6509

གཉིས་ཀ་ལ་དཔྱོད་པ་མུ་བཞི་སྐྱེ་འགོག་གི་གཏན་ཚིགས་ (1)

Part of speech	མིང་ཚིག
Definition	མདོ། ཕར་ཕྱིན། མུ་བཞི་སྐྱེ་འགོག་གི་གཏན་ཚིགས་ནི། ཕྱི་ནང་གི་དངོས་པོ་རྣམས་ཆོས་ཅན། རང་བཞིན་གྱིས་སྐྱེ་བ་མེད་དེ། རྒྱུ་དུ་མས་འབྲས་བུ་གཅིག་ཀྱང་མི་སྐྱེད། རྒྱུ་དུ་མས་འབྲས་བུ་དུ་མའང་མི་སྐྱེད། རྒྱུ་གཅིག་གིས་འབྲས་བུ་གཅིག་ཀྱང་མི་སྐྱེད། རྒྱུ་གཅིག་གིས་འབྲས་བུ་དུ་མའང་མི་སྐྱེད་པའི་ཕྱིར། འདིའི་ཕྱོགས་ཆོས་བསྒྲུབ་པ་ལ། གལ་ཏེ་རྒྱུ་དུ་མས་འབྲས་བུ་གཅིག་སྐྱེད་དོ་ཞེ་ན། འོ་ན་འབྲས་བུ་གཅིག་པོ་དེ་ལ་རྒྱུ་དུ་མས་ཕན་བཏགས་པའི་ཆ་དུ་མ་ཡོད་དམ་མེད། མེད་ན་རྒྱུ་དུ་མས་འབྲས་བུ་གཅིག་སྐྱེད་པ་འགལ་ལ། ཡོད་ན་རྒྱུ་དུ་མས་འབྲས་བུ་དུ་མ་སྐྱེད་པའི་མུར་སོང་གི རྒྱུ་དུ་མས་འབྲས་བུ་གཅིག་སྐྱེད་པའི་མུར་མ་སོང་ངོ་། །གལ་ཏེ་གཏན་ཚིགས་གཉིས་པ་མ་གྲུབ་བོ་ཞེ་ན། རྒྱུའི་ཆ་ཤས་རེ་རེས་འབྲས་བུའི་ཆ་ཤས་རེ་རེ་སྐྱེད་པ་ཡིན་ནམ། འབྲས་བུའི་ཆ་ཤས་ཐམས་ཅད་སྐྱེད་པ་ཡིན། དང་པོ་ལྟར་ན་རྒྱུ་གཅིག་གིས་འབྲས་བུ་གཅིག་སྐྱེད་པའི་མུར་སོང་གི རྒྱུ་དུ་མས་འབྲས་བུ་དུ་མ་སྐྱེད་པའི་མུར་མ་སོང་ངོ་། །ཕྱི་མ་ལྟར་ན་རྒྱུ་གཅིག་གིས་འབྲས་བུ་དུ་མ་སྐྱེད་པའི་མུར་སོང་གི རྒྱུ་དུ་མས་འབྲས་བུ་དུ་མ་སྐྱེད་པའི་མུར་མ་སོང་བའི་ཕྱིར། གཏན་ཚིགས་ཕྱི་མ་གཉིས་ཀྱང་གྲུབ་སྟེ། འབྲས་བུ་སྐྱེད་པ་ལ་རྒྱུ་རྐྱེན་ཚོགས་དགོས་པའི་ཕྱིར་རོ་ཞེས་ཀུན་མཁྱེན་གོ་རམས་པའི་ཡུམ་དོན་རབ་གསལ་ལས་སོ། །
Domain	ཆོས་ལུགས།