62634

འཁོར་བའི་བསྡུས་པའི་རྟེན་འབྲེལ་གྱི་ས་མཚུངས་ (1)

Part of speech	མིང་ཚིག
Definition	དེ་ལ་ཡན་ལག་བཅུ་གཉིས་ལས། འདུ་བྱེད་ལ་སོགས་པའི་ཕྱི་མ་བཅུ་གཅིག་པོ་དེ་གང་དུ་སྐྱེ་བའི་སྐྱེ་ས་ཁོ་ནར་གཏོགས་ཏེ། རྣམ་སྨིན་གྱི་ཡན་ལག་དྲུག་གམ་བདུན་པོ་དེ་སྐྱེ་ས་པ་དེའི་ཟག་བཅས་ཀྱི་ཕུང་པོ་ལ་འཇོག་དགོས་ཤིང་། ས་གཞན་གྱི་འཕེན་བྱེད་ཀྱི་ལས་ཀྱིས་ས་གཞན་གྱི་རྣམ་སྨིན་མི་འཕེན། ས་གཞན་གྱི་འགྲུབ་བྱེད་ཀྱི་ལས་ཀྱིས་ས་གཞན་གྱི་རྣམ་སྨིན་མི་འགྲུབ་པའི་ཕྱིར་རོ། །མ་རིག་པ་གང་དུ་སྐྱེ་བའི་སྐྱེ་སར་གཏོགས་པ་ལ་ཡང་དགུ་ཡོད་དེ། ཁམས་གསུམ་ས་དགུ་ནས་འདོད་པར་སྐྱེ་བ་ནའོ། །དེའི་རྒྱུ་མཚན་ཡང་ཁམས་གོང་གི་སས་བསྡུས་ཀྱི་མ་རིག་པས་འདོད་པར་འཕེན་བྱེད་ཀྱི་ལས་ཀུན་ནས་མི་སློང་བའི་ཕྱིར་ཏེ། གོང་མའི་དངོས་གཞིའི་སེམས་མ་ཐོབ་པར་གོང་མའི་མ་རིག་པ་མངོན་དུ་མི་འགྱུར་ལ། གོང་མའི་དངོས་གཞི་ཐོབ་ནས་མ་ཉམས་པར་འདོད་པར་འཕེན་བྱེད་ཀྱི་ལས་སོགས་པ་མི་སྲིད་པའི་ཕྱིར་ཏེ། འདོད་པ་དམན་པར་མཐོང་བའི་ཕྱིར། ནས། ཡང་ཁམས་གསུམ་ས་དགུ་ནས་བསམ་གཏན་གཉིས་པར་སྐྱེ་བའི་སྐྱེ་བ་དགུ་ལ་མ་རིག་པ་བསམ་གཏན་དང་པོའི་སས་བསྡུས་ཁོ་ན་ཡིན་ཏེ། འདོད་པའི་སས་བསྡུས་ཀྱི་མ་རིག་པས་བསམ་གཏན་གཉིས་པའི་ལས་ཀུན་ནས་མི་སློང་བ་གང་ཞིག བསམ་གཏན་གཉིས་པ་ཡན་ཆད་ཀྱི་མ་རིག་པས་ཀྱང་བསམ་གཏན་གཉིས་པར་འཕེན་བྱེད་ཀྱི་ལས་ཀུན་ནས་མི་སློང་བའི་ཕྱིར། གཏན་ཚིགས་སྔ་མ་གྲུབ་སྟེ། བསམ་གཏན་གཉིས་པར་སྐྱེ་བའི་འཕེན་བྱེད་ཀྱི་ལས་སོགས་པ་ལ་བསམ་གཏན་དང་པོའི་དངོས་གཞིའི་སེམས་ཐོབ་པ་དགོས། དེ་ཐོབ་ནས་འདོད་པའི་སྒོམ་སྤངས་སུ་གྱུར་པའི་མ་རིག་པ་སྤང་པའི་ཕྱིར་དང་། འདོད་པའི་མཐོང་སྤངས་སུ་གྱུར་པའི་མ་རིག་པ་ནི་མི་དགེ་བ་ཡིན་པས་མི་གཡོ་བའི་ལས་ཀུན་ནས་མི་སློང་བའི་ཕྱིར། དེས་མཚོན་ནས་བསམ་གཏན་གསུམ་པ་ནས་བཟུང་སྟེ་སྲིད་རྩེའི་བར་གྱི་སྐྱེ་བ་དགུ་དགུ་པོ་ཐམས་ཅད་ཀྱི་ཀུན་སློང་གི་མ་རིག་པ་རང་རང་གི་འོག་ས་དེ་མ་ཐག་ཏུ་ཤེས་པར་བྱའོ། །བསྡུ་ན་མ་རིག་པ་ལ་མུ་བཞི་ལས། སྐྱེ་འཆི་གཉིས་ཀའི་སར་གཏོགས་པ་ནི་འདོད་པ་ནས་འདོད་པར་སྐྱེ་བ་ལྟ་བུ། སྐྱེ་སར་གཏོགས་ནས་འཆི་སར་མི་གཏོགས་པ་ནི་གོང་མ་བརྒྱད་ནས་འདོད་པར་སྐྱེ་བ་ལྟ་བུ། འཆི་སར་གཏོགས་ནས་སྐྱེ་སར་མི་གཏོགས་པ་ནི་འདོད་པ་ནས་བསམ་གཏན་དང་པོར་སྐྱེ་བ་ནས་བཟུང་སྟེ། ཅི་ཡང་མེད་ནས་སྲིད་རྩེར་སྐྱེ་བའི་བར་བརྒྱད་ལྟ་བུའོ། །སྐྱེ་འཆི་གཉིས་ཀའི་སར་མི་གཏོགས་པ་ནི་བཅུ་བདུན་པོ་དེའི་ལྷག་མ་རྣམས་སོ། །འདི་དག་ཀྱང་ཡིད་ཀྱི་ས་པའི་མ་རིག་པས་ཀུན་སློང་བྱེད་པའི་དབང་དུ་བྱས་ཀྱི་ཉོན་ཡིད་ཀྱི་འཁོར་དུ་བྱུང་བའི་མ་རིག་པས་ཀུན་སློང་བྱེད་ན་མ་རིག་པ་ནི་གང་དུ་ལས་སོགས་པའི་རྟེན་དེའི་སར་གཏོགས་ཏེ། ཉོན་ཡིད་ནི་ཀུན་གཞིའི་རྣམ་ཤེས་ལ་དམིགས་ནས་བདག་ཏུ་འཛིན་པ་ཡིན་པས་གཞན་གྱི་ཉོན་ཡིད་ཀྱིས་ས་གཞན་གྱི་ཀུན་གཞི་ལ་བདག་ཏུ་འཛིན་པ་མི་སྲིད་པའི་ཕྱིར་རོ་ཞེས་ཀུན་མཁྱེན་གོ་རམས་པའི་རྟེན་འབྲེལ་རབ་གསལ་ལས་སོ། །
Domain	ཆོས་ལུགས།