ་ཆེན་པོ་མནར་མེད་པའི་གནས་ཀྱི་ཡ་ཐོག་ཡོད་དོ། །གནས་དེའི་ཚད་སྟོང་ཕྲག་ཉི་ཤུ་པ་གྲུ་བཞིར་གནས་པའི་ཕྱིར་དེ་ཙམ་མོ་ཞེས་བྱའོ། །དེས་ན་དེའི་འོག་གཞི་ནི་འདི་ནས་དཔག་ཚད་བཞི་ཁྲི་ན་ཡོད་དོ། །དེར་གནས་པའི་སེམས་ཅན་དེ་དག་སྡུག་བསྔལ་གྱིས་ངལ་བསོར་མེད་པས་སྡུག་བསྔལ་བར་ཆད་མེད་པའི་ཕྱིར་མནར་མེད་པའོ། །མནར་མེད་པ་དེའི་སྟེང་ན་ཡར་རབ་ཏུ་ཚ་བ་དང་ཚ་བ་དང་ངུ་འབོད་ཆེན་པོ་དང་ངུ་འབོད་དང་བསྡུས་འཇོམས་དང་ཐིག་ནག་དང་ཡང་སོས་ཏེ་ཚ་བའི་དམྱལ་བདུན་གོང་ནས་གོང་དུ་བརྩེགས་ཏེ་གནས་སོ། །ཁ་ཅིག་ན་རེ་བདུན་པོ་དེ་དག་མནར་མེད་ཀྱི་གློ་དག་ན་གནས་སོ་ཞེས་ཟེར་རོ། །སའི་དངོས་གཞི་ལས་ནི་འདི་ནས་དཔག་ཚད་སུམ་ཁྲི་ཉིས་སྟོང་གི་འོག་ན་ཡང་སོས་ཡོད་ལ་གཞན་བདུན་པོ་རྣམས་ཀྱི་བར་ན་དཔག་ཚད་བཞི་སྟོང་བཞི་སྟོང་ཡོད་པར་བཤད་དེ། དེ་དང་འདིར་བཤད་པའི་མནར་མེད་ཀྱི་གནས་ཀྱི་འཕངས་སུ་དཔག་ཚད་ཉི་ཁྲི་ཡོད་པ་གཉིས་བསྟུན་ན་འདི་ནས་དཔག་ཚད་བརྒྱད་ཁྲིར་འགྱུར་བས་མནར་མེད་ཀྱི་གནས་ཀྱི་འོག་གཞི་གསེར་གྱི་ས་གཞི་ལ་གནས་པར་མངོན་ནོ། །དེ་ལྟར་བརྒྱད་པོ་དེ་དག་ནི་ཚ་བའི་སྡུག་བསྔལ་ཤས་ཆེ་བས་ཚ་བའི་དམྱལ་བ་བརྒྱད་ཅེས་བྱ་བ་ཡིན་ནོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།