68622

འབྲས་བུ་སོ་སོའི་རྒྱུ་ (1)

Part of speech	མིང་ཚིག
Definition	མདོ། མངོན་པ། རྒྱུ་དུ་ཞིག་གིས་འབྲས་བུ་གང་ཞིག་སྐྱེད་ཅེ་ན། འབྲས་བུ་རྣམས་ནི་མཚུངས་ལྡན་སེམས་དང་སེམས་བྱུང་དང་། དེ་མ་ཡིན་པ་གཉིས་སུ་ངེས་སོ། །དེ་དག་ཀྱང་རྣམ་པ་བཞི་བཞིར་ངེས་ཏེ། ཉོན་མོངས་ཅན་དང་། རྣམ་སྨིན་སྐྱེས་དང་། ཟག་མེད་དང་པོ་དང་། དེ་དག་གི་ལྷག་མའོ། །དེ་ལ་མཚུངས་ལྡན་སེམས་སེམས་བྱུང་ཉོན་མོངས་ཅན་ནི་རིམ་པ་བཞིན་དུ་རྣམ་སྨིན་གྱི་རྒྱུ་མ་གཏོགས་པ་ལྷག་མ་ལྔ་ལས་སྐྱེ་སྟེ་རྣམ་སྨིན་གྱི་རྒྱུ་ལས་མི་སྐྱེ་བ་ནི་ཉོན་མོངས་ཅན་རྣམ་སྨིན་གྱི་འབྲས་བུར་མི་རིགས་པའི་གཏན་ཚིགས་ཀྱི་ཕྱིར་རོ། །རྣམ་པར་སྨིན་པ་ལས་སྐྱེས་པ་རྣམས་ནི་རིམ་པ་བཞིན་དུ་ཀུན་འགྲོའི་རྒྱུ་མ་གཏོགས་པ་ལྷག་མ་ལྔ་ལས་སྐྱེ་སྟེ། ཀུན་འགྲོ་ལས་མི་སྐྱེ་བ་ནི་ཉོན་མོངས་ཅན་མ་ཡིན་པའི་ཕྱིར་རོ། །ལྷག་མ་ནི་རྣམ་སྨིན་སྐྱེས་མ་གཏོགས་པའི་མ་བསྒྲིབས་ལུང་མ་བསྟན་སྤྱོད་ལམ་པ་དང་། བཟོའི་གནས་པ་དང་། སྤྲུལ་སེམས་ལ་སོགས་པ་རྣམས་དང་། ཟག་མེད་ཀྱི་སྐད་ཅིག་མ་དང་པོ་ལས་གཞན་པའི་དགེ་བ་རྣམས་ཏེ། དེ་དག་ནི་རིམ་པ་བཞིན་དུ་རྣམ་སྨིན་དང་ཀུན་འགྲོའི་རྒྱུ་དེ་གཉིས་མ་གཏོགས་པ་ལྷག་མ་བཞི་ལས་སྐྱེ་སྟེ། དེ་གཉིས་ལས་མི་སྐྱེ་བ་རྣམ་སྨིན་སྐྱེས་དང་ཉོན་མོངས་ཅན་མ་ཡིན་པའི་ཕྱིར་རོ། །དང་པོ་འཕགས་པ་ནི་སྡུག་བསྔལ་ལ་ཆོས་ཤེས་པའི་བཟོད་པའི་སྐད་ཅིག་མ་དང་པོ་སྟེ་དེའི་སེམས་དང་སེམས་ལས་བྱུང་བ་ནི་རིམ་པ་བཞིན་དུ་རྣམ་སྨིན་དང་ཀུན་འགྲོའི་རྒྱུ་དེ་གཉིས་དང་སྐལ་མཉམ་གྱི་རྒྱུ་མ་གཏོགས་པ་ལྷག་མ་གསུམ་ལས་སྐྱེ་སྟེ། སྐལ་མཉམ་ལས་མི་སྐྱེ་བ་ནི་འཇིག་རྟེན་ཆོས་མཆོག་མན་ཆད་ཟག་བཅས་ཡིན་པས་དེ་དག་གི་རྒྱུ་མཐུན་ལས་མ་བྱུང་བས་རིས་མི་འདྲ་བའི་ཕྱིར་རོ། །རྣམ་སྨིན་དང་ཀུན་འགྲོ་ལས་མི་སྐྱེ་བ་ནི་དེ་དགེ་བ་ཡིན་པའི་ཕྱིར་རོ། །དེ་དག་ནི་སེམས་དང་སེམས་ལས་བྱུང་བའི་དབང་དུ་བྱས་པ་ཡིན་ནོ། །ཇི་ལྟར་སེམས་དང་སེམས་བྱུང་ལ་བཤད་པ་ལྟར་སེམས་དང་སེམས་བྱུང་ལས་གཞན་ལའང་དེ་བཞིན་དུ་ཤེས་པར་བྱའོ་ཞེས་སྦྱར་ཏེ། དེ་ལ་གཞན་ནི་མི་ལྡན་པའི་འདུ་བྱེད་དང་གཟུགས་སོ། །ཐམས་ཅད་དུ་འདྲའམ་ཞེ་ན། མཚུངས་ལྡན་གྱི་རྒྱུ་ནི་མ་གཏོགས་ཏེ། དེ་དག་ནི་སེམས་དང་སེམས་བྱུང་མ་ཡིན་པའི་ཕྱིར་དང་། མཚུངས་ལྡན་གྱི་རྒྱུ་ཡང་དེ་དག་ལ་བརྗོད་པའི་ཕྱིར་རོ། །ཟག་མེད་སྐད་ཅིག་མ་དང་པོའི་གཟུགས་དང་མི་ལྡན་པའི་འདུ་བྱེད་ནི་ཟག་མེད་ཀྱི་སྡོམ་པ་དང་པོར་ཐོབ་པ་དང་སེམས་སེམས་བྱུང་དང་སྡོམ་པ་དེ་དག་གི་ཐོབ་པ་དང་མཚན་ཉིད་ལ་སོགས་པ་ལ་འདོད་དོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།