69478

འཛི་སྒར་གསུམ་པ་མི་ཕམ་ཕྲིན་ལས་དཔལ་འབྱོར་ (1)

Part of speech

མིང་ཚིག

Definition

འཛི་སྒར་སྐུ་ཕྲེང་གསུམ་པ་མི་ཕམ་ཕྲིན་ལས་དཔལ་འབྱོར་མཆོག་ནི། ལྷ་ཐོག་དཔོན་པདྨ་དབང་གི་སྲས་སུ་རབ་བྱུང་བཅུ་གཉིས་པའི་ལྕགས་བྱི་ ༡༧༢༠ ལོར་འཁྲུངས། དགུང་ལོ་བཞིར་ཕེབས་སྐབས། རྒྱལ་དབང་བདུན་པ་དཀར་བརྒྱུད་ཕྲིན་ལས་ཤིང་རྟས་གོང་མའི་ཡང་སྲིད་དུ་ངོས་འཛིན་གསལ་པོར་མཛད། དགུང་ལོ་བདུན་པ་ལ་གདན་སར་སྤྱན་དྲངས་ཤིང་མངའ་གསོལ། རིམ་གྱིས་དབུས་སུ་ཕེབས་ནས་རྒྱལ་དབང་བདུན་པ་དཀར་བརྒྱུད་ཕྲིན་ལས་ཤིང་རྟའི་ཞབས་དྲུང་དུ་དབང་ཆོས་ཀྱི་རིམ་པ་མང་པོ་གསན། ཙ་རི་ཅིག་ཅར་དུ་སྐུ་མཚམས་ལ་བཞུགས་དུས། གཏོར་སྒམ་གྱི་ཐོག་ཏུ་དཔལ་ལྡན་ལྷ་མོ་སྐུ་རྒྱན་རྣམས་ཀྱི་ཁྲོབ་སྒྲ་དང་བཅས་མངོན་སུམ་དུ་བཞུགས་པའི་གཟིགས་སྣང་བྱུང༌། མཚན་ལམ་དུའང་དག་པའི་ཞིང་གཟིགས་པ་བྱུང་ཚུལ་གསུངས་པ་རྣམས་ནི་བརྗོད་ཀྱིས་མི་ལང༌། གཞན་གྱིས་མཐོང་བ་ཡང་སེར་བ་བྱུང་བའི་ཚེ། སྐུ་སྲུང་གི་ཕུར་པ་གདེང་བར་མཛད་པ་ལས་ཧྲེམ་སྒྲ་དང་བཅས་ཏེ་མེ་འབར་བར་མཐོང་བ་སོགས་ངོ་མཚར་ཅན་ཞིག་ནའང༌། སྐུ་གཅོང་དམ་པོས་ཟིན་པ་རིམ་ཐུ་ནས། སྒ་ཉག་ཏུ་ཕེབས་རྩིས་ཀྱིས་ཆིབས་ཁ་བསྒྱུར་བའི་ལམ་དུ་དགུང་ལོ་ཉེར་གཅིག་པ་ལྕགས་སྤྲེལ་ ༡༧༤༠ ལོའི་བོད་ཟླ་བཞི་པའི་ཉི་ཤུ་ལ་སྐུ་གཤེགས་སོ། །གདུང་བཞུ་བའི་ཚེ་འཇའ་སྤྲིན་དར་ཁྲ་བརྐྱངས་པ་ལྟར་རི་རྩེ་ཕན་ཚུན་སྒྲེལ་ཉེ་ཤར་བ་སོགས་ངོ་མཚར་བ་བྱུང་ངོ༌། །