75542

རོ་ལོ་བཀའ་བརྒྱུད་ (1)

Part of speech

མིང་ཚིག

Definition

ཕུག་པ་ཚུལ་ཡེའི་སློབ་མ་སྟེ་རབ་ཏུ་བྱུང་བའི་མཚན་ཚུལ་ཁྲིམས་རྒྱལ་མཚན། ཕུག་པ་བ་ལས་གདམས་པ་རྫོགས་པར་གསན་ནས་སྒྲུབ་པ་ལ་མི་ཚེ་བསྐྱལ། རོ་ལོའི་གཙུག་ལག་ཁང(འདི་ནི་ད་ལྟ་ཡུལ་ཤུལ་རྫོང་གི་མངའ་ཁུངས་དད་པ་དགོན་ཡོད་ས་ནས་རྩི་ཆུ་ཆུ་རྒྱུད་དེད་ནས་མར་ཏོག་སོང་ན། གླེ་ནང་ཞེས་ལུང་པ་ཞིག་ཡོད་དེ་ཡི་ཕུ་ན་རོ་ལོ་ནང་ཟེར་བ་ཞིག་འདུག་དེ་ཡིན་ནམ་སྙམས།)དང་བླ་མ་རིན་པོ་ཆེའི་འདྲ་འབག་དངུལ་སྐུ་ཆེན་མོ་བཞེངས། གྲྭ་ཚོགས་ཀྱང་ཆེར་འདུས་འགྲོ་དོན་རླབས་ཆེན་མཛད། རབ་བྱུང་ལྔ་པའི་ནང་ཙམ་ལ་བྱོན། (འཁྲུངས་འདས་མི་གསལ།) སློབ་མ་ལ་རིགས་དབོན་དབུ་སེ། ཀུན་དགའ་གཞོན་ནུ། ཚུལ་གྲགས་པ་སོགས་བྱོན། དེ་རྗེས་དབུ་སེ་བ་གདན་ས་མཛད་པའི་སློབ་མ་གཅུང་ཚུལ་ཁྲིམས་བློ་གྲོས་ཀྱི་གདན་ས་མཛད་པ་ལ། ཀརྨ་པ་དེ་བཞིན་གཤེགས་པ་དང༌། ཚང་གསར་བསོད་བློ། རླང་རས་གྲགས་རྒྱལ་བ། ཤོར་ཕུ་ལྷུན་གྲུབ་སོགས་ཀྱི་སློབ་མར་གྱུར་པ་མེ་ཉག་རྣལ་འབྱོར་བློ་གྲོས་རིན་ཆེན་གྱིས་རོ་ལོའི་བན་རྒར་རྣམས་བསྡུས་ཏེ་ཟུར་མང་དུ་སྤོ་བར་མཛད། རོ་ལོའི་དངུལ་སྐུ་ཆེན་མོ་ཡང་ཟུར་མང་དུ་བཞུགས་པ་མཇལ་དུ་ཡོད་ཅིང༌། ཀརྨ་སྙན་བརྒྱུད་དང་འབའ་རོམ་གསེར་ཆོས་ཟུང་འབྲེལ་དུ་བསྐྱངས་བ་སྟེ་རོ་ལོ་པའམ་ཟུར་མང་གི་སྐབས་སོ། །