67504

འཕེན་རྫོགས་ཀྱི་ལས་ (1)

Part of speech	མིང་ཚིག
Definition	མདོ། མངོན་པ། དགུ་པ་འཕེན་བྱེད་དང་རྫོགས་བྱེད་ཀྱི་དབྱེ་བ་ནི་ཅི་ལས་གཅིག་གིས་སྐྱེ་བ་གཅིག་ཁོ་ན་འཕེན་ནམ། འོན་ཏེ་དུ་མའང་འཕེན། དེ་བཞིན་དུ་ལས་དུ་མས་ཀྱང་སྐྱེ་བ་དུ་མ་ཁོ་ན་འཕེན་ནམ། འོན་ཏེ་གཅིག་ཀྱང་འཕེན་ཞེ་ན། ལས་གཅིག་གིས་སྐྱེ་བ་གཅིག་ཁོ་ན་འཕེན་པར་བྱེད་ཀྱི་ལས་གཅིག་གིས་སྐྱེ་བ་དུ་མ་འཕེན་པའང་མེད་ལ། རིས་མཐུན་པ་དུམ་བུར་འཕེན་དུ་འོང་བས་ན་ལས་དུ་མས་སྐྱེ་བ་གཅིག་འཕེན་པའང་མེད་དོ། །ཞེས་བྱ་བ་ནི་བྱེ་བྲག་ཏུ་སྨྲ་བའི་ཡིན་ནོ། །ལས་གཅིག་གིས་འཕངས་པའི་རིས་མཐུན་པའི་སྐྱེ་བ་དེའི་ཁྱད་པར་གྱི་ཆོས་ཡོངས་སུ་རྫོགས་པར་བྱེད་པའི་ལས་ནི་དུ་མ་ཡིན་ཏེ། དཔེར་ན་རི་མོ་མཁན་དག་སྐྱ་རིས་རི་ལུ་གཅིག་གིས་བྱས་ནས་ཚོན་སྣ་ཚོགས་ཀྱིས་རྫོགས་པར་བྱེད་པ་ལྟར་མིར་མཚུངས་ཀྱང་ཁ་ཅིག་གཟུགས་བཟང་བ་དང་དབང་པོ་ཚང་བ་དང་ལོངས་སྤྱོད་ཆེ་བ་དང་ནད་མེད་པ་དང་དབང་ཐང་ཕུན་སུམ་ཚོགས་པ་ལ་སོགས་པ་ཡིན་ལ། ཁ་ཅིག་ནི་གཟུགས་ངན་པ་ལ་སོགས་པ་ཡིན་ནོ། །གཟུགས་བཟང་བ་ལ་སོགས་པ་ནི་དགེ་བས་རྫོགས་པར་བྱེད་ལ། ངན་པ་ལ་སོགས་པ་ནི་མི་དགེ་བས་རྫོགས་པར་བྱེད་དོ། །འདི་ལ་འཕེན་བྱེད་དགེ་བས་བྱས་ལ་རྫོགས་བྱེད་མི་དགེ་བས་བྱས་པའང་ཡོད་དེ་ལྷ་དང་མི་དབུལ་པོ་དང་ནད་པ་ལ་སོགས་པ་ལྟ་བུའོ། །རྫོགས་བྱེད་དགེ་བས་བྱས་ལ་འཕེན་བྱེད་མི་དགེ་བས་བྱས་པའང་ཡོད་དེ་ཡི་དྭགས་ནི་ཆོས་ཀྱི་རྒྱལ་པོ་གཤིན་རྗེ་དང་། དུད་འགྲོ་ནི་ཀླུའི་རྒྱལ་པོ་ནོར་རྒྱས་ལ་སོགས་པ་ལྟ་བུའོ། །གཉིས་ཀ་དགེ་བས་བྱས་པ་ནི་ལྷའི་དབང་པོ་བརྒྱ་བྱིན་ལ་སོགས་པ་ལྟ་བུའོ། །གཉིས་ཀ་མི་དགེ་བས་བྱས་པ་ནི་དམྱལ་བ་མནར་མེད་ལྟ་བུའོ། །མདོ་སྡེ་པ་དང་ཐེག་པ་གོང་མ་པ་དག་ནི་ལས་གཅིག་གིས་སྐྱེ་བ་དུ་མ་འཕེན་པ་མདོ་དེ་དང་དེ་ལས་རྣམ་པ་དུ་མ་བཤད་པའི་ཕྱིར་ལས་གཅིག་གིས་སྐྱེ་བ་དུ་མ་འཕེན་པ་དང་། གཅིག་གིས་གཅིག་འཕེན་པའང་ཡོད་དེ་ཞེས་བྱ་བ་འདི་འདོད་པ་ཡིན་ནོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།