58858

ཚུལ་འཆལ་གྱི་ཉེས་དམིགས་ (1)

Part of speech	མིང་ཚིག
Definition	མདོ། སྦྱིན་པ་བཏང་ཞིང་ཚུལ་ཁྲིམས་སྲུང་བའི་སྐྱེ་བོ་འགའ་ཞིག་སྔོན་གྱི་ཚུལ་ཁྲིམས་དང་སྦྱིན་པའི་སྟོབས་ཀྱིས་ལྷ་དང་མིའི་ནང་དུ་ལོངས་སྤྱོད་ཕུན་སུམ་ཚོགས་པ་དག་ནི་འབྱུང་ནའང། ཕྱིས་ཚུལ་ཁྲིམས་ཀྱི་རྐང་པ་ཉམས་ན་འགྲོ་བ་ངན་པ་ཉི་ཚེ་བའི་སེམས་ཅན་དམྱལ་བ་དང་། བ་ལང་དང་། རྟ་དང་། གླང་པོ་དང་། སྤྲེའུ་དང་། སྦྲུལ་ལ་སོགས་པ་དང། ཡི་དྭགས་རྫུ་འཕྲུལ་ཆེན་པོ་རྣམས་སུ་སྐྱེས་ནས་སྔོན་གྱི་སྦྱིན་པའི་འབྲས་བུ་ལ་ལོངས་སྤྱོད་པར་འགྱུར་རོ། །དེ་ལྟ་མོད་ཀྱི་ཕྱིན་ཆད་གང་ཟག་དེ་ལ་ལོངས་སྤྱོད་འབྱུང་བར་མི་འགྱུར་ཏེ། ཕྱིས་ཀྱི་ལོངས་སྤྱོད་འབྱུང་བའི་ཆེད་དུ་སྦྱིན་པ་གཏོང་བའི་ཚུལ་ལ་རྨོངས་ཤིང། སྔར་སྦྱིན་པ་བཏང་བའི་རྒྱུ་ཅན་གྱི་དངོས་པོའི་འདུ་བ་སྐྱེད་དང་བཅས་པ་ཡོངས་སུ་ཟད་པས་ནའོ། །དཔེར་ན་བྱས་པ་ཆུད་གསོན་པའི་རང་བཞིན་ཅན་སྔར་གྱི་ས་བོན་ཙམ་ཡང་ལོངས་སྤྱོད་པས་ཕྱིས་འབྲས་བུ་འབྱུང་བ་རྒྱུན་ཆད་པ་བཞིན་ནོ། །སྐབས་ཀྱི་དོན་གཞུང་གི་ཤུགས་ལས་འབྱུང་བ་ནི། སྦྱིན་པས་ལོངས་སྤྱོད་དག་ནི་བདེ་འགྲོ་ནའང་། །སྐྱེ་བོ་ཚུལ་ཁྲིམས་རྐང་པ་ལྡན་ལས་འབྱུང། །སྐྱེད་བཅས་དངོས་འདུ་ཡོངས་སུ་འཕེལ་བས་ན། །ཕྱིན་ཆད་ཀྱང་ནི་ལོངས་སྤྱོད་འབྱུང་བར་འགྱུར། །ཞེས་འདོན་པར་བྱའོ། །དཔེར་ན་དོན་ཅུང་ཟད་ཙམ་ལས་འབྲས་བུ་རྒྱ་ཆེན་པོ་རྙེད་པའི་ཐབས་ལ་མཁས་པ་ནི་ཕྱིས་ཀྱང་འབྲས་བུ་འབྱུང་བའི་ཆེད་དུ་བརྩོན་པ་བཞིན་ནོ། །ཚུལ་ཁྲིམས་དང་བྲལ་བ་ལ་ལོངས་སྤྱོད་མི་འབྱུང་བ་འབའ་ཞིག་ཏུ་མ་ཟད་ཀྱི་ངན་འགྲོ་ལས་ལྡང་བར་དཀའོ་ཞེས་བསྟན་པ། དཔའ་བོ་མཐུན་པའི་ཡུལ་ན་གནས་པ་འཆིང་བ་ལས་གྲོལ་བ་ལྟར། གང་གི་ཚེ་དལ་འབྱོར་གྱི་ལུས་ཐོབ་པས་གཞན་ལ་རག་མ་ལས་པར་རང་དབང་དུ་འཇུག་ཅིང་མཐུན་པའི་ཡུལ་ན་གནས་པའི་སྒོ་ནས་གལ་ཏེ་གང་ཟག་འདི་འཁོར་བའི་རྒྱ་མཚོའི་མཐར་ཕྱིན་པའི་དོན་དུ་ཚུལ་ཁྲིམས་བསྲུང་བ་ལ་སོགས་པས་ངན་འགྲོ་ལས་འཛིན་པར་མི་བྱེད་ན་དཔའ་བོ་བཅིངས་ནས་རི་སུལ་དུ་བསྐྱུར་བ་ལྟར། ཕྱི་ནས་ངན་སོང་གི་གཡང་སར་ལྷུང་བས་དགེ་བ་ལ་སྤྱོད་པའི་སྐལ་པ་མེད་པར་གཞན་དབང་དུ་འཇུག་པར་འགྱུར་བ་དེ་ལ་ཐབས་གང་གིས་སློང་བར་འགྱུར་ཏེ་མི་འགྱུར་རོ། །དེ་ཉིད་ཀྱི་ཕྱིར་ས་བཅུ་པ་ལས། གལ་ཏེ་མི་རྣམས་ཀྱི་ནང་སྐྱེས་ནའང་རྣམ་པར་སྨིན་པ་གཉིས་མངོན་པར་གྲུབ་སྟེ། ཞེས་སོགས་གསུང་ངོ་། །ཞེས་ཀུན་མཁྱེན་རོང་སྟོན་གྱིས་དབུ་འཇུག་རྣམ་བཤད་ལས་གསུངས་སོ། །
Domain	ཆོས་ལུགས།