69221

འབྲོམ་རྒྱལ་བའི་འབྱུང་གནས་ (1)

Part of speech

མིང་ཚིག

Definition

དགེ་བཤེས་སྟོན་པའམ་འབྲོམ་སྟོན་པ་རྒྱལ་བའི་འབྱུང་གནས་ནི། རབ་བྱུང་དང་པོའི་གོང་གི་ལོ་སྐོར་ཐ་མའི་ཤིང་འབྲུག་ཕྱི་ལོ ༡༠༠༤ ལོ་ནས་རབ་བྱུང་དང་པོའི་ཤིང་འབྲུག་ཕྱི་ལོ ༡༠༦༤ ལོ་བར། དགུང་ལོ་དྲུག་ཅུ་རེ་གཅིག་བཞུགས། འཁྲུངས་ཡུལ་ནི་བྱང་གི་གཉན་ཆེན་ཐང་ལྷའི་འོག་རྩ་སྒྱེ་མོ་ཞེས་པ་ཡིན་ཞིང་། རུས་ཡང་གཞེར། ཡབ་རྟ་གསུམ་སྐུ་གཤེན་དང་ཡུམ་ཁུ་འོད་བཟའ་ལན་གཅིག་མ་གཉིས་ཀྱི་སྲས་སུ་འཁྲུངས། ཆུང་དུ་ནས་ཡུམ་གཤེགས་རྗེས་ཡབ་ཀྱིས་མ་ཡར་གཅིག་བླངས་པས་རྒྱུན་དུ་སྡང་པོ་བྱས་པའི་རྐྱེན་གྱིས་ཁམས་སུ་བྲོས་ཕེབས། བླ་མ་སེ་བཙུན་གྱི་སར་བཞུགས་ནས་ཉིན་མོ་ནང་གཡོག རྟ་ཕྱུགས་གསོ་བ། ཕྱེ་འཐག་པ་སོགས་མཛད་པའི་ཞོར་ལ་སློབ་སྦྱོང་དང་མ་བྲལ་བར་གནང༌། མཚན་མོར་བླ་མའི་ཞིང་སྲུང་སོགས་མཛད་དེ་བླ་མའི་ཞབས་འདེགས་དང་རང་ཉིད་ཀྱི་སློབ་གཉེར་འཐུས་ཤོར་མེད་པ་མཛད། ཞོར་ལ་པནྜིཏ་སྨྲི་ཏི་ལས་སྒྲ་རིག་པ་དང་སཾ་སྐྲི་ཏའི་སྐད་བསླབས། དེ་ནས་མངའ་རིས་སུ་ཇོ་བོ་རྗེ་ཨ་ཏི་ཤ་ཕེབས་པ་གསན་ཏེ་ཁམས་ནས་མངའ་རིས་སུ་ཞབས་ཐང་གིས་མགྱོགས་པོར་ཕེབས་པས། ཇོ་བོ་རྗེ་ཉིན་གཉིས་གསུམ་ནས་མ་འགྱངས་པར་རྒྱ་གར་དུ་ཕྱིར་ཕེབས་གནང་ཉེའི་དུས་སུ་པུ་ཧྲེངས་རྒྱ་ཞིང་ཟེར་བའི་གྲོང་གི་ནང་དུ་མཇལ། དེ་ནས་དབུས་གཙང་གི་དགེ་བཤེས་མཁས་པ་ཚོར་ཇོ་བོ་རྗེ་ལྟ་བུའི་པནྜི་ཏ་རྒྱ་གར་ནས་བོད་དུ་ཕེབས་པ་ཐེངས་གཅིག་ཡིན་པས་ངེས་པར་དུ་བོད་དབུས་གཙང་དུ་གདན་འདྲེན་ཞུ་དགོས་ཞེས་ཕྱག་བྲིས་གནང་བ་ལྟར་དབུས་གཙང་གི་མཁས་པ་རྣམས་ཀྱིས་ཇོ་བོ་བོད་དབུས་གཙང་དུ་གདན་དྲངས། དེ་ནས་ཇོ་བོ་རྗེ་ཁུ་སྟོན་བརྩོན་འགྲུས་གཡུང་དྲུང་གི་སར་ཟླ་བ་གསུམ་ཙམ་བཞུགས་ཡུན་མ་གཏོགས་སྐུ་ཚེ་གཅིག་རིང་འབྲོམ་གྱིས་ནང་གཡོག་གཙོ་བོར་མཛད་དེ། ཞར་ལ་གོ་སྐབས་བྱུང་ཚེ་ཆོས་ཞུ་བར་མཛད། ཇོ་བོ་རྗེ་སྐུ་མྱ་ངན་ལས་འདས་ནས་སྐུ་གདུང་དང་ཕྱག་དཔེ་སོགས་སློབ་མ་ཚོར་གནང་དགོས་རིགས་གནང་ནས་སྐུ་གདུང་ཐུགས་དམ་རྟེན་བཅས་དང༌། ཇོ་བོས་གསོ་སྐྱོང་གནང་བའི་སློབ་མ་ཚོགས་པ་ཁག་རྣམས་ཁྲིད་དེ་རྭ་སྒྲེང་དུ་ཕེབས། རབ་བྱུང་དང་པོའི་མེ་བྱ་ཕྱི་ལོ ༡༠༥༧ ལོར་རྭ་སྒེང་དགོན་པ་བཏབ། དངུལ་གྱི་མཆོད་རྟེན་ཞིག་གི་ནང་ཇོ་བོའི་སྐུ་གདུང་རྣམས་བཞུགས། དེ་ནས་ཇོ་བོའི་སློབ་མ་རྣམས་འབྲོམ་གྱིས་ཆོས་དང་འཚོ་བ་གཉིས་ཀའི་སྒོ་ནས་བསྐྱངས། སྐུ་ཚེ་གཅིག་གི་རིང་རྟེན་དགེ་བསྙེན་དུ་བཞུགས་པ་ལས་རབ་བྱུང་མ་མཛད་ཀྱང་བསླབ་ཁྲིམས་བསྲུང་བ་ལ་དགེ་སློང་ལས་ཀྱང་ལྷག་པ་མཛད། མཐར་དགུང་ལོ་རེ་གཅིག་པ་ལ་རྭ་སྒྲེང་དུ་སྐུ་གཤེགས།

{{#arraymap:འབྲོམ་རྒྱལ་བའི་འབྱུང་གནས་

|; |@@@ | | }}