59501

ཚོར་བ་ཡིད་ཉེ་བར་རྒྱུ་བ་བཅོ་བརྒྱད་ (1)

Part of speech	མིང་ཚིག
Definition	མདོ། མངོན་པ། སེམས་ཀྱི་ཚོར་བ་དེ་ཉིད་ཡིད་ཉེ་བར་རྒྱུ་བའི་བྱེ་བྲག་ལས་རྣམ་པ་དག་ནི་ཡང་བཅོ་བརྒྱད་དུ་དབྱེ་ཞིང་། གང་ཞེ་ན། ཡིད་བདེ་བའི་ཉེ་བར་རྒྱུ་བ་དྲུག་དང་། ཡིད་མི་བདེ་བའི་ཉེ་བར་རྒྱུ་བ་དྲུག་དང་། བཏང་སྙོམས་ཀྱི་ཉེ་བར་རྒྱུ་བ་དྲུག་གོ ། གལ་ཏེ་དེ་དག་ངོ་བོ་ཉིད་དམ། མཚུངས་ལྡན་ནམ། དམིགས་པ་གང་ལས་གཞག ། དང་པོ་ལྟར་ན་ནི་ཡིད་བདེ་མི་བདེ་བཏང་སྙོམས་གསུམ་ཁོ་ནར་འགྱུར་ཞིང་། གཉིས་པ་ལྟར་ན་ནི་ཡིད་དང་མཚུངས་པར་ལྡན་པས་གཅིག་ཁོ་ནར་འགྱུར་ལ། གསུམ་པ་ལྟར་ན་ནི་ཡུལ་དྲུག་ལ་དམིགས་པའི་ཕྱིར་དྲུག་ཁོ་ནར་འགྱུར་རོ་ཞེ་ན། གསུམ་ག་ལས་གཞག་སྟེ། ངོ་བོ་ཉིད་ལས་ནི་ཡིད་བདེ་མི་བདེ་བཏང་སྙོམས་གསུམ་དང་། མཚུངས་ལྡན་ལས་ནི་ཡིད་ཀྱི་ཉེར་རྒྱུ་དང་། དམིགས་པ་ལས་ནི་གསུམ་པོ་རེ་རེའང་དྲུག་དྲུག་ཏུ་འགྱུར་ཏེ། གཟུགས་ལ་སོགས་པ་ཡུལ་དྲུག་ཡོད་པའི་ཕྱིར་རོ། །དེ་དག་ཀྱང་བཅོ་ལྔ་ནི་གཟུགས་སོགས་ཡུལ་སོ་སོར་ངེས་པ་ལ་དམིགས་པའི་ཕྱིར་མ་འདྲེས་པ་ལ་དམིགས་པ་ཡིན་ལ། ཆོས་ལ་དམིགས་པའི་ཉེར་རྒྱུ་གསུམ་ནི་འདྲེས་པ་དང་མ་འདྲེས་པ་གཉིས་ཀ་ལ་དམིགས་པ་ཡིན་ནོ། །ཉེ་བར་རྒྱུ་བ་ནི་ཡིད་ལ་བརྟེན་ནས་ཚོར་བ་བདེ་བ་ལ་སོགས་པ་ཡུལ་ལ་རྒྱུ་བའི་ཕྱིར་རམ། ཚོར་བ་ལ་བརྟེན་ནས་ཡིད་ཡུལ་ལ་རྒྱུ་བའི་ཕྱིར་རོ། །ལུས་ཀྱི་ཚོར་བ་ནི་ཡིད་ཉེར་རྒྱུ་མ་ཡིན་ཏེ། ཡིད་ཉེར་རྒྱུ་ནི་རྟོག་བཅས་ཀྱི་ཡིད་ལ་རྟེན་པ་ཡིན་པ་ལ་ལུས་ཚོར་ནི་དབང་པོ་གཟུགས་ཁོ་ན་ལ་རྟེན་པའི་རྟོག་མེད་ཡིན་པའི་ཕྱིར་རོ། །བསམ་གཏན་གསུམ་པའི་བདེ་བའང་ཡིད་ཉེར་རྒྱུ་མ་ཡིན་ཏེ། བརྟན་པར་གནས་པའི་ཕྱིར་རོ། །དེ་དག་ཐམས་ཅད་ཀྱི་དོན་བསྡུ་བ་ནི་ཡིད་ཉེ་བར་རྒྱུ་བ་བཅོ་བརྒྱད་པོ་དེ་དག་ཐམས་ཅད་ནི་ཟག་པ་དང་བཅས་པ་ཡིན་ཏེ། དེ་དག་གི་ཡིད་ཡུལ་ལ་ཞེན་པ་དང་བཅས་པས་ཉེ་བར་རྒྱུ་བའི་ཕྱིར་རོ། །འདི་ནི་བྱེ་བྲག་ཏུ་སྨྲ་བའི་ལུགས་ཡིན་ལ། སློབ་དཔོན་ཟག་བཅས་ཐམས་ཅད་ཀྱང་ཡིད་ཉེར་རྒྱུ་མ་ཡིན་ཏེ། འདི་ནི་ཞེན་པ་ལ་རྟེན་པའི་བདེ་པ་ལ་སོགས་པ་ལ་བཤད་པས་ན་དེ་ནི་ཉོན་མོངས་པ་ཅན་ཁོ་ན་ཡིན་པའི་ཕྱིར་རོ། །ཞེས་འཆད་དོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།