65849

འདུལ་འཛིན་འོད་ཟེར་རྒྱ་མཚོ་ (1)

Part of speech

མིང་ཚིག

Definition

རབ་བྱུང་དགུ་པའི་མེ་སྦྲུལ་ཕྱི་ལོ་ ༡༥༥༧ ལོར་འཁྲུངས། དགུང་ལོ་ཞེ་བདུན་པ་རབ་བྱུང་བཅུ་པའི་ཆུ་ཡོས་ཕྱི་ལོ་ ༡༦༠༣ ལོར་རྒྱལ་བ་བསོད་ནམས་རྒྱ་མཚོས་བཀའ་བཞིན་སྐུ་འབུམ་དགོན་གྱི་གདན་སའི་འགན་ཁུར། རབ་བྱུང་བཅུ་པའི་ཤིང་འབྲུག་ཕྱི་ལོ་ ༡༦༠༤ ལོར་བྱམས་མགོན་དགུང་ལོ་བདུན་པའི་ཚད་ཀྱི་སྣང་བརྙན་གཙུག་ལག་ཁང་དང་བཅས་པ་བཞེངས། དེང་སང་ཇོ་ཁང་ཞེས་གྲགས། རབ་བྱུང་བཅུ་པའི་ཆུ་བྱི་ཕྱི་ལོ་ ༡༦༡༢ ལོར་གདན་སའི་ཁྲི་སྟེང་བཞུགས། དཔལ་ལྡན་བཤད་སྒྲུབ་གླིང་ཞེས་པའི་མཚན་ཉིད་གྲྭ་ཚང་བཙུགས། ཆོས་ཐོག་གི་ཐོག་མ་དཔྱིད་ཆོས་དང་པོའི་གྲལ་འཛིན་མཛད། ཁ་དོག་དང་། བསྡུས་འབྲིང་། བསྡུས་ཆེན། རྟགས་རིགས། བློ་རིགས། གཞུང་གསར་བ། གཞུང་རྙིང་བ་ཞེས་རྣམ་འགྲེལ་ལ་འཛིན་གྲྭ་ལྔ་དང་། ཕར་ཕྱིན་ལ་འཛིན་གྲྭ་གཉིས་བཅས་བསྡོམས་འཛིན་གྲྭ་བདུན་དུ་ཕྱེས། འཛིན་གྲྭ་སོ་སོའི་སྐྱོར་དཔོན་བསྐོ་བཞག་མཛད། ཆོས་ཐོག་རེ་རེར་རྩོད་པ་ཇི་འགྲོའི་མཚམས་འཛིན་གྱི་རྩོད་ཡིག་ཀྱང་བཞག འཛིན་གྲྭ་སོ་སོར་བརྩི་བཞག་དང་བགྲོ་གླེང་དམ་བཅའ་རྣམས་ཆག་མེད་དུ་གནང་། ལུང་རྟོགས་ཀྱི་བསྟན་པ་བཤད་སྒྲུབ་འཆད་ཉན་བཟང་པོས་ལོ་ལྔའི་རིང་དུ་སྤེལ། ལོ་བཞིའི་རིང་དུ་ཟུར་བཞུགས་མཛད། རེ་ལྔ་པ་རབ་བྱུང་བཅུ་པའི་ལྕགས་བྱ་ཕྱི་ལོ་ ༡༦༢༡ ལོར་སླར་གདན་སའི་སེང་ཁྲིར་ཕེབས། འཆད་ཉན་ལོ་གཉིས་རིང་མཛད། རེ་བདུན་པ་རབ་བྱུང་བཅུ་པའི་ཆུ་ཕག་ཕྱི་ལོ་ ༡༦༢༣ ལོར་སྐུ་གཤེགས། སྐུ་འབུམ་དགོན་གྱི་གདན་རབས་ཁྲི་ཆེན་དང་པོ་དང་གསུམ་པ་གཉིས་ཀ་ཡིན།