71965

ཡེ་ཤེས་གཉིས་ཀྱི་རྒྱུ་ (1)

Part of speech	མིང་ཚིག
Definition	ཐབས་དང་ཤེས་རབ་ལེགས་སྦྱངས་པ། །ཕན་ཚུན་རྒྱུ་དང་རྐྱེན་གྱུར་པས། །ཇི་ལྟ་བ་དང་ཇི་སྙེད་པའི། །ཡེ་ཤེས་གཟིགས་པ་འགྲུབ་པར་འགྱུར། །ཞེས་བྱ་བ། བསམ་གཏན་དང་སྨོན་ལམ་ལ་སོགས་པ་ཐབས་རྣམ་པ་སྣ་ཚོགས་ཀྱིས་ཉེར་ལེན་གྱི་རྒྱུ་བྱས་ཤེས་རབ་སྟོང་པ་ཉིད་ལྷན་ཅིག་བྱེད་པའི་རྐྱེན་དུ་གྱུར་ན་ཤེས་བྱ་ཐམས་ཅད་ལ་བཀྲ་བ་འབྱུང་སྟེ། མདོ་སྡེ་རྒྱན་ལས། ཇི་ལྟར་མདུད་པའི་བྱེ་བྲག་གིས། །གོས་ལ་ཚོན་བཀྲ་མི་བཀྲ་བ། །དེ་བཞིན་འཕེན་པའི་དབང་གིས་ན། །གྲོལ་བའི་ཡེ་ཤེས་བཀྲ་མི་བཀྲ། །ཞེས་གསུངས་པ་ལྟར་རོ། །ཤེས་རབ་སྟོང་པ་ཉིད་ཀྱིས་ཉེར་ལེན་གྱི་རྒྱུ་བྱས། །ཐབས་ཀྱིས་ལྷན་ཅིག་བྱེད་པའི་རྐྱེན་བྱས་ན་ཇི་ལྟ་བའི་ཡེ་ཤེས་ལ་གསལ་སྣང་འབྱུང་ངོ། །ཞེས་འཇམ་མགོན་ས་པཎ་གྱི་རིགས་གཏེར་རང་འགྲེལ་ལས་སོ། ། མི་སློབ་པའི་སར་ཤེས་བྱ་ཇི་ལྟ་བ་དང་ཇི་སྙེད་པའི་གཟིགས་པ་གསལ་བར་འབྱུང་བའི་རྒྱུ་ཅི་ཡིན་ཞེ་ན། ཐབས་དང་ཤེས་རབ་ལེགས་པར་སྦྱངས་པ་ཕན་ཚུན་ཉེར་ལེན་གྱི་རྒྱུ་དང་ལྷན་ཅིག་བྱེད་པའི་རྐྱེན་དུ་གྱུར་པས། ཇི་ལྟ་བ་དང་ཇི་སྙེད་པའི་ཡེ་ཤེས་གཟིགས་པ་འགྲུབ་པར་འགྱུར་བ་ཡིན་ཏེ། ཐབས་ཀྱིས་ཉེ་བར་ལེན་པའི་རྒྱུ་དང་། ཤེས་རབ་ཀྱིས་ལྷན་ཅིག་བྱེད་པའི་རྐྱེན་བྱས་པ་ལས་ཇི་སྙེད་པའི་ཡེ་ཤེས་དང་། ཤེས་རབ་ཀྱིས་ཉེ་བར་ལེན་པའི་རྒྱུ་བྱས། ཅིག་ཤོས་ཀྱིས་རྐྱེན་བྱས་པ་ལས་ཇི་ལྟ་བའི་ཡེ་ཤེས་ཀྱི་གཟིགས་པ་འགྲུབ་པས་སོ། །འཕགས་པ་གཞན་གྱི་ཇི་སྙེད་གཟིགས་ཚུལ་ལ། རྣམ་ཤེས་ཀྱིས་གཟིགས་ཚུལ་ནི། གཉིས་སུ་སྣང་བའི་བག་ཆགས་ཀྱིས་ཏེ་སེམས་ཅན་གཞན་ལ་སྣང་བའི་ཚུལ་དང་ཆ་འདྲ་བའོ། །ཡེ་ཤེས་ཀྱི་གཟིགས་ཚུལ་ནི། མ་རིག་པའི་ཕྱོགས་གཅིག་ཟད་པས། དག་པའི་སྣང་བ་ཤར་ཡང་། གཉིས་སྣང་གི་བག་ཆགས་མ་ཟད་པས་གཟུང་འཛིན་དུ་སྣང་བའོ། །སངས་རྒྱས་ཀྱི་གཟིགས་ཚུལ་ནི། གཟུང་འཛིན་གྱི་བག་ཆགས་དྲུངས་ཕྱུང་བས་དེའི་སྣང་བ་མི་མངའ་ཞིང་མི་འཆར་ཡང་། སེམས་ཅན་གཞན་ལ་སྣང་ཚུལ་དེ་ཁོ་ན་ལྟར་མཁྱེན་ནས་གཟུགས་སྐུ་གཉིས་ཀྱི་སྣང་བ་སྟོན་ནུས་པའོ། །དེའི་ཕྱིར་ཇི་སྙེད་པ་མཁྱེན་པའི་ཡེ་ཤེས་སམ། གཟུགས་ཀྱི་སྐུའི་ཉེ་བར་ལེན་པའི་རྒྱུ་ནི་ཐབས་བསོད་ནམས་ཀྱི་ཚོགས་དང་། ཇི་ལྟ་བ་མཁྱེན་པའི་ཡེ་ཤེས་སམ། ཆོས་ཀྱི་སྐུའི་ཉེ་བར་ལེན་པའི་རྒྱུ་ནི་ཤེས་རབ་ཡེ་ཤེས་ཀྱི་ཚོགས་ཞེས་བྱ་བ་དེ་ཡིན་ནོ། །ཞེས་པཎ་ཆེན་ཤཱཀ་མཆོག་གི་སྡེ་བདུན་རོལ་མཚོ་ལས་སོ། །
Domain	ཆོས་ལུགས།