62633

འཁོར་བའི་བསྡུས་པའི་ཡན་ལག་བཅུ་གཉིས་ཚེ་དུ་ལ་རྫོགས་པ་ (1)

Part of speech	མིང་ཚིག
Definition	འཁོར་བའི་རྒྱུ་འབྲས་ཆ་གཅིག་གིས་བསྡུས་པའི་ཡན་ལག་བཅུ་གཉིས་ཚེ་དུ་ལ་རྫོགས་པ་ནི། ཤིན་ཏུ་མྱུར་ན་ཚེ་གཉིས་ལ་རྫོགས་པ་ཡང་སྲིད་དེ། ཚེ་སྔ་མའི་ཚེ་སྟོད་ལ་འཕེན་བྱེད་ཀྱི་ལས་བསགས། ཚེ་མཇུག་ལ་འགྲུབ་བྱེད་ཀྱི་ལས་ཀྱིས་གསོས་བཏབ་ནས་ཚེ་ཕྱི་མ་ལ་འཕངས་པའི་འབྲས་བུ་དང་། གྲུབ་པའི་འབྲས་བུ་རྣམས་འབྱུང་བའི་ཕྱིར། ཤིན་ཏུ་རིང་ན་ཚེ་གསུམ་ལ་རྫོགས་ཏེ། སྔ་མ་ལ་འཕེན་བྱེད་ཀྱི་ལས་བསགས། བར་བ་ལ་འགྲུབ་བྱེད་ཀྱི་ལས་ཀྱིས་གསོས་བཏབ་ནས། ཚེ་ཕྱི་མ་ལ་འབྲས་བུ་རྣམས་འབྱུང་བའི་ཕྱིར། དེ་ཡང་ལས་བསགས་པའི་སྐྱེ་བ་དང་། གསོས་བཏབ་པའི་སྐྱེ་བ་གཉིས་པོ་བར་མ་ཆད་དུ་འབྱུང་བར་ནི་མ་ངེས་ཏེ། འཕེན་བྱེད་ཀྱི་ལས་བསགས་ནས་སྐྱེ་བ་དུ་མས་བར་དུ་ཆོད་ཀྱང་གསོས་མ་བཏབ་པ་སྲིད་པའི་ཕྱིར། འགྲུབ་བྱེད་ཀྱི་ལས་ཀྱིས་གསོས་བཏབ་པའི་སྐྱེ་བ་དེ་དང་འབྲས་བུ་འགྲུབ་པའི་སྐྱེ་བ་དེ་ནི་བར་མ་ཆད་དུ་འབྱུང་བར་ངེས་ཏེ། འགྲུབ་བྱེད་ཀྱི་ལས་ཀྱིས་གསོས་བཏབ་པའི་དུས་སུ་ཡང་སྲིད་འགྲུབ་བྱེད་ཀྱི་ལས་ཀྱི་ནུས་པ་མཐུ་ཅན་དུ་བྱས་པའི་ཕྱིར། གལ་ཏེ་ཤིན་ཏུ་རིང་ན་ཚེ་གསུམ་ལ་རྫོགས་པ་མི་འཐད་པར་ཐལ། ལས་བསགས་པའི་སྐྱེ་བ་དང་། འབྲས་བུ་འགྲུབ་པའི་སྐྱེ་བ་གཉིས་ཀྱི་བར་དུ་སྐྱེ་བ་དུ་མས་ཆོད་པ་སྲིད་པའི་ཕྱིར་ཞེ་ན། སྐྱོན་མེད་དེ། དེ་རྣམས་རྟེན་འབྲེལ་གྱི་ཆ་གཞན་དུ་གཏོགས་པའི་ཕྱིར། ལུགས་འདི་ལ་ནི་རྩོད་པའི་གནས་མེད་དེ། འཁོར་བས་བསྡུས་པའི་རྒྱུ་འབྲས་ཆ་གཅིག་ལ་ཚོར་བའི་ས་བོན་གྱིས་སྲེད་པ་བསྐྱེད་པ་ཡོད་ཀྱང་ཚོར་བ་མངོན་འགྱུར་བའི་རྐྱེན་གྱིས་སྲེད་པ་འབྱུང་བ་མེད་པའི་ཕྱིར་རོ་ཞེས་ཀུན་མཁྱེན་གོ་རམས་པའི་རྟེན་འབྲེལ་རབ་གསལ་ལས་སོ། །
Domain	ཆོས་ལུགས།