69455

འཛམ་བུའི་གླིང་ (1)

Part of speech	མིང་ཚིག
Definition	མདོ། མངོན་པ། འཛམ་བུ་གླིང་འདི་ནས་རི་ནག་པོ་དགུ་འདས་པའི་ཕ་རོལ་ན་རི་བོ་གངས་ཅན་ཡོད་ལ། དེའི་བྱང་ངོས་ན་རི་སྤོས་ངད་ལྡན་པ་ཡོད་པའི་ཚུ་རོལ་ན་ཀླུའི་རྒྱལ་པོ་མ་དྲོས་པའི་གནས་མཚོ་མ་དྲོས་པ་ཞེས་བྱ་བ་ཡན་ལག་བརྒྱད་དང་ལྡན་པའི་ཆུས་གང་བ། ཆུ་དང་། ཞེང་དང་། ཟབས་སུ་དཔག་ཚད་ལྔ་བཅུ་ཡོད་པ། མཐའ་ཉིས་བརྒྱས་འཁོར་བ་གྲུ་བཞི་པ། ཆུ་བོ་ཆེན་པོ་བཞི་ཆུ་བྲན་ལྔ་བརྒྱ་དང་བཅས་ནས་མཚོ་ལ་བསྐོར་བ་ལན་གསུམ་བྱས་ནས་ཕྱིའི་རྒྱ་མཚོར་འབབ་པར་བཤད་ལ། ཕལ་པོ་ཆེར་ནི་ལན་བདུན་བདུན་བསྐོར་བར་བཤད་དོ། །དེའི་འགྲམ་ན་ཤིང་འཛམ་བུ་བྲྀཀྵ་ཞེས་བྱ་བ་འབྲས་བུ་མངར་པོ་རྫ་མ་ཙམ་དང་ལྡན་པ་དེ་སྨིན་པ་ཆུར་ལྷུང་བ་ལས་འཛམ་བུ་ཞེས་པའི་སྒྲ་དང་། འཛམ་བུ་ཆུ་བོའི་གསེར་དྲི་མ་མེད་པ་འབྱུང་སྟེ། དེས་མཚོན་པའི་གླིང་ལ་འཛམ་བུའི་གླིང་ཞེས་བྱའོ། །ཞེས་པ་ནས། གླིང་འདིའི་དབུས་སུ་བྱང་ཆུབ་སེམས་དཔའ་སྲིད་པ་ཐ་མ་པས་རྡོ་རྗེ་ལྟ་བུའི་ཏིང་ངེ་འཛིན་སྐྱེད་པའི་གནས་རྡོ་རྗེ་གདན་གྱི་སྤོ་ཞེས་པ་མེ་ལ་སོགས་པས་མ་འཇིག་པར་མངོན་པར་གྲུབ་པས་གླིང་གཞན་དུ་སངས་རྒྱས་མི་འབྱུང་བ་དང་། ཤར་དུ་རི་བོ་རྩེ་ལྔ་ཞེས་པ་འཇམ་པའི་དབྱངས་ཀྱི་གནས་དང་། ལྷོ་རུ་རི་བོ་གྲུ་འཛིན་ཞེས་པ་སྒྲོལ་མའམ་སྤྱན་རས་གཟིགས་ཀྱི་གནས་དང་། ནུབ་ཏུ་ཨུརྻ་ན་ཞེས་པ་རིགས་གསུམ་མགོན་པོའི་གནས་དང་། དུས་འཁོར་བ་ལྟར་ན་བྱང་དུ་ཤམྦྷ་ལ་ཞེས་པའི་རིགས་ལྡན་གྱི་རྒྱལ་པོའི་གནས་རྣམས་ཡོད་དོ། །གཞན་ཡང་གླིང་འདིར་ཐོ་དཀར་དང་། རྒྱ་ཡུལ་དང་། ཧུ་ལུ་ན་དང་། སྐམ་པོ་རྩེ་དང་། ཤ་ཁ་དང་། སྦལ་པ་དང་། ཁྱི་གདོང་དང་། ཀྲི་ཝ་ཤ་རི་ཀ་དང་། གནམ་གདོང་དང་། ཕྱིར་ཕྱོགས་གདོང་དང་། བཤོག་ཐོབ་གཅེར་བུ་དང་། རྒུར་ཏེ་འགྲོ་བ་དང་། སྣ་མེད་དང་། ཀློ་ཁ་ཀྲ་ལ་སོགས་པ་ཡུལ་ཆེན་པོ་བཅུ་དྲུག་དང་། ཡུལ་ཕྲན་སྟོང་ཕྲག་དང་བཅས་པ་དང་གྲོང་ཁྱེར་ཆེན་པོ་དྲུག་གིས་བརྒྱན་པའི་ཡུལ་དབུས་དང་མཐའ་འཁོབ་ཀྱིས་རབ་ཏུ་ཕྱེ་བའི་མི་རིགས་དང་། སྐད་རིགས་སྣ་ཚོགས་པ་དང་། ལྷོ་ཕྱོགས་ན་རི་རྒྱལ་མ་ལ་ཡ་ཞེས་པ་དུག་གསུམ་ཤས་ཆེ་བའི་རྟགས་སུ་རྩེ་མོ་ན་ཕུག་རོན་དང་། རྐེད་པ་ན་སྦྲུལ་དང་། རྩ་བ་ན་ཕག་གནས་པ་དང་། གཞན་ཡང་རི་བྱ་རྐང་དང་། འབིགས་བྱེད་དང་། མནྡ་ར་བ་ལ་སོགས་པ་དུ་མས་བརྒྱན་པའོ་ཞེས་ཀུན་མཁྱེན་གོ་རམས་པའི་ངོ་མཚར་སུམ་ལྡན་ལས་སོ། །
Domain	ཆོས་ལུགས།