75290

རེ་མ་ཏི་ (1)

Part of speech

མིང་ཚིག

Definition

ལྷ་མོ་འདིའི་སྐྱེ་རྒྱུད་ཆ་ཚང་སློབ་དཔོན་པདྨས་སློབ་བུ་གླང་དཔལ་གྱི་སེང་གེ་ལ་བཀའ་སྩལ་བའི་མཁའ་འགྲོ་མ་མེ་ལྕེ་འབར་བའི་རྒྱུད་དུ་བཞུགས་ལ། བརྒྱུད་ཚུལ་གཞན་ཡང་། ཨ་ཙརྱ་དམར་པོ་ལ་ལྕེ་འབྱུང་གནས་བཟང་པོས་ཞུས་ཤིང༌། དེ་ལ་ཞང་ཤེས་རབ་བླ་མ་དང༌། གནུབས་རྒྱལ་ཨེ་གཉིས་ཀྱིས་གསན་པ་ལས་བརྒྱུད་པ་དང༌། ལོ་ཙཱ་པ་ཤེས་རབ་བླ་མས་གུ་རུ་ཨ་ཙརྱ་དམར་པོ་ལ་ཞུས་ཏེ་བོད་དུ་བརྒྱུད། སྐུ་མདོག་དང་ཆ་ལུགས་གཅིག་ཏུ་མ་ངེས་ཀྱང་། གྲགས་ཆེ་བ་ཁྲག་ཞག་འཁྲུག་པའི་རྒྱ་མཚོ་ཆེན་པོའི་དབུས་སུ། རླུང་ནག་འཚུབ་མའི་གུར་གྱི་ནང་དུ། དྲེའུ་རྒྱང་སེར་གྭ་བ་སྲིན་པོའི་ཐོད་པའི་སྒ་དང་པགས་པས་གཡོགས་ཤིང༌། གོང་རྨེད་དང་སྲབ་མཐུར་གདུག་པའི་སྦྲུལ་ལས་བྱས་པ། དེའི་སྟེང་དུ་དཔལ་ལྡན་དམག་ཟོར་གྱི་རྒྱལ་མོ་རེ་མ་ཏི་མཐིང་ནག་ཞལ་གཅིག་ཕྱག་གཉིས་མ། ཕྱག་གཡས་རྡོ་རྗེས་མཚན་པའི་བེ་ཅོན་འཕྱར་ཞིང༌། གཡོན་ཐུན་དང་ཁྲག་གིས་གང་བའི་ནལ་ཐོད་ཐུགས་ཀར་འཛིན་པ། ཞལ་གདངས་ཤིང་མཆེ་བ་རྣོན་པོ་བཞི་གཙིགས་ནས་མི་རོ་རངས་པོ་ཟ་བ། སྤྱན་གསུམ་དམར་ལ་ཁྲོ་གཉེར་བསྡུས་ཤིང༌། དབུ་སྐྲ་ཁམ་སེར་གྱེན་དུ་བརྫེས་པ། སྨིན་མ་དང་སྨ་ར་འབར་བ། སྙན་གཡས་ལ་སེངྒེ་དང༌། གཡོན་ལ་སྦྲུལ་གྱིས་བརྒྱན་པ། མི་མགོ་སྐམ་པོ་ལྔས་དབུ་བརྒྱན་ཅིང༌། རློན་པ་ལྔ་བཅུའི་དོ་ཤལ་བྱས་པ། སྐུ་ལ་ཁྲག་གི་ཐིག་ལེ་དང་ཞག་གི་སོར་རིས། ཐལ་ཆེན་གྱི་ཚོམ་བུས་བྱུགས་ཤིང༌། སྤྱི་བོར་ཟླ་བ་དང༌། ལྟེ་བར་ཉི་མའི་དཀྱིལ་འཁོར་འཆར་ཞིང༌། དར་ནག་གི་ལྷབ་ལྷུབ་དང༌། མི་ལྤགས་ཀྱི་གཡང་གཞི་དང༌། རེ་བ་ནག་པོས་སྟོད་གཡོགས་ཤིང༌། སྟག་གི་པགས་པ་རློན་པའི་ཤམ་ཐབས་ལ་སྦྲུལ་ཉིས་གཤིབས་ཀྱི་སྐ་རགས་བྱས༌། སྒའི་སྔ་ཤད་ལ་ནད་རྐྱལ་དང༌། ཚོན་གྱི་དྲུ་གུ་ཕྱི་ཤ་ལ་འཕྱང་ཞིང༌། ཁྲམ་ཤིང་སྐེད་ལ་གཟེར་བ། བྱང་དམར་གྱི་ཁྲེས་པོ་དང༌། ཤོ་རྡེའུ་དཀར་ནག་སྔ་ཤ་ལ་འཕྱང་ཞིང༌། དབུ་ལ་རྨ་བྱའི་གདུགས་ཕུབ་པ། དེའི་འཁོར་དུ་དུས་བཞིའི་ལྷ་མོ་དང༌། མ་མོ་དང༌། བདུད་དང༌། གཤིན་རྗེ་དང་སྲིན་པོ་དང༌། ཞིང་སྐྱོང་ལ་སོགས་པའི་ཚོགས་དཔག་ཏུ་མེད་པ། གཞན་ཡང་ལྷ་ཀླུ་གནོད་སྦྱིན་གྱི་ཚོགས་དཔག་ཏུ་མེད་པ་དང་བཅས་པའོ། །