60737

ཞིང་ཤག་པ་ (1)

Part of speech

མིང་ཚིག

Definition

འདི་ཉིད་རིན་སྤུངས་པའི་གཉེན་ཚན་དུ་གཏོགས་པ་ཞིག་ཡིན་ལ། རིན་སྤུངས་པ་དང་སྣེ་གདོང་པ་གཉིས་ཀའི་ཞབས་འབྲིང་རྐང་པ་གཉིས་འཛུགས་བྱས། སྲས་དགུ་ཙམ་ཞིག་བྱུང་བའི་ནང་ནས་གྲགས་ཆེ་བ་ནི་ཀརྨ་མཐུ་སྟོབས་རྣམ་རྒྱལ་དང༌། ཀུན་སྤངས་ལྷ་དབང་རྗེ། ཀརྨ་བསྟན་སྐྱོང་དབང་པོ་བཅས་ཡིན། རིན་སྤུངས་ངག་དབང་རྣམ་རྒྱལ་གྱི་སྐབས་སུ་རིན་སྤུངས་པའི་ཆིབས་དཔོན་གྱི་ལས་ཀ་དང༌། དེ་ནས་རིམ་པས་ཤངས་དང་མྱང་སྨད་ཁུལ་གྱི་ཁྲལ་སྡུད་པ་ལོ་མང་བྱས། རབ་བྱུང་དགུ་པའི་ས་སྤྲེལ་ཕྱི་ལོ་ ༡༥༤༨ ལོར་རིན་སྤུངས་པས་གཞིས་ཀ་བསམ་འགྲུབ་རྩེའི་རྫོང་དཔོན་དུ་བསྐོས། རིམ་བཞིན་སྟོབས་འབྱོར་དང་དབང་ཤུགས་ཇེ་ཆེར་སོང་སྟེ་རིན་སྤུངས་ངག་དབང་འཇིགས་གྲགས་ཀྱི་དུས་སུ་སླེབས་སྐབས་རིན་སྤུངས་པའི་ཁ་གཏད་དུ་ལངས། ལྷག་པར་ཕྱི་ལོ་ ༡༥༥༧ པའི་མེ་སྦྲུལ་ལོར་ཤངས་དོན་རབ་པའི་ས་སྡེའི་སྐོར་རིན་སྤུངས་པ་དང༌། ཞིང་ཤག་པ་གཉིས་བར་འབྲུག་པ་ཀུན་མཁྱེན་པདྨ་དཀར་པོས་བར་འདུམ་གནང་བར་ཕེབས་ནའང་དོན་རབ་པའི་སྲོག་ལ་ཉེན་ཁ་མ་བྱུང་བ་ཙམ་ལས་ས་མི་དབང་རིས་ཞིང་ཤག་པར་རྩིས་སྤྲོད་གནང་དགོས་བྱུང༌། ཕྱི་ལོ་ ༡༥༦༥ པའི་ཤིང་གླང་ལོར་ཞིང་ཤག་པ་རང་གིས་དམག་སྣེ་ཁྲིད་དེ་པ་རྣམ་ལྷུན་གྲུབ་རྩེ་བསྐོར་པ་དང༌། རྫོང་གསར་ཕག་རི་བཅས་བླངས་པར་མ་ཟད། ལྷུན་གྲུབ་རྩེ་པ་སང་ཤོར་གནང་ཤོར་དང༌། མྱང་སྟོད་པ་རྣམས་སུ་ཡི་ཕྱོགས་སུ་འགྲོ་ངེས་གཏན་མེད་པའི་ཁར། རིན་སྤུངས་པ་ལའང་ཉེན་ཁ་ཆེན་པོ་ཆགས་པའི་མཚམས་སུ་སླེབས་ཚེ། རིན་སྤུངས་པས་འབྲུག་པ་པད་མ་དཀར་པོ་སླར་ཡང་རིན་གཙང་གཉིས་ལ་བར་འདུམ་གནང་བར་གདན་ཞུས་བྱས་མཐར། པ་རྣམ་པ་ཡོངས་རྫོགས་ཞིང་ཤག་པར་སྤྲད་ནས་འཐུས་ཙམ་བྱུང་བ་བཅས་སྐབས་དེར་ཡང་ཞིང་ཤག་པར་རྒྱལ་ཁ་ཐོབ། དེའི་དུས་བྱང་བདག་ནམ་མཁའ་རིན་ཆེན་གྱི་སྲས་ནམ་མཁའ་རྒྱལ་མཚན་དང༌། བྱང་བདག་བཀྲ་ཤིས་སྟོབས་རྒྱས་སྐུ་མཆེད་བགྲེས་གཞོན་གཉིས་ནང་མ་འཆམས་པའི་བར་དུ་ཞིང་ཤག་པའི་སྲས་ཀུན་སྤངས་ལྷ་དབང་རྡོ་རྗེ་བཙངས་ཐོག་ནམ་མཁའ་རྒྱལ་མཚན་གྱི་ཕྱོགས་སུ་ལངས་ཏེ་བྱང་བདག་བཀྲ་ཤིས་སྟོབས་རྒྱས་རང་གི་སྒེར་གཞིས་སུ་བཞུགས་མི་ཆོག་པར་དབུས་ཕྱོགས་སུ་རྒྱང་ཕུད་ལྟ་བུར་ཕེབས་དགོས་པའི་ཆད་པ་ཕོག་པར་མ་ཟད། ཞིང་ཤག་པས་བྱང་བདག་བཀྲ་ཤིས་སྟོབས་རྒྱས་ལ་འཕྱ་སྨོད་སྒྲོག་པ་ཐུགས་ལ་ཕོག་ཆེ་བས། བཀྲ་ཤིས་སྟོབས་རྒྱས་ཀྱིས་མངོན་སྤྱོད་ཀྱི་ལས་སྦྱོར་མཛད་པས་ཞིང་ཤག་ཚེ་བརྟན་རྡོ་རྗེ་གཟའ་ནད་ཀྱིས་གྲོངས་པ་རེད་ཅེས་བཤད་སྲོལ་བྱུང་འདུག