58925

ཚེ་བརྗེས་ནས་དགེ་སློང་ཚུར་ཤོག་ཅེས་བྱ་བའི་རབ་འབྱུང་འཐོབ་པའི་ཆོས་བཞི་ (1)

Part of speech	མིང་ཚིག
Definition	འཕགས་པ་དགེ་བའི་རྩ་བ་ཡོངས་སུ་འཛིན་པའི་མདོ་ལས་བྱུང་བ་སྟེ། ༡ འདི་ལ་བྱང་ཆུབ་སེམས་དཔའ་བདག་ཉིད་ཀྱང་རབ་ཏུ་འབྱུང་བ་ལ་མངོན་པར་ཆགས་པ་ཡིན་ཞིང༌། གཞན་དག་ཀྱང་རབ་ཏུ་འབྱུང་བ་ཡང་དག་པར་འཛིན་དུ་འཇུག་པར་བྱེད་ལ། རྣམ་པ་ཐམས་ཅད་ཀྱིས་ཀྱང་རབ་ཏུ་འབྱུང་བ་རྟོན་པར་བྱེད་དེ། རབ་ཏུ་བྱུང་ནས་ཀྱང་ཆོས་དང་ལྡན་པའི་གཏམ་གྱིས་རངས་པར་བྱེད་ཅིང༌། ཡང་དག་པར་འཛིན་དུ་འཇུག་ལ་ཡང་དག་པར་གཟེངས་བསྟོད་པ་ཡིན་ཏེ། བྱང་ཆུབ་སེམས་དཔའ་ཆོས་དང་པོ་དེ་དང་ལྡན་ན། ཚེ་བརྗེས་ནས་དགེ་སློང་ཚུར་ཤོག་ཅེས་བྱ་བའི་རབ་ཏུ་འབྱུང་བ་འཐོབ་པ་ཡིན་ནོ། །༢ བྱང་ཆུབ་སེམས་དཔའ་སངས་རྒྱས་ཀྱི་ཆོས་ཡོངས་སུ་བཙལ་བའི་ཕྱིར་བདག་ཉིད་ཀྱིས་ཀྱང་བརྩོན་འགྲུས་བརྩམས་པ་ཡིན་ཞིང༌། སངས་རྒྱས་ཀྱི་ཆོས་ཡོངས་སུ་བཙལ་བའི་ཕྱིར་གཞན་དག་ཀྱང་བརྩོན་འགྲུས་རྩོམ་པ་ཡང་དག་པར་འཛིན་དུ་འཇུག་པ་ཡིན་ཏེ། བྱང་ཆུབ་སེམས་དཔའ་ཆོས་གཉིས་པ་དེ་དང་ལྡན་ན། ཚེ་བརྗེས་ནས་དགེ་སློང་ཚུར་ཤོག་ཅེས་བྱ་བའི་རབ་ཏུ་འབྱུང་བ་འཐོབ་པ་ཡིན་ནོ། ། ༣ བྱང་ཆུབ་སེམས་དཔའ་བདག་ཉིད་ཀྱང་བཟོད་པ་དང་དེས་པ་དང་ལྡན་པ་ཡིན་ཞིང༌། གཞན་དག་ཀྱང་བཟོད་པ་དང་དེས་པ་ཕུན་སུམ་ཚོགས་པ་ལ་འགོད་པར་བྱེད་པ་ཡིན་ལ། བདག་ཉིད་ཀྱང་ཡོ་བྱད་བསྙུངས་པའི་ཡོན་ཏན་ལ་གནས་པ་ཡིན་ཞིང༌། གཞན་དག་ཀྱང་ཡོ་བྱད་བསྙུངས་པའི་ཡོན་ཏན་ཕུན་སུམ་ཚོགས་པ་ལ་འཇོག་པར་བྱེད་པ་ཡིན་ལ། དེ་བདག་ཉིད་ཀྱང་ཤེས་རབ་དང་ལྡན་པ་ཡིན་ཞིང༌། གཞན་དག་ཀྱང་ཤེས་རབ་ཕུན་སུམ་ཚོགས་པ་ལ་འཇོག་པར་བྱེད་པ་ཡིན་ཏེ། བྱང་ཆུབ་སེམས་དཔའ་ཆོས་གསུམ་པ་དེ་དང་ལྡན་ན། ཚེ་བརྗེས་ནས་དགེ་སློང་ཚུར་ཤོག་ཅེས་བྱ་བའི་རབ་ཏུ་འབྱུང་བ་འཐོབ་པ་ཡིན་ནོ། ། ༤ བྱང་ཆུབ་སེམས་དཔའ་བདག་ཉིད་ཀྱང་ཐབས་ལ་མཁས་ཤིང་སྨོན་ལམ་གྱི་སྟོབས་དང་ལྡན་པ་ཡིན་ལ། གཞན་དག་ཀྱང་ཐབས་ལ་མཁས་པ་ཡང་དག་པར་འཛིན་དུ་འཇུག་ཅིང་སྨོན་ལམ་གྱི་སྟོབས་ཀྱིས་འཇོག་པར་བྱེད་པ་ཡིན་ཏེ། བྱང་ཆུབ་སེམས་དཔའ་ཆོས་བཞི་པོ་དེ་དང་ལྡན་ན། ཚེ་བརྗེས་ནས་དགེ་སློང་ཚུར་ཤོག་ཅེས་བྱ་བའི་རབ་ཏུ་འབྱུང་བ་འཐོབ་ཅིང༌། སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ལ། ཐམས་ཅད་དུའང་ལུས་དེ་ཉིད་ཀྱིས་རྒྱལ་སྲིད་འཐོབ་ཅིང་དེར་ཡང་བག་ཡོད་པ་ཡིན་ནོ། །
Domain	ཆོས་ལུགས།