63104

འཁྲུལ་ཞིག་ཁྲི་འཛིན་དང་པོ་སྐུ་ཕྲེང་དྲུག་པ་ངེས་དོན་བསྟན་པའི་དབང་ཕྱུག་ (1)

Part of speech

མིང་ཚིག

Definition

འཁྲུལ་ཞིག་སྐུ་ཕྲེང་དྲུག་པ་ངེས་དོན་བསྟན་པའི་དབང་ཕྱུག་གམ་ཨ་ལྡེ་རྒྱལ་སྲས་མཆོག་ནི། སླར་ནང་ཆེན་རྒྱལ་ཁབ་དེ་ཉིད་དུ། གོང་མའི་སྐུ་མཆེད་ཡབ་མི་དབང་དཀོན་མཆོག་ལྷ་རྒྱལ་དང༌། ཡུམ་གུ་ཚ་བཟའ་རྣམ་སྲས་དབང་མོ་གཉིས་ཀྱི་སྲས་སུ་རབ་བྱུང་བཅུ་བཞི་པའི་ཆུ་བྱི་ ༡༨༥༢ ལོར་འཁྲུངས། གོང་མའི་ལུང་དང་མཐུན་པར་འབྲུག་ཆེན་དགུ་པ་འཇིགས་མེད་མི་འགྱུར་དབང་གི་རྒྱལ་པོ་དང༌། རྒྱལ་དབང་ཀརྨ་པ་ཐེག་མཆོག་རྡོ་རྗེས་ངོས་འཛིན་གནང་ནས་གསེར་ཁྲིར་མངའ་གསོལ། མཚན་ངེས་དོན་བསྟན་པའི་དབང་ཕྱུག་ཏུ་གསོལ། སྐྱེས་སྦྱངས་ཀྱི་ཡོན་ཏན་ཕུལ་དུ་བྱུང༌། རྒྱལ་སྲས་ཁོང་ལས་མེད་པས་ནང་ཆེན་རྒྱལ་རབས་ཉེར་བདུན་པའི་རྒྱལ་སྲིད་ཀྱི་ཁུར་བཞེས་དགོས་བྱུང་ནས། བཙུན་མོ་ནག་རུ་ཁྱུང་ནག་བཟའ་གཡུང་དྲུང་དཔལ་འཛོམས་ཞེས་པ་བཞེས། རྒྱལ་པོའི་མཚན་ལ་ཆོས་རྒྱལ་དོན་གྲུབ་ལྷ་རྩེ་ཞུ། ཡབ་མེས་ཀྱི་བཀའ་སྲོལ་བཞིན་མངའ་འབངས་ཆོས་བཞིན་བསྐྱངས། དབུས་གཙང་ཕྱོགས་སུ་ཕེབས་ནས་གདན་ས་རྣམས་ལ་མཆོད་འབུལ་དང་གཏོང་སྒོ་དཔེར་འོས་པ་མཛད། གཞུང་ས་དགའ་ལྡན་ཕོ་བྲང་ནས་བཀུར་བཟོས་དང༌། དངོས་པོའི་གནང་སྐྱེས། འཇའ་ས་ཁྱབ་ཤོག་སོགས་བསྩལ། རྒྱལ་དབང་ཀར་འབྲུག འབྲི་སྟག ཁམས་སྤྲུལ་བསྟན་པའི་ཉི་མ། གྲུབ་དབང་ཚོགས་གཉིས་སོགས་སྐབས་དེར་གྲགས་པའི་སྐྱེས་ཆེན་དམ་པ་མང་པོ་བསྟེན། སྨིན་གྲོལ་གདམས་སྐོར་མང་དུ་གསན་ཅིང༌། བསྙེན་སྒྲུབ་དང་བསྐྱེད་རྫོགས་ལ་ཉམས་ལེན་མཛད་པས་རྟགས་དང་ཡོན་ཏན་མང་དུ་བྱུང་བར་གྲགས། བསྟན་དགོན་ལ་སྐུ་གོང་མའི་མཛད་རྗེས་བསྐྱངས་ཏེ། བདེ་མཆོག ཚེ་བདག མགོན་སྒྲུབ་སོགས་དཀྱིལ་ཆོག་མང་པོ་གསར་འཛུགས་དང་ཕྱག་བཞེས་གོང་འཕེལ་དུ་བཏང༌། ངོར་དཔོན་སློབ་ངག་དབང་བློ་གཏེར་དབང་པོ་གདན་དྲངས་ནས་མེ་བྱི་ ༡༨༧༦ ལོར་དགོན་དུ་སྡོམ་གསུམ་གྲྭ་ཚང་ཞེས་པ་གསར་འཛུགས་ཀྱིས་དབྱར་གནས་ཚུགས། དབྱར་གནས་མཁན་པོའང་བྱམས་མེ་ཆོས་དཔལ་རྒྱ་མཚོ། འཁྲུལ་ཞིག་སྐྱབས་གནས་དང༌། ཡང་དབེན་མཁན་ཆེན་འཇམ་དབྱངས་ཚུལ་ཁྲིམས་རྒྱ་མཚོ། མཁན་ཆུང་འཇམ་དབྱངས་གྲགས་པ་རྣམས་རེས་མོས་སུ་སྤྱན་དྲངས། དགོན་པའི་བཅའ་ཁྲིམས་དམ་འཛིན་དང༌། གཞན་ཡང་གཙུག་ལག་ཁང་དུ་རྟེན་གསུམ་དང་དཔེ་མཛོད་ཆེན་མོ་གསར་བཞེངས་སོགས་རྒྱལ་སྲིད་དང་གདན་སའི་ཆོས་གྲྭ་གཉིས་ཀར་དར་རྒྱས་ཆེན་པོ་བྱུང༌། དེ་ནས་དགུང་ལོ་སོ་གསུམ་ཤིང་སྤྲེལ་ ༡༨༨༤ ལོའི་རྒྱལ་ཟླ་བའི་ཚེས་གསུམ་ལ་གཤེགས་པར་ངེས་སོ། །

{{#arraymap:འཁྲུལ་ཞིག་ཁྲི་འཛིན་དང་པོ་སྐུ་ཕྲེང་དྲུག་པ་ངེས་དོན་བསྟན་པའི་དབང་ཕྱུག་

|; |@@@ | | }}