69480

འཛི་སྒར་ཐུགས་སྲས་ངག་དབང་འགྱུར་མེད་ (1)

Part of speech

མིང་ཚིག

Definition

ཁོང་ནི། ཡབ་རྒྱལ་དབང་སྐུ་ཕྲེང་བཅུ་པ་ཆོས་ཀྱི་དབང་པོ་དང༌། ཡུམ་ཤཱཀྱ་ཤྲཱིའི་སྲས་མོ་ཕུར་པ་ལྷ་མོ་ཟུང་གི་སྲས་སུ། རབ་བྱུང་བཅོ་ལྔ་པའི་མེ་སྦྲུལ་ ༡༩༡༧ ལོར་འཁྲུངས། ཡུམ་གྱི་ལྷུམས་སུ་བཞུགས་དུས་ནས། འཛི་སྒར་བདུན་པས། ཁམས་འཛི་སྒར་དགོན་དུ་གནང་གྲུབ་པའི་གསོལ་བཏབ་ངོར། རྒྱལ་དབང་འབྲུག་པས་ཞལ་བཞེས་ལེགས་པར་གནང་སྟེ། སྐུ་ཚད་ལོན་པ་དང་འཛི་སྒར་དུ་ཁྲི་གསོལ་ཞུས། འཛི་སྒར་ཐུགས་སྲས་ཞེས་པའི་མཚན་ཡོངས་སུ་གྲགས། ཀློག་སློབ་མཐར་ཕྱིན་ནས། བཤད་གྲྭར། མདོ་སྔགས་རིག་གནས་ལ་མཁས་པར་གྱུར། ཆོས་མགོན་བརྒྱད་པ་མཆོག་དང༌། གྲུབ་སྲས་འཕགས་མཆོག་རྡོ་རྗེ། འཁྲུལ་ཞིག་པདྨ་ཆོས་རྒྱལ། འཛི་སྒར་བདུན་པ། གྲུབ་དབང་དཔག་བསམ་རྒྱ་མཚོ། འབྲུག་པ་བསོད་ནམས་བཟང་པོ་སོགས། མཁས་གྲུབ་དུ་མའི་དྲུང་ནས་དབང་དང་ཕྱག་རྫོགས་ཀྱི་གདམས་པ་དཔག་མེད་གསན། འཛི་ལྡེམ་ཆེན་གཡུ་རུའི་སྒྲུབ་སྡེ་དང༌། དེའི་ཡང་དབེན། པདྨ་འོད་ཕུང་འཁྱིལ་བ་རྣམས་སུ་ལོ་དགུ་ཙམ་ལ་བསྙེན་སྒྲུབ་མཛད། འཛི་སྒར་བདུན་པ་ཞི་བར་གཤེགས་རྗེས་ཆོས་སྡེའི་ཐུགས་འགན་ལོ་མང་བཞེས་ནས། བཤད་སྒྲུབ་གཉིས་དར་སྤེལ་རྒྱ་ཆེར་གནང་བ་དང༌། ཕྱག་རྫས་གང་ཡོད་སྤོང་ཐག་མཛད་དེ། མགོན་སྒྲུབ་ཀྱི་ཐེབས་རྩར་འཛུད་པ་སོགས་མཛད་རྗེས་ཆེ། ས་ཁྱི་ལོར་བོད་དབུས་ཀྱི་གདན་ས་བྱར་གསང་སྔགས་ཆོས་གླིང་དུ་ཕེབས། དེར་བདེ་མཆོག་བཅུ་གསུམ་མའི་སྒྲུབ་མཆོད་གསར་འཛུགས་དང༌། འཛི་སྒར་མཁན་པོ་ནོར་གཡང་དང༌། པད་སྙིང་མཁན་པོ་ཨ་ཁྱུང་མཁན་ཁྲིར་མངའ་གསོལ་ནས། ལོ་ངོ་གཉིས་ཙམ་དུས་ཟིང་མ་བྱུང་གི་བར་བཤད་གྲྭ་གསར་དུ་བཙུགས་པའི་བདག་རྐྱེན་གནང༌། རྒྱ་དམར་གྱི་དུས་ཟིང་སྐབས། རྒྱལ་དབང་འབྲུག་པ་མཆོག་གིས་དབུས་བཙན་བྱོལ་དུ་ཕེབས་ཏེ། རྒྱ་གར་ཨ་སམ་ཕྱོགས་སུ་བྱོན། ནུབ་བྷངྒ་ལིང་སྦག་ས་རིས་མེད་ཆོས་སྒར་ཆེན་མོར་ལོ་གཅིག་ཙམ་བཞུགས། ལྕགས་གླང་ ༡༩༦༡ ལོའི་བོད་ཟླ་དང་པོའི་ཚེས་བརྒྱད་ལ། རྡོར་གདན་དུ་བོད་ཀྱི་ཆོས་བརྒྱུད་བཞིའི་བླ་ཆེན་རྣམས་ལྷན་འཛོམས་ཐོག་སྨོན་ལམ་ཐེངས་དང་པོ་ཚུགས་སྐབས་མཉམ་ཞུགས་གནང༌། འཕགས་ཡུལ་རྡོ་རྗེ་གླིང་ཌ་ལི་ཁུལ་དུ། ས་ཆ་གཟིགས་རྗེས་ཆུ་བྱི་ ༡༩༧༢ ལོར་གཙུག་ལག་ཁང་དབུ་ཚུགས་ནས། འབྲུག་ཐུབ་བསྟན་གསང་སྔགས་ཆོས་གླིང་ཞེས་གསོལ། ལ་དྭགས་སུ་དགེ་ཚུལ་སློང་བརྒྱ་ཕྲག་དུ་མ་གསར་དུ་བསྒྲུབས་གནང་མཛད། ཧེ་མི་བྱང་ཆུབ་གླིང་སོགས། དགོན་པ་དང་སྒྲུབ་སྡེ་རྙིང་པ་མང་པོ་ཉམས་གསོ་གནང་ཞིང༌། དཔལ་འཁོར་ལོ་སྡོམ་པའི་དབང་ཆེན་སོགས་གང་འདོད་ཀྱིས་ཁྲིད་ལུང་དབང་གསུམ་རྒྱ་ཆེར་བསྩལ། གཞན་ཡང་ལྷོ་འབྲུག ཕ་རན་སི་སོགས་རྒྱལ་ཁབ་ཕྱི་ནང་ཆེད་ཕེབས་གནང་། རྒྱལ་དབང་བཅུ་གཅིག་པ་དང་བཅུ་གཉིས་མངའ་གསོལ་ཁྲི་འདོན་ནས་བཟུང༌། དཔལ་ལྡན་འབྲུག་པའི་བཤད་སྒྲུབ་ཀྱི་བསྟན་པ་ལ་མཛད་རྗེས་ཆེན་པོ་གནང་བའི་མཐར། དགུང་གྲངས་རེ་བདུན་པ་ཆུ་ཕག་ ༡༩༨༣ ལོའི་ཟླ་བ་དང་པོའི་ཚེས་ཉེར་བཞི་ལ་ཞི་བར་གཤེགས་སོ། །ཞལ་སློབ་ནི། རྒྱལ་དབང་བཅུ་གཅིག་དང་བཅུ་གཉིས། མཁན་ནོར་གཡང༌། མཁན་ཆེན་དོན་བརྒྱུད་ཉི་མ། བླ་མ་སངས་རྒྱས་ཕྲིན་ལས། དཔལ་ཆེན་བླ་རྒན་བཀའ་ཡེ་ཤེས། བླ་མ་དབང་རྡོར་སོགས་སློབ་ཚོགས་ཤིན་ཏུ་མང་ངོ་། །

{{#arraymap:འཛི་སྒར་ཐུགས་སྲས་ངག་དབང་འགྱུར་མེད་

|; |@@@ | | }}