67373

འཕགས་ལམ་ཡན་ལག་བརྒྱད་ (1)

Part of speech	མིང་ཚིག
Definition	མདོ། མཚན་ཉིད། སྒོམ་ལམ་དུ་གསར་དུ་མངོན་དུ་གྱུར་པའི་ཡོན་ཏན་གྱི་རིགས་གང་ཞིག འཕགས་ལམ་གྱི་ཆ་ཤས་སུ་གྱུར་པ། དབྱེ་ན། ཡང་དག་པའི་ལྟ་བ་དང། ཡང་དག་པའི་རྟོགས་པ། ཡང་དག་པའི་ངག ཡང་དག་པའི་ལས་ཀྱི་མཐའ། ཡང་དག་པའི་འཚོ་བ། ཡང་དག་པའི་རྩོལ་བ། ཡང་དག་པའི་དྲན་པ། ཡང་དག་པའི་ཏིང་ངེ་འཛིན་དང་བརྒྱད། ས་མཚམས། ཉན་ཐོས་ཀྱི་སྒོམ་ལམ་ནས་སངས་རྒྱས་ཀྱི་སའི་བར་དུ་ཡོད་ཅིང། སྒོམ་ལམ་གྱི་སྐབས་སུ་ནི་རྣམ་དག་ངེས་འབྱིན་གྱི་ལམ་དུ་འཇོག་གོ་ཞེས་ཀུན་མཁྱེན་གོ་རམས་པའི་སྦས་དོན་རབ་གསལ་ལས་སོ། ། སྒོམ་ལམ་གྱི་འཕགས་ལམ་ཡན་ལག་བརྒྱད་ནི། རྣམ་དག་ངེས་འབྱིན་གྱི་ལམ་ཡིན་ཏེ། སྒོམ་སྤང་དག་པར་བྱེད་པའི་མངོན་རྟོགས་ཡིན་པའི་ཕྱིར། ཆོས་ཅན་བཤད་པ་ལ། དམིགས་པ་ནི་འཕགས་པའི་བདེན་པ་བཞིའོ། །ངོ་བོ་ལ་ཡང་དག་པའི་ལྟ་བ་ནི་ཡོངས་སུ་གཅོད་པའི་ཡན་ལག་ཡིན་ཏེ། མཉམ་གཞག་ཏུ་རྟོགས་པའི་དེ་ཁོ་ན་ཉིད་ངེས་པར་འཛིན་པའི་ཕྱིར་རོ། །རྟོག་པ་ནི་གཞན་གོ་བར་བྱེད་པའི་ཡན་ལག་ཡིན་ཏེ། ཇི་ལྟར་རྟོགས་པའི་དོན་སྟོན་པའི་ངག་ཀུན་ནས་སློང་བའི་ཕྱིར། ངག་དང་ལས་ཀྱི་མཐའ་དང་འཚོ་བ་གསུམ་ནི། གཞན་ཡིད་ཆེས་པར་བྱེད་པའི་ཡན་ལག་ཡིན་ཏེ། དང་པོས་ནི་གཞན་གྱིས་དྲི་བའི་ལན་ལུང་སྟོན་པས་ལྟ་བ་རྣམ་དག་དང་། གཉིས་པས་ནི། སྤྱོད་པ་ཕུན་སུམ་ཚོགས་པས་ཚུལ་ཁྲིམས་རྣམ་དག་དང་། གསུམ་པས་ནི། ལོག་འཚོ་སྤངས་ཏེ་དེ་བཞིན་གཤེགས་པས་ཇི་ལྟར་གནང་བ་བཞིན་དུ་ལོངས་སྤྱོད་པས་འཚོ་བ་རྣམ་དག་ཏུ་ཡིད་ཆེས་པའི་ཕྱིར་རོ། །རྩོལ་བ་ནི་ཉོན་མོངས་པའི་སྒྲིབ་པ་སྤོང་བའི་ཡན་ལག་ཡིན་ཏེ། ཀུན་སྦྱོར་ལྷག་མ་རྣམས་སྤོང་བའི་ཕྱིར་རོ། །དྲན་པ་ནི་ཉེ་བའི་ཉོན་མོངས་པ་རྣམ་པར་སྦྱོང་བའི་ཡན་ལག་ཡིན་ཏེ། ཞི་གནས་ཀྱི་མཚན་མ་མ་བརྗེད་པས་བྱིང་རྒོད་སོགས་ཀྱི་གོ་སྐབས་མི་འབྱེད་པའི་ཕྱིར་རོ། །ཏིང་ངེ་འཛིན་ནི་ཡོན་ཏན་ཁྱད་པར་ཅན་ལ་སྒྲིབ་པ་སྦྱོང་བའི་ཡན་ལག་ཡིན་ཏེ། མངོན་པར་ཤེས་པ་ལ་སོགས་པའི་ཡོན་ཏན་མངོན་པར་བསྒྲུབ་པའི་ཕྱིར་རོ། །འདི་མཐོང་ལམ་ནས་ཐོབ་ཀྱང་། སྒོམ་ལམ་ནས་མངོན་དུ་འགྱུར་བས་སྒོམ་ལམ་དུ་བཞག་གོ ། གྲོགས་ནི་དེ་གཉིས་དང་མཚུངས་པར་ལྡན་པའི་ཆོས་རྣམས་སོ། །སྒོམ་ཚུལ་ནི། སྡུག་བསྔལ་ལ་དམིགས་ནས་དེས་དབེན་པ་ཚོལ་བ་ལ་གནས། ཀུན་འབྱུང་ལ་དམིགས་ནས་དེ་དང་འབྲལ་བར་འདོད་པ་དང་། འགོག་པ་ལ་དམིགས་ནས་མངོན་དུ་བྱེད་པར་འདོད་པ་དང་། ལམ་བདེན་ལ་དམིགས་ནས་ཉོན་མོངས་རྣམ་པར་སྤོང་བས་ཡོངས་སུ་བསྒྱུར་བར་གནས་པའོ། །འབྲས་བུ་སྒོམ་སྤང་སྤངས་པ་སོགས་སོ་ཞེས་ཀུན་མཁྱེན་རོང་སྟོན་གྱི་རྣམ་བཤད་ཚིག་དོན་རབ་གསལ་ལས་སོ། །
Domain	ཆོས་ལུགས།