65782

འདུལ་བ་རྣམ་བཞི་ (1)

Part of speech	མིང་ཚིག
Definition	སྔགས། རྙིང་མ། དེ་བཞིན་གཤེགས་པས་འགྲོ་བའི་དོན་མཛད་ཚུལ་སྟེ། ཡིད་ཀྱི་མུན་སེལ་ལས། སྐུ་བསོད་ནམས་ཆེན་པོས་འདུལ་བ། ཐུགས་མངོན་པར་ཤེས་པ་ཆེན་པོས་འདུལ་བ། ཆོ་འཕྲུལ་བསམ་གྱིས་མི་ཁྱབ་པས་གདུལ་བ། གསུང་རིག་པས་འདུལ་བ་བཅས་བཞིར་གསུངས་སོ། །དཔལ་གསང་བའི་སྙིང་པོའི་རྒྱ་ཆེར་འགྲེལ་པ་ལས། རིག་པ་དང་། བསོད་ནམས་དང་། ཆོ་འཕྲུལ་དང་། མངོན་སུམ་པའི་འདུལ་བ་རྣམ་བཞིས་འགྲོ་བ་རྣམ་པ་ལྔའི་དོན་མཛད་དོ། །ཞེས་དང་། སྤར་ཁབ་ལས་ཀྱང་། སྐུས་འདུལ་བ། ཐུགས་ཀྱིས་འདུལ་བ། བསམ་གྱིས་མི་ཁྱབ་པས་འདུལ་བ། གསུང་གིས་འདུལ་བ་བཅས་བཞིར་གསུངས་པ་དང་། དཀོན་ཅོག་འགྲེལ་ལས། འདུལ་བ་རྣམ་པ་བཞིས་འགྲོ་བ་རྣམ་ལྔའི་དོན་མཛད་དེ་ཞེས་བྱ་བ་ལ། འདུལ་བ་རྣམ་པ་བཞི་ནི། བསོད་ནམས་ཀྱིས་འདུལ་བ་དང་། རྫུ་འཕྲུལ་གྱིས་འདུལ་བ་དང་། རིག་པས་འདུལ་བ་དང་། མངོན་སུམ་པས་འདུལ་བ་ཞེས་སྤྱིར་གྲགས་སོ། །འདི་ཉིད་ལས་ནི། མཛད་པ་ཆེན་པོ་བརྒྱད་དང་། མངོན་པར་ཤེས་པ་ཆེན་པོ་དྲུག་དང་། བསམ་གྱིས་མི་ཁྱབ་པ་བཞི་དང་། ཐེག་པ་ལྔའི་སྒོ་ནས་འདུལ་བར་གསུངས་ཏེ། དེ་ཡང་སྤྱིར་དོན་མཐུན་པར་སྣང་སྟེ། མཛད་པ་བརྒྱད་ཀྱིས་འདུལ་བ་ནི་བསོད་ནམས་ཐུན་མོང་མ་ཡིན་པར་འཕགས་པར་བསྟན་པ་ཡིན་ནོ། །མངོན་པར་ཤེས་པ་དྲུག་ནི་དོན་ཐམས་ཅད་མངོན་སུམ་པར་གྱུར་པས་འདུལ་བའོ། །བསམ་གྱིས་མི་ཁྱབ་པ་བཞི་ནི་རྫུ་འཕྲུལ་སྣ་ཚོགས་སུ་བསྟན་པས་འདུལ་བའོ། །ཐེག་པ་ལྔ་ནི་རིག་པ་དང་ལྡན་པའི་ཆོས་བསྟན་པ་སྟེ། དེ་བས་ན་དེ་དག་ཀྱང་གཞི་མཐུན་པར་འགྱུར་རོ། །ཞེས་གསུངས།
Domain	ཆོས་ལུགས།