65720

འདུལ་ཆོག་གི་ཆོ་ག་ (1)

Part of speech

མིང་ཚིག

Definition

བོན་གྱི་སྟོན་པ་གཤེན་རབ་མི་བོ་མཆོག་ནི་གནས་མཆོག་དམ་པ་འོལ་མོ་ལུང་རིང་ངམ་རྟག་གཟིགས་ཡུལ་དུ་ཕྱི་ལོའི་སྔོན་ ༡༦༠༡༧ འཁྲུངས་ཡོད། རྟག་གཟིགས་ནི་ད་ཆ་ཞང་ཞུང་ཁོངས་གཏོགས་གངས་ཏི་སེའི་ཕྱོགས་སུ་ངོས་འཛིན་བྱེད་ཀྱི་ཡོད། སྟོན་པ་ཐུགས་རྗེ་ཅན་གྱིས་གནས་མཆོག་དེར་མཛད་པ་བཅུ་གཉིས་ཀྱི་འཕྲིན་ལས་སྤེལ་ཏེ། ཆོ་ག་འདི་ནི་སྟོན་པས་བསྟན་པ་རྗེས་བཞག་གི་མཛད་པ་རྫོགས་ནས་འདུལ་ཁྲིམས་མཛད་པའི་དུས་སྐབས་སུ་བྱུང་ལ། སྟོན་མཆོག་ཉིད་གཤེན་ལོ་སོ་གཉིས་ཐོག་གསས་ཁང་ཁྲི་སྨོན་རྒྱལ་བཞད་ཀྱི་སྒོ་དྲུང་བྱོན་ནས། སྡུག་བསྔལ་གྱི་ཆུ་བཞིར་གཟིགས་ཞིང་འཁོར་བ་ལས་ཡིད་འབྱུང་བའི་ཚུལ་བསྟན་ཏེ། རྒྱུ་འབྲས་བདེན་པའི་བོན་དང་། བླ་མེད་གོ་འཕང་སྒྲུབ་ཐབས་ལས་སོགས་ཀྱི་མདོ་སྡེ་བོན་མང་པོ་གསུངས་ཡོད། དེ་ནས་རབ་ཏུ་བྱུང་བ་ཐུགས་ལ་དགོངས་ནས་འཁོར་འདབས་ལོངས་སྤྱོད་ཐམས་ཅད་སྤངས་ཏེ། བར་སྣང་སྟོང་པའི་དབྱིངས་རུམ་ནས་སངས་རྒྱས་ཐུགས་རྗེ་ལས་ན་བཟའ་གོས་དྲུག་དང་ཧོས་རུ་བཅས་རང་བབས་སུ་བྱུང་། སྟོན་པས་མཁའ་ལྡིང་ཤང་ཤང་དུ་སྤྲུལ་ནས་ནམ་མཁའ་ལ་འཕུར་ཏེ། རང་བྱུང་མཆོད་རྟེན་བཞི་དང་། དྲང་སྲོང་ལེགས་ལྡན་རྒྱལ་བའི་དྲུང་དུ་རབ་ཏུ་བྱུང་བར་མཛད་དོ། །དེ་ནས་བྱ་སྤྲེལ་མི་གསུམ་གྱི་དཀའ་ཐུབ་ལོ་གསུམ་རིམ་པས་མཛད་གནང་སྟེ། བདུད་དང་། སྲིན་པོ། མུ་སྟེགས་རྣམས་ཀྱི་སེམས་རབ་ཏུ་ཞི་ཞིང་འཁོར་དུ་བྱུང་ཡོད། འཁོར་ལ་ཡང་སྡེ་བཞི་ཡ་བརྒྱད་ཕྱེས་ནས་འདུལ་བ་རྒྱུད་དྲུག་དང། འདུལ་བྱེད་སྡེ་བཅུ་བཅས་འདུལ་བའི་སྡེ་མང་པོར་གཏན་ལ་ཕེབས་ལ། ལྷག་པར་ཏུ་གསས་མཁར་ཁྲི་སྨོན་རྒྱལ་བཞད་དང་། ཁོ་མ་ནེའུ་ཆུང་གཉིས་ཀྱི་བར་མཆོད་རྟེན་རྣམ་དག་དཀར་པོའི་མདུན་ནས། ཕོ་མོ་མ་འདྲེས་པ་སོ་སོ་རུ་དབྱེ་སྟེ་ཕོ་གླིང་མོ་གླིང་གི་སྡེ་ཕྱེས་ཏེ། འདུལ་ཁྲིམས་ཀྱི་སྡོམ་པ་ཕོག་ཞིང་། གཤེན་རབ་གཡུང་དྲུང་སེམས་དཔའ་དུ་མ་དང་ཐབས་གཅིག་ཏུ་བཞུགས་ནས་གཤེན་གྱི་དགེ་སྤྱོད་རྣམ་པར་དག་པ་གཏན་ལ་ཕབ་ནས། འཁོར་རྣམས་ལ་ཡན་ལག་བརྒྱད་ལྡན་གྱི་སྒོ་ནས་དགེ་སྦྱོར་སྒྲུབ་ཚུལ་གསུངས་པ་དང་། ཕྱི་རོལ་རྣམས་ལ་དཔེ་བསྟན་པའི་ཕྱིར་སྟོན་པས་ལྷ་སྐུ་ཕྱག་རྒྱ་བསྟན་ཏེ། ཐུགས་ལས་འོད་ཟེར་ཕར་འཕྲོས་ཚུར་འདུས་ནས་སྐུ་དང་གཞལ་ཡས་སུ་གྲུབ་པས་སོ། །འཁོར་རྣམས་ཀྱིས་ཞུ་དོན་གསོལ་བ་ལ་བརྟེན་ནས་སྟོན་པས་ཀྱང་ཆོ་ག་འདི་གོ་རིམ་བཞིན་གསུངས་སོ། །ཆོ་ག་འདི་ཉིད་ཕྱིས་སུ་དུས་རབས་བཅུ་བཞིའི་ནང་སྤྲུལ་སྐུ་བློ་ལྡན་སྙིང་པོ་ལ་སྙན་དུ་རྒྱུད་ཡོད། ལོ་རྒྱུས་མདོ་བསྡུས་ཙམ་ཡིན་རྒྱས་པོ་མདོ་དྲི་མེད་གཟི་བརྗིད་པོད་བཅུ་པ་ལས་གསལ་ལོ། །