5892

གང་ཟག་གི་བདག་འགོག་པའི་རྒྱུ་མཚན་ (1)

Part of speech	མིང་ཚིག
Definition	མདོ། དབུ་མ། རྣམ་པར་དཔྱོད་པའི་བློ་ཡིས་འདོད་ཆགས་ལ་སོགས་པའི་ཉོན་མོངས་པ་དང། སྐྱེ་རྒ་ན་འཆི་ལ་སོགས་པའི་སྐྱོན་རྣམས་མ་ལུས་པ། དེའི་རྣམ་པར་ཞུགས་པའི་འཇིག་ཚོགས་ལ་ལྟ་བའི་ཤེས་རབ་ཉོན་མོངས་པ་ཅན་དེ་ལས་འབྱུང་བར་མཐོང་བར་གྱུར་ཅིང་འཐད་པས་ཀྱང་གྲུབ་སྟེ། ཉོན་མོངས་པ་དང་སྐྱེ་བ་དང་རྒས་པ་ལ་སོགས་པའི་སྐྱོན་མ་ལུས་པ་འཇིག་ཚོགས་ལྟ་བའི་རྒྱུ་ཅན་ཡིན་པའི་ཕྱིར་ཏེ། འཇིག་ཚོགས་ལ་ལྟ་བ་མ་སྤངས་པ་རྣམས་ལ་འདུ་བྱེད་མངོན་པར་གྲུབ་པའི་ཕྱིར་དང་། དེ་ལ་སོགས་པའི་སྡུག་བསྔལ་འབྱུང་བའི་ཕྱིར་རོ། །མདོ་ལས་ཀྱང་ཉོན་མོངས་པ་ཐམས་ཅད་ནི་འཇིག་ཚོགས་ལ་ལྟ་བའི་རྩ་བ་ཅན་འཇིག་ཚོགས་ལ་ལྟ་བའི་རྒྱུ་ཅན། འཇིག་ཚོགས་ལ་ལྟ་བའི་ཀུན་འབྱུང་བ་ཅན་ཞེས་གསུངས་སོ། །འཇིག་ལྟ་དེའི་དམིགས་པ་གང་ཞེ་ན། བདག་ནི་འཇིག་ལྟ་དེའི་ཡུལ་དུ་རྟོགས་པ་སྟེ་ཤེས་པར་བྱས་ཏེ། ངར་འཛིན་པ་ནི་བདག་གི་ཡུལ་ཅན་ཡིན་པའི་ཕྱིར་རོ། །དེ་བས་ན་ཉོན་མོངས་པ་དང་སྐྱོན་མ་ལུས་པ་ཡོངས་སུ་སྤང་བར་འདོད་པས་འཇིག་ཚོགས་ལ་ལྟ་བ་སྤང་བར་བྱ་བ་ཡིན་ལ་དེ་ཡང་བདག་མེད་པར་ཁོང་དུ་ཆུད་པ་ལས་སྤོང་བར་འགྱུར་བས་རྣལ་འབྱོར་པས་ཐོག་མར་བདག་ཁོ་ན་འགོག་པར་བྱེད་དོ་ཞེས་ཀུན་མཁྱེན་རོང་སྟོན་གྱི་དབུ་འཇུག་རྣམ་བཤད་ལས་གསུངས་སོ། ། བདག་འགོག་དགོས་པའི་རྒྱུ་མཚན་ནི། ཐར་པ་དོན་གཉེར་གྱི་རྣལ་འབྱོར་པ་ཡིས། ཐོག་མར་གང་ཟག་གི་བདག་འགོག་པར་བྱེད་དགོས་ཏེ། འདོད་ཆགས་ལ་སོགས་པའི་ཉོན་མོངས་པ་དང་། སྐྱེ་རྒ་ན་འཆི་ལ་སོགས་པའི་སྐྱོན་རྣམས་མ་ལུས་པ་འཇིག་ཚོགས་ཕུང་པོ་ལ་བདག་ཏུ་ལྟ་བ་ལས་བྱུང་བར་བློ་ཡིས་མཐོང་བར་གྱུར་ཅིང་ངའོ་སྙམ་པའི་འཛིན་སྟངས་ཀྱི་གཟུང་བྱར་གྱུར་པའི་བདག་ནི་འཇིག་ལྟ་འདི་ཡི་འཛིན་སྟངས་ཀྱི་ཡུལ་དུ་རྟོགས་པར་བྱས་ནས་ཏེ། དེའི་རྒྱུ་མཚན་གྱིས་དགག་དགོས་པ་ཡིན་པའི་ཕྱིར་ཞེས་པཎ་ཆེན་ཤཱཀ་མཆོག་གི་དབུ་འཇུག་རྣམ་བཤད་ངེས་དོན་གནད་ཀྱི་ཊཱིཀ་ལས་གསུངས་སོ། །
Domain	ཆོས་ལུགས།