71677

ཡུལ་གྱི་ཆ་ཤས་དཔྱད་ནས་དགག་པ་ (1)

Part of speech	མིང་ཚིག
Definition	མདོ། དབུ་མ། དང་པོ་ཕྲད་མ་ཕྲད་བརྟག་པ་ནི། རགས་པ་རྩོམ་པའི་ཚེ་དབུས་གྱི་རྡུལ་ཕྱོགས་ཀྱི་རྡུལ་དང་ཕྲད་དམ་མ་ཕྲད། དང་པོ་ལྟར་ན་། བདག་ཉིད་ཀུན་གྱིས་ཕྲད་ན་ཕྱོགས་ཀྱི་རྡུལ་དབུས་ཀྱི་གོ་སར་ཐིམ་པར་འགྱུར་བས་ན་ཕྱོགས་དྲུག་ནས་རྡུལ་ཅི་ཙམ་སྦྱར་ཡང་ཆེར་མི་འགྱུར་བར་ཐལ་ལོ། །ཕྱོགས་གཅིག་གིས་ཕྲད་ན་དབུས་ཀྱི་རྡུལ་ཕྱོགས་དྲུག་གི་རྡུལ་ལ་ཕྲད་པའི་ཆ་དྲུག་ཏུ་འགྱུར་བས་ཆ་མེད་གཅིག་ཡིན་པ་ཉམས་སོ། །གཉིས་པ་ལྟར་ན་རྡུལ་རྣམས་ཕན་ཚུན་མ་ཕྲད་པའི་ཕྱིར། རགས་པ་རྩོམ་པར་མི་རིགས་ཏེ། བར་དུ་ཆོད་པའི་རྡུལ་བཞིན། དེ་ལྟར་ཡང་ཉི་ཤུ་པ་ལས། དྲུག་གིས་གཅིག་ཅར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ཀྱང་གོ་གཅིག་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་གསུངས་སོ། །གཉིས་པ་ལྟས་མ་ལྟས་བརྟག་པ་ནི། དབུས་ཀྱི་རྡུལ་ཕྱོགས་བཅུའི་དབུས་ན་གནས་པ་ཉིད་ཀྱིས་ཤར་ལ་ལྟ་བའི་ངོས་དེ་ཉིད་ཀྱིས་ལྷག་མ་དགུའི་རྡུལ་ལ་ལྟའམ། ཕྱོགས་གཞན་དང་གཞན་གྱིས་ལྟ། དང་པོ་ལྟར་ན་ཕྱོགས་གཞན་གྱི་རྡུལ་རྣམས་ཀྱང་ཤར་ཕྱོགས་དེ་ཉིད་ལ་གནས་པར་འགྱུར་ཏེ། དབུས་རྡུལ་ཤར་ལ་ལྟ་བའི་ལྟ་ས་ཡིན་པའི་ཕྱིར། གཉིས་པ་ལྟར་ན་ཕྱོགས་བཅུའི་རྡུལ་ལ་ལྟ་བའི་ཆ་ཤས་བཅུ་ཡོད་པས་ཆ་ཤས་མེད་པའི་གཅིག་ཡིན་པ་ཉམས་སོ། །གསུམ་པ་རིང་ཐུང་བརྟག་པ་ནི། རྡུལ་ཕྲན་གཉིས་མཐུད་པའི་བར་སྟེང་དུ་རྡུལ་ཕྲན་གཅིག་གནས་པ་ལ་རིང་ཐུང་ཡོད་དམ་མེད། ཡོད་ན་ཆ་ཤས་མེད་པ་ཉམས་ལ། མེད་ན་ཅི་ཙམ་མཐུད་ཀྱང་རྡུལ་གཅིག་ལས་རིང་བར་མི་འགྱུར་པས་རགས་པ་རྩོམ་པར་མི་འཐད་དོ། །ཞེས་ཀུན་མཁྱེན་གོ་རམས་པའི་དབུ་མའི་སྤྱི་དོན་ལས་གསུངས་སོ། །
Domain	[ཆོས་ལུགས།, ལྟ་གྲུབ།]