65806

འདུལ་བ་སོ་སོར་ཐར་པའི་བྱེ་བྲག་འབྱེད་སྡོམ་རྒྱུད་ (1)

Part of speech

མིང་ཚིག

Definition

འདུལ་བ་རྒྱུད་དྲུག་གི་ནང་གསེས་(སོ་སོ་ཐར་པའི་བྱེ་བྲག་འབྱེད་སྡོམ་རྒྱུད)་ཅེས་པའི་གཞུང་འདི། མཛད་པ་པོ། གཡུང་དྲུང་བོན་གྱི་བསྟན་པའི་སྲོལ་འབྱེད་རྣམ་མཁྱེན་སྟོན་པ་གཤེན་རབ་མི་བོ་དེ་ཉིད་ཡིན། མཛད་པའི་དུས། ཕྱི་ལོའི་སྔོན་གཤེན་ལོ་སུམ་ཅུ་སོ་གཅིག་སྟེ་སྟོན་པ་རབ་ཏུ་བྱུང་བའི་དུས་སུ་གསུངས་པའོ། །གཞུང་འདིའི་བརྗོད་བྱ་ནི། སྡེ་སྣོད་གསུམ་གྱི་ནང་གསེས་འདུལ་བའི་སྡེ་སྣོད་དེ། ལྷག་པ་ཚུལ་ཁྲིམས་ཀྱི་བསླབ་པའི་ཁོངས་སུ་གཏོགས་པའི་ཕྱིའི་ཚུལ་དང་ནང་གི་ཁྲིམས་དང་འབྲེལ་བའི་དྲང་སྲོང་ཕོ་མོ་གཉིས་ཀྱི་བསྲུང་ཁྲིམས་བསྟན་པའོ། །(གཞུང་འདིར་སྡེ་ཚན་སོགས་མི་འདྲ་᪠འི་ལེའུ་གྲངས་སུ་བགྲང་ན་ཉེར་གཅིག་ཡོད་དེ།)འདུལ་བ་སོ་སོ་ཐར་པའི་བྱེ་བྲག་རྒྱུད་ལས་དང་པོའི་ལེའུ་སྟེ་གཅིག་པའོ། །འདུལ་བ་སོ་སོ་ཐར་པའི་བྱེ་བྲག་རྒྱུད་ལས། པར་པ་གྲངས་བྱེད་ལེའུ་སྟེ་གཉིས་པའོ། །འདུལ་བ་སོ་སོ་ཐར་པའི་བྱེ་བྲག་རྒྱུད་ལས། ཕུན་སུམ་ཚོགས་ལྡན་རྒྱུད་འབྱུང་ལེའུ་སྟེ་གསུམ་པའོ། །རབ་བྱུང་འདུལ་ཞུ་གསོལ་བའི་ལེའུ་སྟེ་བཞི་པའོ། །འདུལ་བ་ཐོབ་པ་བསྙེན་རྫོགས་ཀྱི་ལེའུ་སྟེ་ལྔ་པའོ། །སྲུང་ཐུབ་གཉེན་པོའི་ལེའུ་སྟེ་དྲུག་པའོ། །སྡོམ་ཉམས་གསོ་བྱེད་སྒྱུ་མའི་ལེའུ་སྟེ་བདུན་པའོ། །ཤེས་འབྱུང་དྲུག་ལྡན་ལེའུ་སྟེ་བརྒྱད་པའོ། །མཁས་པ་ཤེས་རིག་སྦྱངས་པའི་ལེའུ་སྟེ་དགུ་པའོ། །དགེ་སྤེལ་རིག་སྲུང་བརྟན་པར་བྱ་བའི་ལེའུ་སྟེ་བཅུ་པའོ། །ཁྱིམ་སྤངས་འཁོར་བ་བྱ་སྤུར་གྱི་ལེའུ་སྟེ་བཅུ་གཅིག་པའོ། །ཡུལ་སྤངས་ཐར་པ་ཐོབ་པའི་ལེའུ་སྟེ་བཅུ་གཉིས་པའོ། །དགེ་སྡིག་གྲོགས་ཀའི་སྤང་བླང་ལེའུ་སྟེ་བཅུ་གསུམ་པའོ། །སྨིན་པ་བྱང་ཆུབ་སྤྱོད་པའི་ལེའུ་སྟེ་བཅུ་བཞི་པའོ། །རྐྱེན་དྲག་འགྱུར་མེད་པ་རྡོ་རྗེ་སྲ་བྱེད་ལེའུ་སྟེ་བཅོ་ལྔ་པའོ། །ཆགས་སྲེད་ནོར་རྫས་རྐྱེན་བྲལ་ལེའུ་སྟེ་བཅུ་དྲུག་པའོ། །རྗེ་དཔོན་དབང་རྐྱེན་གྱིས་མི་ཟློག་པའི་ལེའུ་སྟེ་བཅུ་བདུན་པའོ། །བཅད་རིགས་སྲིད་ལུགས་ཀྱིས་མི་ཟློག་པའི་ལེའུ་སྟེ་བཅོ་བརྒྱད་པའོ། །ནད་གདོན་རྐྱེན་དབང་གི་མི་ཟློག་པའི་ལེའུ་སྟེ་བཅུ་དགུ་པའོ། །དད་པ་འཕོ་འགྱུར་སྤྲིན་དཔུང་དཔེ་བསྟན་པའི་ལེའུ་སྟེ་ཉི་ཤུ་ཐམ་པའོ། །འདུལ་བ་སོ་སོ་ཐར་པའི་བྱེ་བྲག་རྒྱུད་ལས། ཐེག་ཆེན་བཟང་རྐྱེན་དབང་གི་མི་ཟློག་པའི་ལེའུ་སྟེ་ཉེར་གཅིག་ཡོད་སྟེ། (སོ་སོ་ཐར་པའི་རྒྱུད་ལས། ) གླད་བདུན་གཞུང་བདུན་འཇུག་དོན་བདུན་ཏེ་ཉེར་གཅིག་གོ ། ཞེས་གསུངས་པ་ལྟར། གཞུང་འདིའི་སྔོན་འགྲོ་གླད་ཀྱི་དོན་ལ་ལེའུ་བདུན་དང་། དངོས་གཞི་གཞུང་གི་དོན་ལ་ལེའུ་བདུན། མཐའ་རྗེས་འཇུག་གི་དོན་ལ་ལེའུ་བདུན་དང་ལྷན་དུ་རྩིས་པས་ལེའུ་ཉེར་གཅིག་ཡོད་དོ། །