58789

ཚུལ་ཁྲིམས་རྒྱ་མཚོ་ (1)

Part of speech

མིང་ཚིག

Definition

ཏཱ་ལའི་བླ་མ་སྐུ་ཕྲེང་བཅུ་པ། ཁམས་ལི་ཐང་ཤོག་དྲུག་སྒྲོ་མདོངས་སུ་འབོད་པའི་སའི་ཆར་གྲོང་སྟོད་ནོར་བུ་ཚང་བྱ་བའི་ཁྱིམ་དུ་ཡབ་བློ་བཟང་སྙན་གྲགས་དང་། ཡུམ་རྣམ་རྒྱལ་བུ་ཁྲིད་གཉིས་ཀྱི་སྲས་སུ་རབ་བྱུང་བཅུ་བཞི་པའི་མེ་བྱི་ཕྱི་ལོ་ ༡༨༡༦ ལོའི་བོད་ཟླ་གསུམ་པའི་ཚེས་ཉེར་དགུ་ཉིན་སྐུ་བལྟམས། དགུང་ལོ་དྲུག་པར་རྒྱལ་བའི་ཡང་སྲིད་དུ་ངོས་འཛིན་ཞུས། ཆུ་རྟ་ཕྱི་ལོ་ ༡༨༢༢ ལོའི་བོད་ཟླ་དང་པོའི་ཚེས་བཅོ་བརྒྱད་ཉིན་པཎ་ཆེན་བསྟན་པའི་ཉི་མ་མཆོག་ནས་སྙེ་ཐང་བདེ་བ་ཅན་དུ་དབུ་སྐྲ་གཙུག་ཕུད་བཞེས་ཏེ། མཚན་ངག་དབང་བློ་བཟང་འཇམ་དཔལ་ཚུལ་ཁྲིམས་རྒྱ་མཚོ་དཔལ་བཟང་པོ་ཞེས་གསོལ་གནང་མཛད་ཐོག ཟླ་བ་གཉིས་པའི་ཚེས་བཅུ་གསུམ་ཉིན་རབ་ཏུ་བྱུང་བའི་བསླབ་སྡོམ་བཞེས་གནང༌། ཟླ་བརྒྱད་པའི་ཚེས་བརྒྱད་ཉིན་ཏ་ལའི་གཟིམ་ཆུང་དུ་འཇིགས་གསེར་ཁྲི་ཆེན་པོར་ཞབས་སོར་འཁོད། དགའ་ལྡན་ཤྲི་གེ་ཐུ་སུ་མ་ཏི་པཀྵི་དང༌། དགའ་ལྡན་ཁྲི་ཟུར་ངག་དབང་སྙན་གྲགས། སྤྲུལ་སྐུ་འཇམ་དཔལ་ཡེ་ཤེས་བསྟན་པའི་རྒྱ་མཚོ་བཅས་ཡོངས་འཛིན་དུ་བསྐོ་གཞག་མཛད་དེ་ཆུང་སྲིད་རིན་པོ་ཆེར་སྐུ་ཡོན་སྒྲོན་འགོ་ཚུགས། རྒྱལ་དབང་མཆོག་སྐུ་ཆུང་དུས་ནས་སློབ་གཉེར་ལ་ཐུགས་བརྩོན་ཆེ་བས། གཙོ་བོ་མདོ་སྔགས་གཞུང་ལུགས་རྒྱ་མཚོའི་གསན་བསམ་ལ་གཅིག་ཏུ་འགྲུས་པར་མཛད་པའི་མཐུ་ལས་ལུང་རྟོགས་ཀྱི་སྐུ་ཡོན་རྣམ་པར་རྒྱས། ས་གླང་ཕྱི་ལོ་ ༡༨༢༩ ལོར་འབྲས་སྤུངས་དགོན་དུ་བཀའ་ཆོས་གསན་སྦྱོང་ཐོག དེ་ནས་སེ་ར་དགོན་པ་སོགས་སུ་ཆིབས་བསྒྱུར་མཛད། ལྕགས་སྟག་ཕྱི་ལོ་ ༡༨༣༠ ལོར་དབུས་ཕྱོགས་རྫོང་གཞིས་ཁག་གི་གཞུང་སྒེར་ཆོས་བཅས་ལ་ས་ཞིང་དང༌། རྗེས་འབྲེལ་རྐང་འགྲོ་ལག་འདོན་གྱི་ཁྲལ་རིགས་ཚང་མ་མོས་སྙོམ་ཞིབ་གཅོད་ཀྱིས་ས་གནས་སོ་སོའི་སྣེ་སྡོད་དང༌། གཙོ་དྲག རྒན་པོ། ས་བདག་གཞིས་བྱེས་འཁུར་མཉམ་ལེན་ཐོག་ནས་ས་རབ་འབྲིང་མཐའ་གསུམ་ལ་བསྐོར་ཏེ་སྒེར་ཆོས་འདོན་དང༌། གཞུང་རྒྱུགས་རྐང་དུ་བརྩིས་པའི་རྩིས་ཁང་ཕུན་ཚོགས་བཀོད་པའི་རྩ་འཛིན་ལྕགས་སྟག་ཞིབ་གཞུང་ཞེས་པའི་དེབ་གཞི་གཏན་འབེབས་གསར་བསྒྲིགས་གནང༌། ཤིང་རྟ་ཕྱི་ལོ་ ༡༨༣༤ ལོའི་ཟླ་བཞི་པའི་ཚེས་བདུན་ཉིན་པཎ་ཆེན་རིན་པོ་ཆེ་ལས་བསྙེན་རྫོགས་ཀྱི་བསླབ་སྡོམ་ཡང་དག་པར་བཞེས། ལོ་དེར་རྒྱལ་དབང་མཆོག་ནས་ཁལ་ཁ་རྗེ་བཙུན་དམ་པ་དང༌། ཐོར་རྒོད་རྒྱལ་པོ་རྣམས་ལ་གཟིམ་ཆུང་དུ་དམིགས་བསལ་མཇལ་ཁ་དང༌། ཆོས་འབྲེལ་གནང་བ་མ་ཟད། ཐོར་རྒོད་རྒྱལ་པོའི་ཞུ་མོས་ལྟར། ཐོར་རྒོད་ཡུལ་དུ་དུས་འཁོར་སྒྲུབ་མཆོད་གསར་འཛུགས་བྱེད་པར་གྲྭ་ཚང་རིགས་ཆེད་རྫོང་མཛད། མཐར་དགུང་གྲངས་ཉི་ཤུ་རྩ་གཉིས་ལ་ཕེབས་པ་མེ་བྱ་ ༡༨༣༧ ལོའི་བོད་ཟླ་དགུ་པའི་ཚེས་གཅིག་ཉིན་གཟིམ་ཆུང་ཕུན་ཚོགས་འདོད་འཁྱིལ་དུ་ཁྲིའུ་ཤིང་གི་ཁར་བྱམས་པའི་བཞུགས་སྟངས་ཀྱིས་བཞུགས་ཏེ། བཞད་མོའི་རྣམ་པ་བཅས་མཛད་བཞིན་པའི་ངང་མཐའ་མ་མྱ་ངན་ལས་འདས་པའི་ཚུལ་བསྟན་པར་མཛད་དོ། །སྐུ་གདུང་རིན་པོ་ཆེ་པོ་ཏ་ལའི་གསེར་གདུང་ཁམས་གསུམ་རྒྱན་མཆོག་ཏུ་བཞུགས།