59993

ཝཱ་རཱ་ཎ་སཱི་ (1)

Part of speech	མིང་ཚིག
Definition	རྒྱ་གར་བྱང་ཕྱོགས་སུ་ཡོད་པའི་ཆུ་བོ་ཝ་ར་དང༌། ནཱ་སི་གཉིས་ཀྱི་བར་དུ་ཡོད་པའི་ཡུལ་དེའི་སྤྱི་མིང་སྟེ། ནཻ་པཱ་ལའི་ལྷོ་ནུབ་ཀྱི་མཚམས་ཆུ་བོ་གངྒཱའི་འགྲམ་དུ་ཡོད་པའི་གྲོང་ཁྱེར་གྱི་མིང་ཞིག་ཡིན། འདི་རྡོ་རྗེ་གདན་ནས་ག་ཡའི་གྲོང་ཁྱེར་དང༌། དེ་ནས་ནུབ་ཕྱོགས་སུ་སོང་ན་ཀ་ཤིའི་གྲོང་ཁྱེར་དུ་སླེབས་ཤིང༌། དེ་ནས་ཀྱང་ནུབ་ཕྱོགས་སུ་སོང་བ་ན་གནས་དེ་ཡོད། དེ་ནི་རྒྱ་གར་གྲོང་ཁྱེར་ཀུན་གྱི་ནང་ནས་རྙིང་ཤོས་སུ་གྲགས་ཤིང༌། སྲང་ལམ་འོག་ཆུ་འགྲོ་དང༌། གངྒཱའི་སྒོ་གངྒཱ་ས་གར་ཞེས་གྲགས་པ་ཆུ་བོ་གངྒཱའི་འོག་གི་ས་ཕུག་བརྒྱུད་ནས་རྒྱ་མཚོ་ཆེན་པོའི་འགྲམ་ལ་མ་སླེབས་ཙམ་བར་འགྲོ་ས་ཡོད་པ་སོགས་ངོ་མཚར་ཅན་མང་པོ་དང༌། སྲང་ལམ་གཡས་གཡོན་ཀུན་ཏུ་ཁྲོམ་རས་ཁེངས་པའི་ཚོང་འདུས་སོགས་གྲོང་ཁྱེར་གྱི་ཁྱད་ཆོས་ཀུན་ཚང་ཞིང༌། ཕྱི་རོལ་པའི་ལྷ་ཁང་བི་ཤ་ན་ཐ་སོགས་འཇིག་རྟེན་མཐུ་བོ་ཆེར་གྲགས་པའི་ལྷ་འདྲེ་ཁྲི་ཕྲག་མང་པོའི་ལྷ་ཁང་དང་གཟུགས་བརྙན་ཡོད་པར་གྲགས། གྲོང་ཁྱེར་དེ་ནས་མེ་འཁོར་ནང་ཞུགས་ཏེ་ཆུ་བོ་ཝ་ར་ནཱ་བརྒལ་བ་ན་ས་ར་ན་ཐ་སྟེ་དྲང་སྲོང་ལྷུང་བ་རི་དྭགས་ཀྱི་ནགས་ཚལ་བྱ་བ་སྟོན་པ་ཤཱཀྱ་ཐུབ་པས་འཁོར་ལྔ་སྡེ་ལ་བདེན་བཞིའི་ཆོས་འཁོར་ཐོག་མར་བསྐོར་བའི་གནས་དེ་ཡོད།
Foreign	རྒྱ་གར།