67975

འབའ་རོམ་པ་ཆོས་རྗེ་དར་མ་དབང་ཕྱུག་ (1)

Part of speech

མིང་ཚིག

Definition

ཆོས་རྗེ་འབའ་རོམ་པ་དར་མ་དབང་ཕྱུག་མཆོག་ནི། འཕན་ཡུལ་མདར། ཡབ་སྟོན་པ་འབྱུང་གནས་བློ་གྲོས་དང་། ཡུམ་ཇོ་མོ་ལོ་ཆུང་མ་གཉིས་ཀྱི་སྲས་སུ་རབ་བྱུང་གཉིས་པའི་མེ་ལུག་ ༡༡༢༧ ལོར་འཁྲུངས། དགུང་ལོ་བརྒྱད་པ་ལ་མཁན་པོ་ཀ་བ་དར་མ་སེངྒེ་ལས་རབ་ཏུ་བྱུང། མཚན་དར་མ་དབང་ཕྱུག་ཏུ་གསོལ། དགེ་བཤེས་བྱ་ཡུལ་བ་དང་པོ་ཏོ་བའི་བུ་ཆེན་གྲུ་འབུ་ལུང་པ་ལས་བཀའ་གདམས་པའི་ཆོས་སྐོར་རྣམས་གསན། ཉེར་གཅིག་ལ་སྒམ་པོར་ཕེབས་ཤིང་། སྒམ་པོ་བ་དང་མཇལ་ནས་ཐུགས་ཀྱིས་བཟུང་ཞིང་དམར་ཁྲིད་ཀྱིས་བསྐྱངས་པས། རྟོགས་པ་མཆོག་ཏུ་གྱུར། སྒམ་པོ་པ་གཤེགས་རྗེས་དགུང་ལོ་ཉེར་བརྒྱད་པ་ལ་བླ་མས་ལུང་བསྟན་པའི་གནས་བྱང་འབའ་རོམ་དུ་བྱོན་ཏེ། རྫ་དེའུ་རིན་ཆེན་སྤུངས་སུ་ལོ་བདུན་སྒྲུབ་པ་མཛད། ཕལ་ཆེར་ཏིང་ངེ་འཛིན་གྱིས་འཚོ་བ་བྱུང་། དེ་སྐབས་བཀའ་བརྒྱུད་ཀྱི་བླ་མའི་གསོལ་འདེབས་མགུར་ཆེན་ཉི་ཤུ་རྩ་དགུའི་སྐོར་གསུང་། དེ་ནས་ཁམས་སུ་སྔ་རྗེས་ལན་གསུམ་བྱོན། སྐྱོ་བྲག་དཀར་ལ་ལོ་གསུམ་བཞུགས། སྟག་སྒོམ་སོགས་གདུལ་བྱ་མང་པོ་སྨིན་གྲོལ་ལ་བཀོད། སླར་ལ་སྟོད་བྱང་འབའ་རོམ་དུ་ཕེབས་ནས་དགོན་པ་བཏབ། སློབ་མ་མང་དུ་འདུས་པ་ལ་བདེ་སྟོང་ཕྱག་རྒྱ་ཆེན་པོ་དང་གནས་ལུགས་ཕྱག་རྒྱ་ཆེན་པོ་མདོ་སྔགས་ཟུང་འབྲེལ་དུ་བསྟན་པས། འབའ་རོམ་བཀའ་བརྒྱུད་ཅེས་པའི་གྲུབ་མཐའ་དང་། མཐར་དགུང་ལོ་དོན་གསུམ་པ་ས་ལུག་ ༡༡༩༩ ལོའི་ཟླ་བ་གཉིས་པའི་ཚེས་གཉིས་ཀྱི་ནམ་ཕྱེད་ལ་ངོ་མཚར་བའི་ལྟས་དུ་མ་དང་བཅས་ཏེ་ཞི་བར་གཤེགས་སོ། །སློབ་མ་ཡང་འགྲན་ཟླ་མེད་པ་ཏི་ཤྲི་རས་པ་དང་། གཞན་ཡང་བུ་ཆེན་བཞི། དེ་དང་ཉེ་བ་བཞི། བརྒྱུད་འཛིན་གྱི་སྲས་ལྔ་སོགས་ཤིན་ཏུ་མང་པོ་བྱུང་ཤིང། གདན་ས་ལ་གཅུང་ཇོ་བཙུན་ནམ་མཁའ་རྒྱལ་མཚན་དང་། བླ་མ་གྲགས་པ་ཤེས་རབ་བྱང་ཆུབ་སོགས་དབོན་རྒྱུད་རྣམས་རིམ་པར་ཕེབས་ནས་ཕྱིས་ཀྱི་བར་དུ་བསྟན་པ་དར་རྒྱས་བྱུང་ངོ་། །